Ambari Utsav : ಬೆಳಗಾವಿ-ನಾಸಿಕ್ ನಡುವೆ ಮೊದಲ ಅಂಬಾರಿ ಉತ್ಸವ ಎಸಿ ಸ್ಲೀಪರ್ ಬಸ್ ಆರಂಭ

ಬೆಳಗಾವಿ, ಜುಲೈ. 16: ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ (NWKRTC) ಬೆಳಗಾವಿ - ನಾಸಿಕ್ - ಬೆಳಗಾವಿ ಮಾರ್ಗದಲ್ಲಿ ತನ್ನ ಮೊದಲ ಮಲ್ಟಿ ಆಕ್ಸೆಲ್ ವೋಲ್ವೋ ಅಂಬಾರಿ ಉತ್ಸವ ಎ/ಸಿ ಸ್ಲೀಪರ್ ನೂತನ ಸಾರಿಗೆ ಸೇವೆಯನ್ನು ಆರಂಭಿಸಿದೆ. ಈ ಮೂಲಕ ಅಂತರರಾಜ್ಯ ಬಸ್ ಪ್ರಯಾಣದಲ್ಲಿ ಹೊಸ ಪ್ರಾರಂಬ ಮಾಡಿದೆ.

ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ (NWKRTC) ಈ ಹಿಂದೆ ಈ ಮಾರ್ಗದಲ್ಲಿ 'ಐರಾವತ್' ವೋಲ್ವೋ B11R CLUB CLASS ಬಸ್ ಸೇವೆ ಆರಂಭಿಸಿತ್ತು. ಈಗ ಮತ್ತೊಂದು ಸೇವೆ ಆರಂಭಿಸಿದ್ದು, ಬೆಳಗಾವಿ - ನಾಸಿಕ್ - ಬೆಳಗಾವಿ ಮಾರ್ಗದಲ್ಲಿ ಪ್ರಯಾಣಿಕರ ಸೌಕರ್ಯವನ್ನು ಹೆಚ್ಚಿಸಲು ಪ್ರತಿದಿನ ವೋಲ್ವೋ BS VI 9600 ಮಲ್ಟಿ-ಆಕ್ಸಲ್ 'ಅಂಬಾರಿ ಉತ್ಸವ' ಎಸಿ ಸ್ಲೀಪರ್ ಬಸ್‌ ಸೇವೆ ನೀಡಲಿದೆ.

ಅಂಬಾರಿ ಉತ್ಸವ ಬಸ್ ಸಮಯ, ದರ ಮಾಹಿತಿ

ಬೆಳಗಾವಿ - ನಾಸಿಕ್ - ಬೆಳಗಾವಿ ಮಾರ್ಗದಲ್ಲಿ ಬಸ್ ಸಮಯವು ಒಂದೇ ಆಗಿರುತ್ತದೆ. ಬೆಳಗಾವಿಯನ್ನು ಸಂಜೆ 5:30ಕ್ಕೆ ಬಿಟ್ಟು ನಾಸಿಕ್‌ಗೆ ಬೆಳಗ್ಗೆ 05:45ಕ್ಕೆ ತಲುಪಲಿದೆ. ಇನ್ನು, ನಾಸಿಕ್‌ನಲ್ಲಿ ಸಂಜೆ 6:00 ಗಂಟೆಗೆ ಹೊರಡುವ ಬಸ್ ಬೆಳಗಾವಿಯನ್ನು 06:00 ಗಂಟೆಗೆ ತಲುಪಲಿದೆ. ಇನ್ನು, ಎರಡು ಮಾರ್ಗಗಳಲ್ಲಿ 1400 ರೂಪಾಯಿ ದರ ನಿಗದಿ ಮಾಡಲಾಗಿದೆ. ಸಂಕೇಶ್ವರ ಮತ್ತು ನಿಪ್ಪಾಣಿ ಮಾರ್ಗಗಳ ಮೂಲಕ ಬಸ್ ಓಡಲಿದ್ದು, ಬಸ್ ಸಂಕೇಶ್ವರಕ್ಕೆ ಸಂಜೆ 6.30ಕ್ಕೆ ಮತ್ತು ನಿಪ್ಪಾಣಿಗೆ 7.15ಕ್ಕೆ ತಲುಪುತ್ತದೆ.

'ಅಂಬಾರಿ ಉತ್ಸವ' ಸ್ಲೀಪರ್ ಬಸ್‌

ಎನ್‌ಡಬ್ಲೂಕೆಆರ್‌ಟಿಸಿಯ 'ಅಂಬಾರಿ ಉತ್ಸವ' ಸ್ಲೀಪರ್ ಬಸ್‌ಗಳು 15 ಮೀಟರ್ ಉದ್ದದ ಅದ್ಧೂರಿ ಬಸ್‌ಗಳಾಗಿವೆ. ಆಂಟಿ-ಸ್ಲಿಪ್ ರೇಗ್ಯುಲೇಷನ್ ಸಿಸ್ಟಮ್ (ARS) ವ್ಯವಸ್ಥೆ ಹೊಂದಿದೆ. ಸುಧಾರಿತ ರೋಲ್‌ಓವರ್ ರಕ್ಷಣೆ, ಚಾಲಕನಿಗೆ ಮೊಣಕಾಲು ರಕ್ಷಣೆ, ಅಗ್ನಿಶಾಮಕ, ಸೈಡ್ ಅಂಡರ್‌ರನ್ ಪ್ರೋಟೆಕ್ಷನ್, ಬೆಂಕಿ ಪತ್ತೆ ಮುಂತಾದ ಸುಧಾರಿತ ಅಂತರ್ನಿರ್ಮಿತ ಸುರಕ್ಷತಾ ವೈಶಿಷ್ಟ್ಯಗಳನ್ನು ಹೊಂದಿವೆ.

1. ಅಂಬಾರಿ ಉತ್ಸವ ಬಸ್‌ಗಳು ವೋಲ್ವೋ 9600 ಸ್ಲೀಪರ್ ಕೋಚ್‌ಗಳು ವಿಶೇಷ ಸ್ಕ್ಯಾಂಡಿನೇವಿಯನ್ ವಿನ್ಯಾಸದೊಂದಿಗೆ ರಚಿಸಲಾಗಿದೆ. ಈ ಬಸ್‌ಗಳ ಕಿಟಕಿಗಳನ್ನು ಪ್ರಯಾಣಿಕರು ಬಸ್‌ನಿಂದ ಹೊರಗಿನ ಸುಂದರ ನೋಟವನ್ನು ಅನುಭವಿಸುವ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ.

2. 2×1 ಕಾನ್ಫಿಗರೇಶನ್‌ನಲ್ಲಿ ನಲವತ್ತು ಬರ್ತ್‌ಗಳು ಅತ್ಯುತ್ತಮ-ಇನ್-ಕ್ಲಾಸ್ ಹೆಡ್‌ರೂಮ್ ಜೊತೆಗೆ ಪ್ರಯಾಣಿಕರಿಗೆ ಮಲಗುವ ಮತ್ತು ಕುಳಿತುಕೊಳ್ಳುವ ಸ್ಥಾನಗಳೆರಡರಲ್ಲೂ ಉತ್ತಮ ಸೌಕರ್ಯವಿದೆ.

3. ವಾಹನವು ಉತ್ತಮ ಕಾರ್ಯಕ್ಷಮತೆ ಮತ್ತು ಐಷಾರಾಮಿ ಗುಣಗಳನ್ನು ಹೊಂದಿದೆ. V- ಆಕಾರದ ಹೆಡ್‌ಲೈಟ್‌ಗಳು ವಾಹನದ ಹೊರಭಾಗದ ಭವ್ಯತೆಗೆ ಅನನ್ಯ ಸೊಬಗನ್ನು ಸೇರಿಸುತ್ತವೆ.

4. ಎಬಿಎಸ್, ಎಂಜಿನ್ ಬ್ರೇಕ್, ಹಿಲ್ ಸ್ಟಾರ್ಟ್ ಅಸಿಸ್ಟ್, ಇಂಟಿಗ್ರೇಟೆಡ್ ಹೈಡ್ರೊಡೈನಾಮಿಕ್ ರಿಟಾರ್ಡರ್ ಮತ್ತು ಎಲೆಕ್ಟ್ರಾನಿಕ್ ವೆಹಿಕಲ್ ಸ್ಟೆಬಿಲಿಟಿ ಕಂಟ್ರೋಲ್ (ಇವಿಎಸ್‌ಸಿ) ಸೇರಿದಂತೆ ಎಲೆಕ್ಟ್ರಾನಿಕ್ ಬ್ರೇಕಿಂಗ್ ಸಿಸ್ಟಮ್‌ನೊಂದಿಗೆ ವಾಹನವು ಸ್ಥಿರತೆ ಮತ್ತು ನಿಯಂತ್ರಣವನ್ನು ಹೆಚ್ಚಿಸಿದೆ.

5. ಪ್ರತಿ ಬರ್ತ್ ಸಾಕಷ್ಟು ಹೆಡ್ ರೂಮ್, 2 USB ಪೋರ್ಟ್‌ಗಳು, ಏರ್ ವೆಂಟ್‌ಗಳು, ರೀಡಿಂಗ್ ಲೈಟ್‌ಗಳು ಮತ್ತು ಮೊಬೈಲ್ ಹೋಲ್ಡರ್‌ನೊಂದಿಗೆ ಬರುತ್ತದೆ. ಈ ಬಸ್‌ಗಳಲ್ಲಿ ನೀ ಇಂಪ್ಯಾಕ್ಟ್ ಪ್ರೊಟೆಕ್ಷನ್ ಟೆಕ್ನಾಲಜಿಯಂತಹ ವೈಶಿಷ್ಟ್ಯಗಳಿದ್ದು, ಇದು ತೀವ್ರ ಸಂದರ್ಭಗಳಲ್ಲಿ ಚಾಲಕರ ಸುರಕ್ಷತೆಯನ್ನು ಹೆಚ್ಚಿಸುತ್ತದೆ.

English summary

North Western Karnataka Road Transport Corporation (NWKRTC) launches its first Ambari Utsav AC sleeper bus between Belagavi-Nashik. Know more details.