ಶ್ರೀ, ಶ್ರೀಮತಿ ಬಳಸುವ ಮುನ್ನ ಒಮ್ಮೆ ಯೋಚಿಸಿ

By * ಗಂಗಾಧರ ಶಾಸ್ತ್ರಿ,ನಾಜಗಾರ

Published: Thursday, December 2, 2010, 13:06 [IST]

ಭಾಷಾ ಬಳಕೆಯಲ್ಲಿ ತಿಳಿದೋ ತಿಳಿಯದೋ ಕೆಲವೊಮ್ಮೆ ಸೇರಿಕೊಂಡ ತಪ್ಪುಗಳನ್ನು ನಾವು ಸರಿಪಡಿಸಿಕೊಳ್ಳದಿದ್ದರೆ ಅದರ ರಾಷ್ಟ್ರೀಯತೆಗೋ, ಸೌಂದರ್ಯಕ್ಕೋ ಅಪಚಾರ ಎಸಗಿದಂತೆ. ಇಂದು ಮುದ್ರಣಗೊಳ್ಳುವ ಆಮಂತ್ರಣ ಪತ್ರಿಕೆಗಳನ್ನೆಲ್ಲ ವಿಳಾಸ ಬರೆಯುವಲ್ಲಿ ಶ್ರೀ/ಶ್ರೀಮತಿ ಅಥವಾ ಶ್ರೀಮತಿ/ಶ್ರೀ ಎಂದು ಮುದ್ರಿಸಲಾಗುತ್ತಿದೆ. ಹೀಗೆ ಮುದ್ರಿಸುವುದರ ಉದ್ದೇಶ ಪುರುಷ ಮತ್ತು ಶ್ರೀ ಗೌರವ ಸೂಚಿಸಿ ಆಮಂತ್ರಿಸುವುದು. ಆದರೆ 'ಶ್ರೀ" ಅನ್ನುವುದು ಸ್ತ್ರೀವಾಚಕ. ಅದನ್ನು ಪುರುಷರ ಹೆಸರಿನ ಹಿಂದೆ ಬಳಸುತ್ತೇವೆ! ಶ್ರೀ ಗಂಗಾಧರ ಶಾಸ್ತ್ರಿ ಎಂದು. ಇದು ಸರಿಯಲ್ಲ.

ಅಂದರೆ, ಶ್ರೀ ಮತ್ತು ಶ್ರೀಮತಿ ಅನ್ನುವ ಎರಡೂ ಸ್ತ್ರೀಯರಿಗೆ ಬಳಸಲ್ಪಡುವ ಗೌರವ ಪದ. ಅಂದರೆ ಸ್ತ್ರೀಯರ ಹೆಸರಿನ ಹಿಂದೆ ಶ್ರೀ ಅಥವಾ ಶ್ರೀಮತಿ ಯಾವುದನ್ನು ಬೇಕಾದರೂ ಬಳಸಬಹುದು. ಆದರೆ ಪುರುಷರ ಹೆಸರಿನ ಹಿಂದೆ ಶ್ರೀ ಬಳಸುವುದು ಗೌರವ ಪದವಾಗುವ ಬದಲು ಅಗೌರವ ಪದ ಬಳಸಿದಂತಾಗುತ್ತದೆ.

ಹಾಗಿದ್ದರೆ, ಹೇಗೆ ಬಳಸುವುದು ಸರಿ? ಶ್ರೀಗೌರಿ, ಶ್ರೀಪಾರ್ವತಿ, ಶ್ರೀಲಕ್ಷ್ಮಿ ಅಥವಾ ಶ್ರೀಮತಿ ಗೌರಿ, ಶ್ರೀಮತಿ ಪಾರ್ವತಿ, ಶ್ರೀಮತಿ ಲಕ್ಷ್ಮಿ ಹೀಗೆ ಬಳಸಬೇಕು. ಪುರುಷರಿಗೆ ಶ್ರೀಯುತ ಗೌರೀಶ, ಶ್ರೀಯುತ ರಾಮಚಂದ್ರ, ಶ್ರೀಯುತ ಗಣೇಶ ಅಥವಾ ಶ್ರೀಮಾನ್‌ಗೌರೀಶ, ಶ್ರೀಮಾನ್ ರಾಮಚಂದ್ರ, ಶ್ರೀಮಾನ್ ಗಣೇಶ ಎಂದು ಬಳಸಬೇಕು.

ಆದ್ದರಿಂದ ಆಮಂತ್ರಣಾದಿಗಳಲ್ಲಿ ಶ್ರೀ/ ಶ್ರೀಯುತ ಇಲ್ಲವೆ ಶ್ರೀಯುತ/ಶ್ರೀ ಅಥವಾ ಶ್ರೀ/ ಶ್ರೀಮಾನ್-ಶ್ರೀಮಾನ್/ಶ್ರೀ ಹೀಗೆ ಬಳಸುವುದು ಸರಿಯಾದದ್ದು. ಅದೇ ರೀತಿ 'ಸರ್ವರಿಗೂ ಸುಸ್ವಾಗತ' ಅನ್ನುವುದು ತಪ್ಪು. 'ಸರ್ವರಿಗೂ ಸ್ವಾಗತ' ಸರಿಯಾದದ್ದು. 'ಸುಸ್ವಾಗತ'
ಅನ್ನುವುದು ಅತಿಥೇಯರು ಬಳಸುವ ಪದವೇ ಅಲ್ಲ; ಅದು ಅತಿಥಿಗಳಾಗಿ ಬರುವವರು ಹೇಳಬೇಕಾದ 'ಸ್ವಾಗತಕ್ಕೆ' ಉತ್ತರ 'ಸುಸ್ವಾಗತ"!

ನಾವು ಅತಿಥಿಗಳನ್ನು ಕಳಿಸುವಾಗ 'ಬೀಳ್ಕೊಡು" ಶಬ್ದ ಬಳಸುತ್ತೇವೆ. ಅದು ಬೀಳ್ಕೊಂಡು ಅಲ್ಲ. ಬೀಳ್ಕೊಡು ಎಂದರೆ ಬೀಳಲಿಕ್ಕೆ ಬಿಡು ಎಂದಾಗುತ್ತದೆ! ಆ ಪದ - 'ಬಿಡು+ಕೊಡು' ಎಂಬುದರಿಂದಾದ 'ಬೀಳ್ಕೊಡು" ಎಂದಾಗಿದೆಯೆಂದು ಹೇಳುತ್ತಾರೆ ಅದು ಸರಿಯಲ್ಲ. ವೀಳ್ಯ ಕೊಡುವುದು ಆಹ್ವಾನದ ಸಂದರ್ಭದಲ್ಲೇ ಹೊರತು ಕಳಿಸಿಕೊಡುವಾಗ ಅಲ್ಲ! ದಯವಿಟ್ಟು ಭಾಷೆಯ ಶುದ್ಧ ಬಳಕೆಯ ಕಡೆಗೆ ಗಮನಿಸಿ.

Published On December 2, 2010