ವಾಣಿ ಮಂಜುನಾಥ್‌, ಆರ್ಕೇಡಿಯ, ಕ್ಯಾಲಿಫೋರ್ನಿಯ

ಕೆಟ್ರೀನಳೋ? ಕಾಳಿಯೋ?

ವಾಣಿ ಮಂಜುನಾಥ್‌, ಆರ್ಕೇಡಿಯ, ಕ್ಯಾಲಿಫೋರ್ನಿಯ [email protected] ದುಷ್ಟ ಶಕ್ತಿಗಳನ್ನು ಸಂಹರಿಸಲೆಂದೇ ಅವತರಿಸಿದವರು ಚಾಮುಂಡಿ, ದುರ್ಗಿ; ಜಲರೂಪಿಯಾಗಿ ಭೋರ್ಗರೆಯುತ್ತ ನಿನ್ನ ಅಲೆಅಲೆಯಾದ ಕೇಶರಾಶಿಯ ಮುಡಿಯನ್ನು ಬಿಚ್ಚಿ, ಹೊಳೆವ ಕಂಗಳ ಮಿಂಚನ್ನು ಝಳಪಿಸಿ, ಸಿಡಿಲ ಆರ್ಭಟದಿಂದ ಭೋರ್ಗರೆಯುತ್ತ ಬಂದು, ನಿನ್ನ ಮಕ್ಕಳನ್ನೇ ಬಲಿ ತೆಗೆದುಕೊಂಡ ನಿನ್ನ ಈ ಅವತಾರದ ಪರಿಯಾದರೂ ಏನು? ನಿನ್ನ ಆವೇಶದ ಹೊಡೆತಕ್ಕೆ ಸಿಕ್ಕಿ ಮುಳುಗಿದ ಊರು ಕೇರಿಗಳು, ನೆಲೆತಪ್ಪಿದ ಸಾವಿರಾರು ಸಂಸಾರಗಳು; ಕಣ್ಣು ಹಾಯುವೆಡೆಯಲ್ಲೆಲ್ಲಾ ನೀರು. ಆದರೇನು? ಕುಡಿಯಲು ಹನಿ ನೀರಿಲ್ಲದೆ ಕಂಗೆಟ್ಟ ಬಡಬಗ್ಗರ ಕಣ್ಣುಗಳಲ್ಲಿದ್ದ ಅಸಹಾಯಕತೆ; ಬದುಕಿನುದ್ದಕ್ಕೂ ಗಳಿಸಿದ್ದನ್ನು ನಿನ್ನ ಆಕ್ರೋಶದಲ್ಲಿ ಕಳೆದುಕೊಂಡು ದಿಕ್ಕೆಟ್ಟು ಅಲೆಯುತ್ತಿದ್ದವರ ದುಸ್ಥಿತಿ. ಬಾರದ ಸಹಾಯ ಹಸ್ತಕ್ಕೆ ಕೈಚಾಚಿ ಶೂನ್ಯದತ್ತ ನೆಟ್ಟ ನೋಟ ಬೀರಿದ ಸುಕ್ಕುಗಟ್ಟಿದ ಮೊಗಗಳೆಷ್ಟೋ; ನಿಸ್ತೇಜ ಕಂಗಳಲ್ಲಿ ಇಣುಕುತ್ತಿದ್ದ ಕಣ್ಣೀರ ಹನಿಗಳೊಂದಿಗಿನ ಅನಾಥ ಭಾವ. ಇದು ಕಲಿಯುಗವಲ್ಲವೇ? ಮತ್ತೆ ನಿನ್ನನ್ನು ಒಂದೇ ಗುಟುಕಿನಲ್ಲಿ ಆಪೋಶನ ತೆಗೆದುಕೊಳ್ಳಬಲ್ಲ ಅಗಸ್ತ್ಯನೆಲ್ಲಿಂದ ಬರಬೇಕು? ಈ ಅರಾಜಕತೆ, ಅವ್ಯವಸ್ಥೆಗಳ ಮಧ್ಯೆ ಜೇನೊಸರುವಂಥ ಹುಸಿ ಆಶ್ವಾಸನೆಗಳು; ಅದಾಗ್ಯೂ ನೊಂದ ಜೀವಿಗಳಿಗೆ ಸಾಂತ್ವನ ನೀಡಲು ಧಾವಿಸಿ ಬಂದ ದೇವದೂತರೆಷ್ಟೋ ಮಂದಿ; ನಶಿಸಿದ ನಾಡಿನಲ್ಲೇ ಮತ್ತೆ ಹೊಸ ಸಮಾಜ ಕಟ್ಟುವ ದೃಢ ನಿರ್ಧಾರ. ತನ್ನ ಸ್ವಾರ್ಥಕ್ಕಾಗಿ, ತನ್ನನ್ನು ಪೊರೆಯುವ ಪ್ರಕೃತಿ ಮಾತೆಯನ್ನೇ ಧಿಕ್ಕರಿಸಿ ಭಸ್ಮಾಸುರನಾಗಲು ಹೊರಟಿರುವ ಮಾನವನಿಗೆ ನೀನು ನೀಡುತ್ತಿರುವ ಮುನ್ನೆಚ್ಚರಿಕೆಯೇ? ಅನಾಚಾರ, ಭ್ರಷ್ಟತೆಗಳು ಮೆರೆಯುತ್ತಿರುವ ಈ ಸಮಾಜಕ್ಕೆ ಇದು ಮುಂಬರುವ ಯುಗಾಂತದ ಸಂಕೇತವೆ? (ಡಿ. 3, 2005ರಂದು ಲಾಸ್‌ ಏಂಜಲಿಸ್‌ನಲ್ಲಿ ನಡೆದ ಸಾಹಿತ್ಯ ರಂಗದ 2ನೇ ಕನ್ನಡ ಸಮ್ಮೇಳನದಲ್ಲಿ ಓದಿದ ಕವನ) Post your views

ಮುಖಪುಟ / ಎನ್‌ಆರ್‌ಐ