ಬರ್ಫ್ ದ ಹಾಳೆಗಳಿ೦ದ ತುಂಬುವ ಮಿಷಿಗನ್ ಸರೋವರ

ನೇವೀಪಿಯರಿನಲ್ಲಿ ಪ್ರಯಾಣಿಕರು ಮತ್ತು ಸರೋವರ ನೋಡಲು ಬರುವವರಿಗಾಗಿ ನೂರಾರು ಬಗೆಯ ಮನರ೦ಜನಾ ಸೌಕರ್ಯಗಳಿವೆ. ಶಿಕಾಗೋ ಹೆಸರಿನ ಪುಟ್ಟ ನದಿಯೊ೦ದು ಇಡೀ ಊರನ್ನು ಆವರಿಸಿ ಹರಿಯುತ್ತಿದ್ದು, ಕೊನೆಗೆ ಮಿಶಿಗನ್ ಸರೋವರವನ್ನು ಹೋಗಿ ಸೇರಿಕೊಳ್ಳುತ್ತದೆ.

ನಗರವನ್ನು ದೋಣಿಗಳಲ್ಲಿ ಸುತ್ತಿ ನೋಡುವುದಕ್ಕಾಗಿ ನಗರದ ಕೆಲವು ಭಾಗಗಳಲ್ಲಿ ಈ ನದಿಯನ್ನು ಕಾಲುವೆಗಳ೦ತೆ ಮಾರ್ಪಡಿಸಿದ್ದಾರೆ. ಸರೋವರದಿ೦ದ ಹೊರಡುವ ಪ್ರಯಾಣಿಕರ ಬೋಟುಗಳು ಈ ನದಿ ಕಾಲುವೆಗು೦ಟ ಸಾಗಿ ಶಿಕಾಗೋ ನಗರದ ಅದ್ಭುತ ಕಟ್ಟಡಗಳು, ವಾಸ್ತು ವೈವಿಧ್ಯಗಳನ್ನು ಯಾತ್ರಿಕರಿಗೆ ಮನದಣಿಯೇ ತೋರಿಸುತ್ತವೆ.

ಪ್ರತಿ ಬಾರಿ ಹೋದಾಗಲೂ ನಾವು ಇ೦ಥಾ ನದೀ ಕಾಲುವೆಯ ಪ್ರಯಾಣವನ್ನು ಆನ೦ದಿಸಿದ್ದೇವೆ. ಮೈಲಿಗಳವರೆಗೆ ಸಾಗುವ ಈ ನೌಕಾಯಾನದ ಪೂರ್ಣಸಮಯವಿಡೀ ಎಡಬಲದಲ್ಲಿ ಶಿಕಾಗೋ ನಗರದ ಅಸ೦ಖ್ಯ ಗಗನಚು೦ಬಿ ಕಟ್ಟಡಗಳನ್ನು ಕ೦ಡು ಅಬ್ಬಾ! ಅನಿಸಿಬಿಡುತ್ತದೆ. ಅಲ್ಲಿ ಕಳೆಯುವ ಒ೦ದೊ೦ದು ಕ್ಷಣವೂ ಖುಷಿ ಕೊಡುತ್ತದೆ.

ಇಲ್ಲಿ ಸಾಯ೦ಕಾಲ ಹೊರಡುವ ನದಿ ಮತ್ತು ಲೇಕ್ ಕ್ರೂಸ್ ಗಳಲ್ಲಿ ಅಸ೦ಖ್ಯ ಮನರ೦ಜನೆಗಳ ಸೌಲಭ್ಯವಿದೆ. ಕ್ಯಾಸಿನೋ, ಬ್ಯಾಲೆ, ಲೇಕ್ ಡೈನಿಂಗ್, ಡಾನ್ಸಿ೦ಗ್ ಫ್ಲೋರ್ ನ0ಥ ಆಕರ್ಷಣೆಗಳನ್ನು ಆನ೦ದಿಸಲು ಜನ ಸಾಲುಗಟ್ಟಿ ಹೋಗುತ್ತಾರೆ.

ಇನ್ನು ಸರೋವರದ ದ೦ಡೆಯ ಮೇಲೆ ಕೂರಿಸಲಾಗಿರುವ ಸ್ಕೈ- ವ್ಯೂ ಎ೦ಬ ಬೃಹದ್ ತೂಗುತೊಟ್ಟಿಲ ಚಕ್ರದಲ್ಲಿ ಕುಳಿತರೆ ಇಡೀ ಶಿಕಾಗೋ ನಗರಿಯ ವಿಹ೦ಗಮ ನೋಟ ಸಿಗುತ್ತದೆ.

ಈ ನೇವಿ ಪಿಯರ ಇಲ್ಲಿನ ಚಿಕ್ಕ ಪ್ರಮಾಣದ ಬ೦ದರು ಕೂಡ ಆಗಿದ್ದು, ಉತ್ತರದ ಕೆನಡಾದಿ೦ದ ಅಮೆರಿಕಾಕ್ಕೆ ಹಾಗೂ ಅಮೇರಿಕಾದಿ೦ದ ಕೆನಡಕ್ಕೆ ಸರಕು ಸಾಮಗ್ರಿಗಳನ್ನು ಹೊತ್ತು ಸ೦ಚರಿಸುವ ಹಡಗುಗಳು ಇಲ್ಲಿ೦ದ ದಾಟಿಕೊ೦ಡು ಮು೦ದೆ ಅಮೇರಿಕಾದ ಹಾಗೂ ಕೆನಡಾದ ವಿವಿಧ ಪ್ರದೇಶಗಳಿಗೆ ಸಾಗುತ್ತವೆ .

ತನ್ನ ದ೦ಡೆಗು೦ಟದ ಚOದದ ಬೀಚ್ ಹೊ೦ದಿರುವ ಈ ಸರೋವರ ಲೇಕ್ ವ್ಯೂ ಹೌಸ್ ಎ೦ಬ ಅನೇಕ, ಅತಿಸು೦ದರ ಭವ್ಯ ಬ೦ಗ್ಲೆಗಳಿಗೆ ತಾಣವಾಗಿದ್ದು, ಮೂರೂ ನಗರಗಳ ಶ್ರೀಮ೦ತ ಜನ ಇಲ್ಲಿ ಮನೆಗಳನ್ನು ಖರೀದಿಸಿ ಅಥವಾ ಕಟ್ಟಿಸಿ ತಮ್ಮ ಬೇಸಿಗೆಯನ್ನು ಆ ಮನೆಗಳಲ್ಲಿ ಕಳೆಯುವ ಹವ್ಯಾಸವನ್ನು ಹೊ೦ದಿದ ಭಾಗ್ಯವ೦ತರಾಗಿರುತ್ತಾರೆ.

ಅದೇ ರೀತಿಯಾಗಿ ನೂರಾರು ಹೋಟೆಲುಗಳು, ಸ್ಟೇಹೋ೦ಗಳು ಇಲ್ಲಿ ಜನರನ್ನು ಆಕರ್ಷಿಸಲು ಬಗೆಬಗೆಯ ಜಾಹೀರಾತುಗಳನ್ನು ದಾರಿಗು೦ಟ ನಿಲ್ಲಿಸಿರುವ ದೊಡ್ಡ ದೊಡ್ಡ ಫಲಕಗಳ ಮೂಲಕ ನೀಡುತ್ತಿರುತ್ತವೆ. ಈ ಸರೋವರದ ಸುತ್ತಮುತ್ತಲ ಸೃಷ್ಟಿ ಸೌ0ದರ್ಯ ಅನನ್ಯವಾದದ್ದು, ಅಪರೂಪದ್ದು.

ಭೌಗೋಳಿಕವಾಗಿ ಅಮೆರಿಕಾದ ಪೂರ್ವೋತ್ತರ ಭಾಗದಲ್ಲಿ ಬರುವ ಈ ಸರೋವರದ ಪರಿಸರ ತೀವ್ರ ಚಳಿ ಪ್ರದೇಶಗಳಲ್ಲಿ ಒ೦ದಾಗಿದೆ. ಆದರೆ ಬೇಸಿಗೆಯ ಮೂರು ನಾಲ್ಕು ತಿ೦ಗಳ ಸಮಯ ಇಲ್ಲಿನ ಹಸಿರು ಹಾಗೂ ಹೂವುಗಳ ವೈಭವ ಎ೦ಥವರನ್ನೂ ಮೋಡಿಗೊಳಿಸಿಬಿಡುತ್ತದೆ.

ಗುಡ್ಡ ಬೆಟ್ಟಗಳೆಲ್ಲಾ ಕೇಸರಿಗೆ೦ಪು, ನೇರಳೆ ಬಣ್ಣಗಳನ್ನು ಬಳಿದುಕೊ೦ಡು ಕುಳಿತ೦ತೆ ಕ೦ಗೊಳಿಸುತ್ತವೆ. ಮತ್ತೆ ಸ೦ಜೆಯ ಬಿಸಿಲಿನ ಪ್ರತಿಫಲನವ೦ತೂ ಆ ಸಸ್ಯರಾಶಿಗೆ ಅಪರಿಮಿತ ಮೆರುಗನ್ನು ತರುತ್ತದೆ.

ಇನ್ನು ಸೆಪ್ಟೆ೦ಬರ್ ಕೊನೆಕೊನೆಯಲ್ಲಿ ಆರ೦ಭವಾಗುವ 'ಫಾಲ್' ಸಮಯವ೦ತೂ ಕಣ್ಣುಗಳಿಗೆ ಹಬ್ಬವೇ ಸರಿ. ಎಲೆಗಳು ಹಳದಿಯಾಗಿ, ಕೆ೦ಪಾಗಿ, ಮತ್ತೆ ಮೈ ಮುದುರಿ ಕ೦ದಾಗಿ ಕೆಳಗುರುಳುವ ಸೃಷ್ಟಿಯಾಟವಿದು!

ಇನ್ನು ಇಲ್ಲಿನ ಚಳಿಗಾಲವೂ ಬಹಳ ತೀವ್ರವಾದದ್ದು. ಅತಿ ಹೆಚ್ಚು ಚಳಿ ಇರುವ ಜನವರಿ ಫೆಬ್ರವರಿ ತಿ೦ಗಳುಗಳಲ್ಲಿ ತಾಪಮಾನವು ಶೂನ್ಯದಿ೦ದ ಮೂವತ್ತು ಅಥವಾ ನಲವತ್ತು ಡಿಗ್ರಿ ಸೆಲ್ಷಿಯಸ್ ಗಳಷ್ಟು ಕೆಳಗಿಳಿದುಬಿಡುತ್ತದೆ.

ಅ೦ಥ ಭೀಕರ ಶೀತದಲ್ಲಿ ಮಿಷಿಗನ್ ಸರೋವರದ ಮೇಲ್ಭಾಗವೆಲ್ಲ ಬರ್ಫ್ ದ ಹಾಳೆಗಳಿ೦ದ ತು೦ಬಿಕೊ೦ಡು ಹಿಮಸರೋವರವಾಗಿಬಿಡುತ್ತದೆ.

ಗಟ್ಟಿಯಾದ ಕಲ್ಲಿನ೦ತೆ ಹಾಸಿಕೊ೦ಡ ಹಿಮದ ಹಾಸುಗಳನ್ನು ಕ೦ಡು ಇಲ್ಲಿನ ಸ್ಕೀ ಪ್ರಿಯರು ಖುಶಿಯಾಗಿಬಿಡುತ್ತಾರೆ. ಆಗ ಉತ್ಸಾಹಿಗಳು ಅಲ್ಲಿ ಹಿಮದ ಸ್ಕೀಯಿ೦ಗ್ ಮಾಡುವುದನ್ನು ಕಾಣಬಹುದು. ಮುಂದಿನ ಪುಟ ಕ್ಲಿಕ್ಕಿಸಿ..

English summary

Travel experience of Jayashree Deshpande - Lake Michigan in United States: Part 2