ಕಲರ್ಸ್ ಕನ್ನಡ ವಾಹಿನಿ ಇತಿಹಾಸದಲ್ಲೇ ಗಿಲ್ಲಿ ಹೊಸ ದಾಖಲೆ; ಅರೇ, ಏನ್ ಕ್ರೇಜ್ ಗುರೂ

ಬಿಗ್‌ಬಾಸ್ ಕನ್ನಡ ಸೀಸನ್ 12ರ ಗ್ರ್ಯಾಂಡ್ ಫಿನಾಲೆಗೆ ಇನ್ನೆರಡು ದಿನ ಬಾಕಿಯಿದೆ. ಈ ಬಾರಿ ಗಿಲ್ಲಿ ಟ್ರೋಫಿ ಗೆಲ್ಲೋದು ಪಕ್ಕಾ ಎನ್ನುವ ಚರ್ಚೆ ಜೋರಾಗಿದೆ. ಸೋಶಿಯಲ್ ಮೀಡಿಯಾದಲ್ಲಿ ಗಿಲ್ಲಿ ದರ್ಬಾರ್ ಜೋರಾಗಿದೆ. ಅಭಿಮಾನಿಗಳು ಆತನ ಭಾವಚಿತ್ರವನ್ನು ಮೈಮೇಲೆ ಟ್ಯಾಟೂ ಹಾಕಿಸಿಕೊಳ್ಳುತ್ತಿದ್ದಾರೆ. ಹಿಂದಿನ ಯಾವುದೇ ಸೀಸನ್ ಸ್ಪರ್ಧಿಗಳಿಗೆ ಕೂಡ ಈ ಪಾಟಿ ಕ್ರೇಜ್ ಇರಲಿಲ್ಲ.

ಗಾಡಿಗಳ ಮೇಲೆ ಗಿಲ್ಲಿ ಫೋಟೊಗಳು ರಾರಾಜಿಸುತ್ತಿದೆ. ಗಿಲ್ಲಿಗೆ ವೋಟ್ ಮಾಡಿ ಎಂದು ಅಭಿಮಾನಿಗಳು ಪ್ರಚಾರ ಮಾಡುತ್ತಿದ್ದಾರೆ. ಗಿಲ್ಲಿಗೆ ವೋಟ್ ಮಾಡಿ ಎಂದು ಮಂಡ್ಯ ಜಿಲ್ಲೆ ಮಳವಳ್ಳಿ ಕ್ಷೇತ್ರದ ಶಾಸಕ ನರೇಂದ್ರ ಸ್ವಾಮಿ ಜನರಲ್ಲಿ ಮನವಿ ಮಾಡಿದ್ದಾರೆ. ಟಾಸ್ಕ್‌ಗಳ ವಿಚಾರದಲ್ಲಿ ಗಿಲ್ಲಿ ಪ್ರಬಲ ಸ್ಪರ್ಧಿ ಏನೂ ಅಲ್ಲ. ಆದರೆ ಮಾತಿನಲ್ಲೇ ಎಲ್ಲರನ್ನು ಮರಳು ಮಾಡಿ ಮೋಡಿ ಮಾಡುತ್ತಿರುವುದು ಗೊತ್ತೇಯಿದೆ. ತಮ್ಮ ಕಾಮಿಡಿ ಟೈಮಿಂಗ್‌ ಮೂಲಕ ಕಮಾಲ್ ಮಾಡಿದ್ದಾರೆ. ಬರೀ ಮಾತಲ್ಲೇ ಎದುರಾಳಿಗಳನ್ನೆಲ್ಲಾ ಎದುರಿಸಿ ಗೆದ್ದಿದ್ದಾರೆ.

ಸದ್ಯ ಫಿನಾಲೆಗೆ 6 ಮಂದಿ ಎಂಟ್ರಿ ಕೊಟ್ಟಿದ್ದಾರೆ. ಧ್ರುವಂತ್ ಮಿಡ್‌ ವೀಕ್ ಎಲಿಮಿನೇಷನ್ ಆಗಿ ಹೊರ ಬಂದಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಗಿಲ್ಲಿ ಕ್ರೇಜ್ ಹೆಚ್ಚುತ್ತಲೇ ಇದೆ. ಈಗಾಗಲೇ ಇನ್‌ಸ್ಟಾಗ್ರಾಮ್‌ನಲ್ಲಿ ಒಂದು ಮಿಲಿಯನ್‌ಗೂ ಹೆಚ್ಚು ಫಾಲೋವರ್ಸ್ ಸಂಪಾದಿಸಿದ್ದಾರೆ. ಬಿಗ್‌ಬಾಸ್ ಮನೆಗೆ ಹೋಗುವ ಮುನ್ನ ಗಿಲ್ಲಿ ಇನ್‌ಸ್ಟಾಗ್ರಾಮ್‌ನಲ್ಲಿ 1 ಲಕ್ಷ ಫಾಲೋವರ್ಸ್ ಮಾತ್ರ ಇದ್ದರು. ಆದರೆ ಈಗ ಬರೋಬ್ಬರಿ 10 ಲಕ್ಷಕ್ಕೂ ಹೆಚ್ಚು ಫಾಲೋವರ್ಸ್ ಸಿಕ್ಕಿದ್ದಾರೆ. ಇನ್ನೊಂದು ತಿಂಗಳಲ್ಲಿ 2 ಮಿಲಿಯನ್ ದಾಟಬಹುದು ಎಂದು ಕೆಲವರು ಅಂದಾಜಿಸುತ್ತಿದ್ದಾರೆ. ಇದೀಗ ಕಲರ್ಸ್ ಕನ್ನಡ ವಾಹಿನಿ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಗಿಲ್ಲಿ ದರ್ಬಾರ್ ಜೋರಾಗಿದೆ.

ಎಪಿಸೋಡ್‌ಗೆ ಸಂಬಂಧಿಸಿದಂತೆ ಕಲರ್ಸ್ ಕನ್ನಡ ಸ್ಪೆಷಲ್ ಪ್ರೋಮೊಗಳನ್ನು ಹಂಚಿಕೊಳ್ಳುತ್ತದೆ. ಅದರಲ್ಲಿ ಗಿಲ್ಲಿ ಕಾಣಿಸಿಕೊಂಡ ಪ್ರೋಮೊಗಳು ಸಿಕ್ಕಾಪಟ್ಟೆ ವೈರಲ್ ಆಗುತ್ತದೆ. ಇತ್ತೀಚೆಗೆ ಮನೆ ಒಳಗೆ ಒಂದಷ್ಟು ಅಭಿಮಾನಿಗಳು ಹೋಗಿದ್ದರು. ಅವರ ಬಳಿಕ ವೋಟ್ ಮಾಡುವಂತೆ ಗಿಲ್ಲಿ ಮನವಿ ಮಾಡಿದ್ದರು. ಅದಕ್ಕೆ ಸಂಬಂಧಿಸಿದ ಪ್ರೋಮೊ 1 ಮಿಲಿಯನ್(10 ಲಕ್ಷ) ಲೈಕ್ಸ್ ಗಿಟ್ಟಿಸಿದೆ. ಅದು ಕೂಡ ಕೆಲವೇ ಗಂಟೆಗಳಲ್ಲಿ ಅನ್ನೋದು ವಿಶೇಷ. ಈ ಹಿಂದೆ ಫ್ಯಾಮಿಲಿ ರೌಂಡ್‌ನಲ್ಲಿ ಗಿಲ್ಲಿ ತಂದೆ, ತಾಯಿ ಮನೆ ಒಳಗೆ ಹೋಗಿದ್ದರು. ಅದಕ್ಕೆ ಸಂಬಂಧಿಸಿದ ಪ್ರೋಮೊ ಸಹ 1 ಮಿಲಿಯನ್ ಲೈಕ್ಸ್ ಸಾಧಿಸಿತ್ತು. ಗಿಲ್ಲಿ ಕ್ರೇಜ್ ಹೇಗಿದೆ ಎನ್ನುವುದು ಇದರಲ್ಲೇ ಗೊತ್ತಾಗುತ್ತೆ ಎಂದು ಅಭಿಮಾನಿಗಳು ಕಾಮೆಂಟ್ ಮಾಡುತ್ತಿದ್ದಾರೆ.

ಈ ಹಿಂದೆ ಸುದೀಪ್ ಅವರನ್ನು ಗಿಲ್ಲಿ ಇಮಿಟೇಟ್ ಮಾಡಿದ್ದ ಪ್ರೋಮೊ ಕೂಡ ಸಖತ್ ಸದ್ದು ಮಾಡಿತ್ತು. ಅದು ಕೂಡ 1 ಮಿಲಿಯನ್ ಲೈಕ್ಸ್ ಗಿಟ್ಟಿಸಿತ್ತು. ಅಂದರೆ ಗಿಲ್ಲಿಯ 3 ಪ್ರೋಮೊಗಳು 1 ಮಿಲಿಯನ್ ಲೈಕ್ಸ್ ಗಿಟ್ಟಿಸಿದಂತಾಗಿದೆ. ನಿಜಕ್ಕೂ ಇದು ಅಚ್ಚರಿ ಮೂಡಿಸುವುದು ಸಹಜ. ಗಿಲ್ಲಿ ಕ್ರೇಜ್ ಯಾವ ಮಟ್ಟಿಗಿದೆ ಎನ್ನುವುದು ಇದರಲ್ಲೇ ಗೊತ್ತಾಗ್ತಿದೆ. ಗಿಲ್ಲಿ ಹೈಲೆಟ್ ಆಗುವ ಪ್ರೊಮೊಗಳನ್ನು ಅಭಿಮಾನಿಗಳು ಪದೇ ಪದೆ ವೀಕ್ಷಿಸುತ್ತಾರೆ. ಹಾಗಾಗಿ ಭರ್ಜರಿ ವೀವ್ಸ್, ಲೈಕ್ಸ್ ಕೂಡ ಸಿಗುತ್ತಿದೆ.

ಗಿಲ್ಲಿ ಬಿಗ್‌ಬಾಸ್ ಟ್ರೋಫಿ ಗೆಲ್ಲಬೇಕು ಎಂದು ಅಭಿಮಾನಿಗಳು ದೇವರಲ್ಲಿ ಪ್ರಾರ್ಥನೆ ಮಾಡುತ್ತಿದ್ದಾರೆ. 'ಡೆವಿಲ್' ಚಿತ್ರದಲ್ಲಿ ಗಿಲ್ಲಿ ನಟಿಸಿದ್ದು ಗೊತ್ತೇಯಿದೆ. ಅವರು ನಟನೆಯ ಮತ್ತೆರಡು ಸಿನಿಮಾ ಬಿಡುಗಡೆಗೆ ಸಜ್ಜಾಗುತ್ತಿದೆ. ಬಿಗ್‌ಬಾಸ್ ಮನೆಯಿಂದ ಹೊರಬಂದ ಬಳಿಕ ಸಾಕಷ್ಟು ಅವಕಾಶಗಳು ಸಿಗುವುದರಲ್ಲಿ ಎರಡು ಮಾತಿಲ್ಲ. ಇನ್‌ಸ್ಟಾಗ್ರಾಮ್‌ನಲ್ಲಿರುವ 1 ಮಿಲಿಯನ್ ಫಾಲೋವರ್ಸ್‌ ಕಾರಣಕ್ಕೆ ಮುಂದೆ ಗಿಲ್ಲಿ ಒಳ್ಳೆ ಆದಾಯ ಸಂಪಾದಿಸಬಹುದು ಎನ್ನುವ ಚರ್ಚೆ ಶುರುವಾಗಿದೆ.

Credit: Filmibeat