ಕೊರೊನಾ ಸಾವಿನ ಸಂಖ್ಯೆ: ರಾಜಧಾನಿ ಬೆಂಗಳೂರನ್ನು ಮೀರಿಸುತ್ತಿರುವ ರಾಜ್ಯದ ಈ ನಗರ

Published: Wednesday, June 16, 2021, 11:35 [IST]

ಮೈಸೂರು, ಜೂನ್ 16: ಕೊರೊನಾ ಎರಡನೇ ಅಲೆಯ ಆರ್ಭಟ ದಿನದಿಂದ ದಿನಕ್ಕೆ ಕಮ್ಮಿಯಾಗುತ್ತಿದೆ. ಆಸ್ಪತ್ರೆಯಿಂದ ಬಿಡುಗಡೆಯಾಗುತ್ತಿರುವವರ ಸಂಖ್ಯೆ ಗಣನೀಯ ಪ್ರಮಾಣದಲ್ಲಿ ಏರಿಕೆಯಾಗುತ್ತಿದೆ. ಜೊತೆಗೆ, ಮೃತ ಪಡುತ್ತಿರುವವರ ಸಂಖ್ಯೆಯೂ ಇಳಿಮುಖವಾಗುತ್ತಿದೆ.

ಹನ್ನೊಂದು ಜಿಲ್ಲೆಗಳನ್ನು ಹೊರತು ಪಡಿಸಿ ರಾಜ್ಯವನ್ನು ಅನ್ ಲಾಕ್ - 1 ಮಾಡಿರುವುದರಿಂದ ಜನಜೀವನ ಮತ್ತು ವಾಣಿಜ್ಯ ಚಟುವಟಿಕೆಗಳು ನಿಧಾನವಾಗಿ ಸರಿದಾರಿಗೆ ಬರುತ್ತಿದೆ. ಮುಂದಿನ ವಾರ ಇನ್ನಷ್ಟು ಸಡಿಲಿಕೆ ಸಿಗುವ ಸಾಧ್ಯತೆಯಿದೆ.

ಇನ್ನು, ಒಟ್ಟಾರೆಯಾಗಿ ದೇಶದಲ್ಲೂ ಕೊರೊನಾ ಹೊಸ ಸೋಂಕಿತರ ಸಂಖ್ಯೆ 62ಸಾವಿರದ ಆಸುಪಾಸಿಗೆ ಬಂದು ನಿಂತಿದೆ. ಮಂಗಳವಾರ (ಜೂನ್ 15) ಒಂದೇ ದಿನ 1.07ಲಕ್ಷ ಜನ ಆಸ್ಪತ್ರೆಯಿಂದ ಬಿಡುಗಡೆ ಹೊಂದಿರುವುದು ನೆಮ್ಮದಿಯ ವಿಚಾರ.

ರಾಜ್ಯದಲ್ಲಿ ಸಾವಿನ ಸಂಖ್ಯೆ ಸತತವಾಗಿ 130ರೊಳಗೆ ಇದೆ. ರಾಜಧಾನಿ ಬೆಂಗಳೂರಿನಲ್ಲಿ ಒಂದು ವಾರದ ಹಿಂದೆ ಐವತ್ತರ ಸಂಖ್ಯೆಯಲ್ಲಿದ್ದ ಸಾವಿನ ಪ್ರಮಾಣ ಈಗ ಇಪ್ಪತ್ತರ ಕೆಳಗೆಯಿದೆ. ಆದರೆ, ಬೆಂಗಳೂರಿಗಿಂತಲೂ ಹೆಚ್ಚು ಸಾವು ಸಾಂಸ್ಕೃತಿಕ ನಗರಿಯಲ್ಲಿ ವರದಿಯಾಗುತ್ತಿದೆ.

ಬಿಬಿಎಂಪಿ ಆಯುಕ್ತರು ಈ ಹಿಂದೆ ಹೇಳಿದಂತೆ, ಹಳೆಯ ಸಾವಿನ ಸಂಖ್ಯೆ ಸೇರ್ಪಡೆ?

ಸತತವಾಗಿ ಕಳೆದ ಮೂರು ದಿನಗಳಿಂದ ಬೆಂಗಳೂರಿಗಿಂತಲೂ ಹೆಚ್ಚು ಸಾವು ಮೈಸೂರಿನಲ್ಲಿ ವರದಿಯಾಗುತ್ತಿದೆ. ಹೊಸ ಸೋಂಕಿತರ ಸಂಖ್ಯೆ ನಿಯಂತ್ರಣದಲ್ಲಿದ್ದರೂ ಮೃತ ಪಡುತ್ತಿರುವವರ ಸಂಖ್ಯೆ ಬೆಂಗಳೂರಿಗಿಂತಲೂ ಜಾಸ್ತಿಯಿದೆ. ಬಿಬಿಎಂಪಿ ಆಯುಕ್ತರು ಈ ಹಿಂದೆ ಹೇಳಿದಂತೆ, ಅಲ್ಲೂ ಹಳೆಯ ಸಾವಿನ ಸಂಖ್ಯೆಯನ್ನು ಈಗ ಸೇರಿಸಲಾಗುತ್ತಿದೆಯಾ ಎನ್ನುವುದು ತಿಳಿಯಬೇಕಾಗಿದೆ.