ಕಂಬಳ ಕೂಟದ ರಣರೋಚಕ ಓಟ: ಬಿದ್ದರೂ ಹಗ್ಗ ಬಿಡದೆ ಸ್ವರ್ಣ ಪದಕಕ್ಕೆ ಮುತ್ತಿಕ್ಕಿದ ಓಟಗಾರ

By ಮಂಗಳೂರು ಪ್ರತಿನಿಧಿ

Published: Tuesday, January 3, 2023, 8:41 [IST]

ಮಂಗಳೂರು, ಜನವರಿ 3: ಕರಾವಳಿಯಲ್ಲಿ ನಡೆಯುತ್ತಿರುವ ಕಂಬಳ ಕೂಟ ಹೊಸ ಕ್ರೇಜ್ ಹುಟ್ಟು ಹಾಕಿದೆ. ಭಾನುವಾರ ನಡೆದ ಮೂಲ್ಕಿ ಸೀಮೆಯ ಅರಸು ಕಂಬಳದ ಫೈನಲ್ ಹಣಾಹಣಿ ರಣರೋಚಕ ಕ್ಷಣಕ್ಕೆ ಸಾಕ್ಷಿಯಾಗಿದೆ.

ಹಗ್ಗ ಹಿರಿಯ ವಿಭಾಗದ ಫೈನಲ್ ಓಟದಲ್ಲಿ ಕೆಸರು ಗದ್ದೆಯಲ್ಲಿ ಕಂಬಳ ಓಟಗಾರ ಆಯತಪ್ಪಿ ಬಿದ್ದರೂ ಕೋಣದ ಹಗ್ಗ ಬಿಡದೇ ಶರವೇಗದ ಕೋಣಗಳ ಜೊತೆ ಹೊರಳಾಡುತ್ತಾ ಗುರಿಮುಟ್ಟಿ ಚಿನ್ನದಪದಕ ಗೆದ್ದಿದ್ದಾರೆ.

ಕಂಬಳದ ಇತಿಹಾಸದಲ್ಲೇ ಫೈನಲ್ ಪಂದ್ಯದ ರೋಮಾಂಚಕಾರಿ ಕ್ಷಣ ಇದಾಗಿದ್ದು, ಕಂಬಳ ಪ್ರೇಮಿಗಳು ಓಟಗಾರನ ಕ್ಷಮತೆಗೆ ಬಲೇ ಶಹಬ್ಬಾಸ್ ಅಂದಿದ್ದಾರೆ.

ಕೊನೆಯ ಪಂದ್ಯದಲ್ಲಿ ರೋಚಕ ಘಟನೆ

ಮೂಲ್ಕಿ ಸೀಮೆಯ ಅರಸು ಕಂಬಳವಾದ ಮೂಲ್ಕಿಯ ಮೂಡಾಯಿ-ಪಡ್ಡಾಯಿ ಜೋಡುಕರೆ ಕಂಬಳದ ಭಾನುವಾರದ ಹಗ್ಗ ಹಿರಿಯ ವಿಭಾಗದ ಫೈನಲ್ ಕಣ ಎರಡು ಬಲಿಷ್ಠ ತಂಡಗಳ ನಡುವೆ ಏರ್ಪಟ್ಟಿತ್ತು. ಮೂಡಾಯಿ ಕಂಬಳದ ಕರೆಯಲ್ಲಿ ಪದವು ಕಾನಡ್ಕ ಫ್ಲೇವಿ ಡಿಸೋಜಾ ಅವರ ಕೋಣಗಳು ನಿಂತಿದ್ದರೆ, ಪಡ್ಡಾಯಿ ಕರೆಯಲ್ಲಿ ನಂದಳಿಕೆ ಶ್ರೀಕಾಂತ್ ಭಟ್ಟರ ಕೋಣಗಳು ನಿಂತಿದ್ದವು. ಕಿಕ್ಕಿರಿದ್ದು ಸೇರಿದ್ದ ಕಂಬಳ ಅಭಿಮಾನಿಗಳು ಎರಡು ಬಲಿಷ್ಠ ತಂಡಗಳ ಫೈನಲ್ ಹಣಾಹಣಿಯತ್ತ ದೃಷ್ಟಿ ಹಾಯಿಸಿದ್ದರು.

ಬಿದ್ದರೂ ಛಲ ಬಿಡದ ವಂದಿತ್‌ ಶೆಟ್ಟಿ

ಫ್ಲಾಗ್ ಎತ್ತುತ್ತಿದ್ದಂತೆಯೇ ಕಂಬಳ ಕೋಣಗಳು ಶರವೇಗದ ಓಟಕ್ಕೆ ಮುಂದಾಗಿದೆ. ಪದವು ಕಾನಡ್ಕದ ಮುನ್ನೆ-ಗಂತು ಕೋಣ ಕೆಸರು ಕರೆಯಲ್ಲಿ ಮಿಂಚಿನ ಹೆಜ್ಜೆಯನ್ನಿಟ್ಟರೆ,ಇತ್ತ ನಂದಳಿಕೆ ಕುಟ್ಟಿ-ರಾಜಾ ಕೋಣಗಳೂ ಗಾಳಿಯ ವೇಗದಲ್ಲಿ ಓಟ ಆರಂಭಿಸಿದ್ದವು. 130 ಮೀಟರ್ ಉದ್ದದ ಕಂಬಳದ ಕರೆಯಲ್ಲಿ ನಂದಳಿಕೆಯ ಕೋಣವನ್ನು ಓಡಿಸುತ್ತಿದ್ದ ಯುವ ಕಂಬಳ ಓಟಗಾರ ಬಂಬ್ರಾಣಬೈಲು ವಂದಿತ್ ಶೆಟ್ಟಿ 80 ಮೀಟರ್‌ವರೆಗೆ ಕೋಣದ ಹಗ್ಗ ಹಿಡಿದೇ ಓಡಿದ್ದರು. ಆದರೆ ಆ ಸಂಧರ್ಭದಲ್ಲಿ ಎಡವಿದ ಅವರು, ಕೆಸರು ಗದ್ದೆಯಲ್ಲಿ ಬಿದ್ದಿದ್ದಾರೆ. ಬಿದ್ದರೂ ಹಗ್ಗವನ್ನು ಬಿಡದ ವಂದಿತ್ ಶೆಟ್ಟಿ, ಶರವೇಗದಲ್ಲೂ ಕೆಸರಿನಲ್ಲೇ ಹೊರಳಾಡಿ ಹಗ್ಗ ಬಿಗಿ ಹಿಡಿದು‌ 11.50 ಸೆಕೆಂಡ್‌ನಲ್ಲಿ ಗುರಿ ತಲುಪಿದ್ದಾರೆ. ಈ ಮೂಲಕ ರೋಚಕ ಫೈನಲ್ ಪಂದ್ಯದಲ್ಲಿ ಕೋಣಗಳ ಯಜಮಾನನಿಗೆ ಸ್ವರ್ಣ ಪದಕದ ಗೌರವ ಕೊಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಕಂಬಳದ ರೋಮಾಂಚನಕಾರಿ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್

ಎರಡು ವರ್ಷದಿಂದ ಕಂಬಳದಲ್ಲಿ ಕೋಣಗಳನ್ನು ಓಡಿಸುತ್ತಿರುವ ವಂದಿತ್ ಶೆಟ್ಟಿಗೆ ಕೋಣಗಳ ಯಜಮಾನ ಶ್ರೀಕಾಂತ್ ಭಟ್ ರವರೇ ತರಬೇತಿ ಕೊಡಿಸಿದ್ದರು. ಮೂಲ್ಕಿ ಕಂಬಳದ ಫೈನಲ್ ಪಂದ್ಯದ ರೋಮಾಂಚನಕಾರಿ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಕಂಬಳ ಪ್ರಿಯರು ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.

ಓಟಗಾರ ಬಿದ್ದರೂ, ಹಗ್ಗ ಬಿಟ್ಟರೂ ಕೋಣಗಳು ತಮ್ಮ ಗುರಿ ಮುಟ್ಟಿದ ಅನೇಕ ಘಟನೆಗಳು ನಡೆದಿದೆ. ಬಿದ್ದರೂ ಹಗ್ಗ ಬಿಡದೇ ಓಟಗಾರ ಕೊನೆಯವರೆಗೆ ಕೆಸರಲ್ಲೇ ಹೊರಳಿ ಬಂದ ಘಟನೆಗಳೂ ನಡೆದಿದೆ. ಆದರೆ ಫೈನಲ್ ಪಂದ್ಯದಲ್ಲಿ ಈ ರೀತಿಯ ಸನ್ನಿವೇಶ ನಡೆದಿರುವುದು ಇದೇ ಮೊದಲಾಗಿದೆ. ಕಂಬಳದಲ್ಲಿ ಓಡುವ ಕೋಣಗಳು ಯಜಮಾನ ಸಾಕಿದ ಋಣವನ್ನು ಮೈ ಚಳಿ ಬಿಟ್ಟು ಓಡಿ ಪದಕ ಗೆಲ್ಲುವ ಮೂಲಕ ತೀರಿಸಿದ ಆನೇಕ ಘಟನೆಗಳೂ ಕಂಬಳ ಕೂಟದಲ್ಲಿ ನಡೆದಿದೆ..