ಉಡುಪಿಯ ನೇಹಾ ಶೆಟ್ಟಿ ಇದೀಗ ಬ್ಯಾಡ್ಮಿಂಟನ್ ಮಿನುಗುತಾರೆ

By ಐಸಾಕ್ ರಿಚರ್ಡ್, ಮಂಗಳೂರು

Updated: Monday, October 5, 2015, 13:53 [IST]

ಉಡುಪಿ, ಅಕ್ಟೋಬರ್, 05 : ಹನ್ನೆರಡು ವರ್ಷದ ಉಡುಪಿ ಮೂಲದ ನೇಹಾ ಶೆಟ್ಟಿ ಕ್ರೀಡಾಲೋಕದ ಬ್ಯಾಡ್ಮಿಂಟನ್ ನಲ್ಲಿ ಹಲವಾರು ಉನ್ನತ ಮಟ್ಟದ ಪ್ರಶಸ್ತಿಗಳನ್ನು ಗಳಿಸಿ ತುಳು ಕನ್ನಡಿಗರು ಹೆಮ್ಮೆ ಪಡುವಂತೆ ಮಾಡಿದ್ದಾರೆ.

ನೇಹಾ ಉಡುಪಿಯ ವಳಕಾಡಿನ ಮೂಲ ನಿವಾಸಿಯಾಗಿದ್ದ ನರೇಶ್ ಶೆಟ್ಟಿ ಹಾಗೂ ವಿಜಯಾ ಎನ್. ಶೆಟ್ಟಿ ಅವರ ಮಗಳು. ಪ್ರಸ್ತುತ ದೋಹಾ ಕತಾರ್ ನಲ್ಲಿ ನೆಲೆಸಿದ ನೇಹಾ ಪ್ರಸಕ್ತ ಡಿಪಿಎಸ್-ಎಂಪಿಎಸ್ ಶಾಲೆಯಲ್ಲಿ 7ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದು, ಶಾಲೆಗೆ ಹಲವಾರು ಪ್ರಶಸ್ತಿಗಳನ್ನು ತಂದುಕೊಟ್ಟು ಶಿಕ್ಷಕರ ಮೆಚ್ಚುಗೆಗೆ ಪಾತ್ರಳಾಗಿದ್ದಾಳೆ.[ಉದ್ಯಾನಗರಿಯಲ್ಲಿ ಕಮರಿಹೋಗುತ್ತಿದೆಯಾ ಆಟದ ಕನಸು?]

Emerging Badminton player Udupi origin Neha shetty

ಸಾಧಕಿ ನೇಹಾ ಶೆಟ್ಟಿ 2014 ರಿಂದ ಖತಾರ್ ಬ್ಯಾಡ್ಮಿಂಟನ್ ಅಸೋಸಿಯೇಷನ್ ನಲ್ಲಿ ಮನೋಜ್ ಶಹಿಬ್ಜನ್ ಅವರಿಂದ ತರಬೇತಿ ಪಡೆಯುತ್ತಿದ್ದಾರೆ. ನಾಡಿಗೆ ಇನ್ನಷ್ಟು ಪ್ರಶಸ್ತಿ ತಂದುಕೊಡುವ ಹುಮ್ಮಸ್ಸಿನಲ್ಲಿರುವ ನೇಹಾ ಇದೇ ಮೊದಲ ಬಾರಿ ಖತಾರ್ ನಿಂದ ಬೇರೆಡೆ ನಡೆದ ಜಿಸಿಸಿ ಮಟ್ಟದ ಪಂದ್ಯಾವಳಿಯಲ್ಲಿ ಭಾಗವಹಿಸಿ ಯಶಸ್ಸು ಗಳಿಸಿದ್ದಾಳೆ.

ಯಶಸ್ಸು ಪಡೆದ ಸಂತಸದಲ್ಲಿರುವ ನೇಹಾ,' ಇದು ನನ್ನ ಜೀವನದ ಒಂದು ಅಮೂಲ್ಯ ಹಂತ. ನನ್ನ ಈ ಯಶಸ್ಸಿಗೆ ಹೆತ್ತವರು, ಗುರು-ಹಿರಿಯರ ಆಶೀರ್ವಾದ ಹಾಗೂ ಸ್ನೇಹಿತರ ಶುಭ ಹಾರೈಕೆಗಳೇ ಕಾರಣ' ಎಂದು ಮನತುಂಬಿ ನುಡಿಯುತ್ತಾಳೆ.