ಆಸ್ಟ್ರೇಲಿಯಾದಲ್ಲಿ ಓದುತ್ತಿರುವ ವಿದ್ಯಾರ್ಥಿಗಳಿಗೆ ಗುಡ್ ನ್ಯೂಸ್: 'ಏಜೆಂಟ್ ಕಮಿಷನ್' ದಂಧೆಗೆ ಬಿತ್ತು ಬ್ರೇಕ್
ಆಸ್ಟ್ರೇಲಿಯಾ: ಉನ್ನತ ವ್ಯಾಸಂಗಕ್ಕಾಗಿ ಆಸ್ಟ್ರೇಲಿಯಾಕ್ಕೆ ತೆರಳುವ ಲಕ್ಷಾಂತರ ಭಾರತೀಯ ವಿದ್ಯಾರ್ಥಿಗಳಿಗೆ ಇದೊಂದು ಮಹತ್ವದ ಸುದ್ದಿಯಾಗಿದೆ. ಆಸ್ಟ್ರೇಲಿಯಾದ ಶಿಕ್ಷಣ ವಲಯದಲ್ಲಿ ನಡೆಯುತ್ತಿದ್ದ ಅಕ್ರಮಗಳಿಗೆ ಮತ್ತು ವಿದ್ಯಾರ್ಥಿಗಳನ್ನು ದಾರಿ ತಪ್ಪಿಸುವ ಪದ್ಧತಿಗೆ ಅಲ್ಲಿನ ಸರ್ಕಾರ ಕಠಿಣ ಕಡಿವಾಣ ಹಾಕಿದೆ. ಇನ್ನು ಮುಂದೆ, ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ಒಂದು ಕಾಲೇಜಿನಿಂದ ಮತ್ತೊಂದು ಕಾಲೇಜಿಗೆ ವರ್ಗಾವಣೆಯಾದರೆ, ಅದಕ್ಕಾಗಿ ಶಿಕ್ಷಣ ಏಜೆಂಟ್ಗಳಿಗೆ ಯಾವುದೇ ರೀತಿಯ 'ಕಮಿಷನ್' ನೀಡುವುದನ್ನು ನಿಷೇಧಿಸಲಾಗಿದೆ.
ಆಲ್ಬನೀಸ್ (Albanese) ನೇತೃತ್ವದ ಸರ್ಕಾರವು ಈ ಮಹತ್ವದ ಆದೇಶವನ್ನು ಹೊರಡಿಸಿದ್ದು, ಶಿಕ್ಷಣ ವ್ಯವಸ್ಥೆಯಲ್ಲಿನ ಭ್ರಷ್ಟಾಚಾರ ಮತ್ತು ಅನಗತ್ಯ ಸ್ಪರ್ಧೆಯನ್ನು ತಡೆಯಲು ಈ ಕ್ರಮ ಕೈಗೊಂಡಿದೆ.
ಏನಿದು ಹೊಸ ನಿಯಮ?
ಹೊಸ ನೀತಿಯ ಪ್ರಕಾರ, ವಿದ್ಯಾರ್ಥಿಯೊಬ್ಬ ಆಸ್ಟ್ರೇಲಿಯಾದಲ್ಲಿ ತನ್ನ ಕೋರ್ಸ್ ಅಂದರೆ ವ್ಯಾಸಂಗವನ್ನು ಪ್ರಾರಂಭಿಸಿದ ನಂತರ, ಆತನನ್ನು ಆ ಶಿಕ್ಷಣ ಸಂಸ್ಥೆಯಿಂದ ಬೇರೆ ಸಂಸ್ಥೆಗೆ ವರ್ಗಾವಣೆ ಮಾಡಿದರೆ, ಆ ಹೊಸ ಸಂಸ್ಥೆಯು ಏಜೆಂಟ್ಗೆ ಕಮಿಷನ್ ನೀಡುವಂತಿಲ್ಲ. ಇಲ್ಲಿಯವರೆಗೆ, ಕೆಲವು ಏಜೆಂಟ್ಗಳು ಕಮಿಷನ್ ಹಣದ ಆಸೆಗಾಗಿ ವಿದ್ಯಾರ್ಥಿಗಳನ್ನು ಒತ್ತಾಯಪೂರ್ವಕವಾಗಿ ಅಥವಾ ತಪ್ಪು ಮಾಹಿತಿ ನೀಡಿ ಒಂದು ಕಾಲೇಜಿನಿಂದ ಮತ್ತೊಂದು ಕಾಲೇಜಿಗೆ ಬದಲಾಯಿಸುತ್ತಿದ್ದರು. ಇದನ್ನು 'ಪೋಚಿಂಗ್' ಎಂದು ಕರೆಯಲಾಗುತ್ತಿತ್ತು. ಆದರೆ ಇನ್ನು ಮುಂದೆ ಇದಕ್ಕೆ ಅವಕಾಶವಿರುವುದಿಲ್ಲ.
ಆದರೆ, ಈಗಾಗಲೇ ಮಾಡಿಕೊಂಡಿರುವ ಒಪ್ಪಂದಗಳಿಗೆ ಕಾಲಾವಕಾಶ ನೀಡಲಾಗಿದ್ದು, ಮಾರ್ಚ್ 31, 2026 ರೊಳಗೆ ಹೊಸ ಸಂಸ್ಥೆಗೆ ಸೇರ್ಪಡೆಯಾಗುವ ವಿದ್ಯಾರ್ಥಿಗಳ ವಿಷಯದಲ್ಲಿ ಹಳೆಯ ನಿಯಮಗಳೇ ಅನ್ವಯವಾಗಲಿವೆ ಎಂದು ಪ್ರಕಟಣೆ ತಿಳಿಸಿದೆ.
ಸರ್ಕಾರದ ಉದ್ದೇಶವೇನು?
ಅಂತರರಾಷ್ಟ್ರೀಯ ಶಿಕ್ಷಣ ಖಾತೆ ಸಹಾಯಕ ಸಚಿವ ಜೂಲಿಯನ್ ಹಿಲ್ ಅವರು ಈ ಬಗ್ಗೆ ಮಾತನಾಡುತ್ತಾ, "ನಾವು ವಿದ್ಯಾರ್ಥಿಗಳ ಹಿತಾಸಕ್ತಿಗೆ ಮೊದಲ ಆದ್ಯತೆ ನೀಡುತ್ತಿದ್ದೇವೆ. ಕೆಲವು ಏಜೆಂಟ್ಗಳು ತಮ್ಮ ಲಾಭಕ್ಕಾಗಿ ವಿದ್ಯಾರ್ಥಿಗಳು ಸೇರಿಕೊಂಡಿರುವ ಕೋರ್ಸ್ಗಳನ್ನು ಅರ್ಧಕ್ಕೇ ಬಿಡಿಸಿ, ಅವರನ್ನು ಬೇರೆಡೆಗೆ ವರ್ಗಾಯಿಸುತ್ತಿದ್ದರು. ಇದರಿಂದ ವಿದ್ಯಾರ್ಥಿಗಳ ಶೈಕ್ಷಣಿಕ ಜೀವನ ಹಾಳಾಗುತ್ತಿತ್ತು ಮತ್ತು ಆರ್ಥಿಕವಾಗಿಯೂ ಹೊರೆಯಾಗುತ್ತಿತ್ತು. ಈ ನಿಷೇಧವು ಅಂತಹ ಅನೈತಿಕ ಪದ್ಧತಿಗೆ ಅಂತ್ಯ ಹಾಡಲಿದೆ," ಎಂದು ಹೇಳಿದ್ದಾರೆ.
ವಿದ್ಯಾರ್ಥಿಗಳಿಗೆ ಹೇಗೆ ಸಹಕಾರಿ?
ವಿದೇಶಕ್ಕೆ ಹೋಗುವ ವಿದ್ಯಾರ್ಥಿಗಳು ಹೆಚ್ಚಾಗಿ ಪ್ರವೇಶಾತಿ, ವೀಸಾ ಮತ್ತು ಕಾಲೇಜು ಆಯ್ಕೆಗೆ ಏಜೆಂಟ್ಗಳನ್ನೇ ನಂಬಿರುತ್ತಾರೆ. ಆದರೆ, ಕಮಿಷನ್ ಆಸೆಗೆ ಬಿದ್ದ ಏಜೆಂಟ್ಗಳು, ವಿದ್ಯಾರ್ಥಿ ಆಸ್ಟ್ರೇಲಿಯಾ ತಲುಪಿದ ತಕ್ಷಣ ಆತನನ್ನು ಉತ್ತಮ ಕಾಲೇಜಿನಿಂದ ಬಿಡಿಸಿ, ಕಡಿಮೆ ಗುಣಮಟ್ಟದ ಅಥವಾ ತಮಗೆ ಹೆಚ್ಚು ಕಮಿಷನ್ ನೀಡುವ ಕಾಲೇಜಿಗೆ ಸೇರಿಸುತ್ತಿದ್ದರು. ಈ ಹೊಸ ನಿಯಮದಿಂದಾಗಿ, ಏಜೆಂಟ್ಗಳಿಗೆ ವರ್ಗಾವಣೆಯ ಮೇಲೆ ಹಣ ಸಿಗುವುದಿಲ್ಲವಾದ್ದರಿಂದ, ಅವರು ವಿದ್ಯಾರ್ಥಿಗಳನ್ನು ಸುಖಾಸುಮ್ಮನೆ ಕಾಲೇಜು ಬದಲಿಸುವಂತೆ ಒತ್ತಾಯಿಸುವುದಿಲ್ಲ.
ಇದರಿಂದ ನಿಜವಾದ ಮತ್ತು ಗುಣಮಟ್ಟದ ಶಿಕ್ಷಣ ನೀಡುವ ಸಂಸ್ಥೆಗಳಿಗೂ ಲಾಭವಾಗಲಿದ್ದು, ಅನಗತ್ಯ ಸ್ಪರ್ಧೆ ಕಡಿಮೆಯಾಗಲಿದೆ. ಒಟ್ಟಿನಲ್ಲಿ, ಆಸ್ಟ್ರೇಲಿಯಾ ಸರ್ಕಾರವು ತನ್ನ ಶಿಕ್ಷಣ ವ್ಯವಸ್ಥೆಯ ಗುಣಮಟ್ಟವನ್ನು ಕಾಪಾಡಿಕೊಳ್ಳಲು ಮತ್ತು ವಿದೇಶಿ ವಿದ್ಯಾರ್ಥಿಗಳ ರಕ್ಷಣೆಗಾಗಿ ಈ ದಿಟ್ಟ ಹೆಜ್ಜೆ ಇಟ್ಟಿದೆ.
ಈ ನಿಯಮವು ಜಾರಿಯಾದ ನಂತರ ಶಿಕ್ಷಣ ಸಂಸ್ಥೆಗಳು ಮತ್ತು ಏಜೆಂಟ್ಗಳ ಮೇಲೆ ಕಟ್ಟುನಿಟ್ಟಿನ ನಿಗಾ ಇಡಲಾಗುವುದು. ನವೆಂಬರ್ 2025 ರಲ್ಲಿ ಜಾರಿಗೆ ತಂದ ಶಿಕ್ಷಣ ವಲಯದ ಸಮಗ್ರತೆ ಕಾಯ್ದೆಯ ಮುಂದುವರಿದ ಭಾಗವಾಗಿ ಈ ಕ್ರಮವನ್ನು ನೋಡಲಾಗುತ್ತಿದೆ.
Click it and Unblock the Notifications
Sign in with Google