ತಾಲಿಬಾನ್ ನಾಯಕರು ಹಾಗೂ ಹೊಸ ಸರ್ಕಾರದಲ್ಲಿ ಅವರ ಪಾತ್ರ

Updated: Monday, August 30, 2021, 17:06 [IST]

ಕಾಬೂಲ್, ಆಗಸ್ಟ್ 30: ಶೀಘ್ರವೇ ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಸರ್ಕಾರ ರಚನೆ ಮಾಡಲಿದೆ. ಆ ಸರ್ಕಾರದಲ್ಲಿ ಈ ತಾಲಿಬಾನಿ ನಾಯಕರು ಯಾವ ಯಾವ ಪಾತ್ರ ವಹಿಸಬಹುದು ಎನ್ನುವ ಮಾಹಿತಿ ಇಲ್ಲಿದೆ.

ತಾಲಿಬಾನ್ ನೇತೃತ್ವದ ಸರ್ಕಾರ ಅಫ್ಘಾನಿಸ್ತಾನದಲ್ಲಿ ರಚನೆಯಾಗುವುದು ಸನ್ನಿಹಿತವಾಗಿದೆ. ಪಾಕಿಸ್ತಾನದಲ್ಲಿ ಈಗಾಗಲೇ ಇದು ಪಾಕ್ ಗೆಲುವೆಂದು ಸಂಭ್ರಮಾಚರಣೆ ನಡೆದಿದೆ. ಭಾರತದ ವಿರುದ್ಧ ಏರಿ ಹೋಗಲು ತನಗೆ ತಾಲಿಬಾನ್ನ ಶಕ್ತಿ ಸಿಕ್ಕಿದೆ ಎಂದು ಕೆಲ ಪಾಕಿಸ್ತಾನಿಗರು ಹೇಳಿಕೆ ನೀಡುತ್ತಿರುವುದು ವರದಿಯಾಗಿದೆ.

ಆದರೆ, ತಾಲಿಬಾನ್ ಸಂಘಟನೆಯಿಂದ ನೇರವಾಗಿ ಇಂಥ ಯಾವ ಸುಳಿವೂ ಸಿಕ್ಕಿಲ್ಲ. ವಾಹಿನಿಯೊಂದಕ್ಕೆ ನೀಡಿದ ವಿಶೇಷ ಸಂದರ್ಶನದಲ್ಲಿ ತಾಲಿಬಾನ್ ನಾಯಕ ಶೇರ್ ಮೊಹಮ್ಮದ್ ಸ್ಟನಾಕ್ಝೈ ಅವರು ಈ ಸುದ್ದಿಗಳನ್ನ ಅಲ್ಲಗಳೆಯುತ್ತಾರೆ. ಭಾರತದೊಂದಿಗೆ ಈ ಮುಂಚಿನಂತೆ ಉತ್ತಮ ಸಂಬಂಧ ಬಯಸುತ್ತೇವೆ. ಭಾರತ ಅಷ್ಟೇ ಅಲ್ಲ ಎಲ್ಲಾ ನೆರೆ ದೇಶಗಳೊಂದಿಗೂ ಅಫ್ಘಾನಿಸ್ತಾನಕ್ಕೆ ಒಳ್ಳೆಯ ಸಂಬಂಧ ಬೇಕು ಎಂದು ಶೇರ್ ಮೊಹಮ್ಮದ್ ಹೇಳಿದ್ದಾರೆ.

ನಮ್ಮ ಎಲ್ಲಾ ನೆರೆ ದೇಶಗಳು ಹಾಗೂ ಇಡೀ ವಿಶ್ವದೊಂದಿಗೆ ಸೌಹಾರ್ದಯುತ ಸಂಬಂಧ ಹೊಂದುವುದು ನಮ್ಮ ವಿದೇಶ ನೀತಿಯಾಗಿದೆ. ಅಫ್ಘಾನಿಸ್ತಾನದಲ್ಲಿ ಅಮೆರಿಕದ ಸೇನೆ 20 ವರ್ಷಗಳಿಂದ ಇದ್ದು ಈಗ ಹಿಂದಿರುಗುತ್ತಿವೆ. ಅಮೆರಿಕದೊಂದಿಗೂ ನಾವು ಸ್ನೇಹಪೂರ್ವಕ ಸಂಬಂಧ ನಿರೀಕ್ಷಿಸುತ್ತೇವೆ. ಅಮೆರಿಕನ್ನರು ಅಫ್ಘಾನಿಸ್ತಾನದ ಪುನಶ್ಚೇತನದ ಕಾರ್ಯದಲ್ಲಿ ಭಾಗಿಯಾಗಬೇಕೆಂದು ಬಯಸುತ್ತೇವೆ.

ಭಾರತದೊಂದಿಗೂ ಈ ಮುಂಚೆ ಇದ್ದಂತೆ ಉತ್ತಮ ಸಾಂಸ್ಕೃತಿಕ ಮತ್ತು ಆರ್ಥಿಕ ಸಂಬಂಧಗಳನ್ನ ನಿರೀಕ್ಷಿಸುತ್ತೇವೆ. ಭಾರತವಷ್ಟೇ ಅಲ್ಲ ನೆರೆಯ ದೇಶಗಳಾದ ತಜಿಕಿಸ್ತಾನ್, ಇರಾನ್ ಮತ್ತು ಪಾಕಿಸ್ತಾನದೊಂದಿಗೂ ಉತ್ತಮ ಸಂಬಂಧ ನಮಗೆ ಬೇಕಿದೆ ಎಂದು ಅಫ್ಘಾನಿಸ್ತಾನದ ರಾಜಕೀಯ ವಿಭಾಗದ ನಾಯಕರಾದ ಅವರು ತಿಳಿಸಿದ್ದಾರೆ.

ಹಿಂದಿನಿಂದಲೂ ತಾಲಿಬಾನ್ ಗೌಪ್ಯತೆ ಕಾಪಾಡಿಕೊಳ್ಳುವುದಕ್ಕೆ ಹೆಸರುವಾಸಿಯಾಗಿದೆ. ಈ ಹಿಂದೆಯೂ, ಅಂದರೆ 1996- 2001ರ ಅವಧಿಯಲ್ಲಿ ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಆಳ್ವಿಕೆಯಿದ್ದಾಗಲೂ ತಾಲಿಬಾನ್ ಸರ್ಕಾರದಲ್ಲಿ ಯಾರು ಯಾರು ಯಾವಯಾವ ಖಾತೆಯನ್ನು, ಜವಾಬ್ದಾರಿಯನ್ನು ನಿರ್ವಹಿಸುತ್ತಿದ್ದಾರೆ ಎಂಬುದರ ಕುರಿತು ಸ್ಪಷ್ಟತೆ ನೀಡಲಾಗಿರಲಿಲ್ಲ. ಈಗಲೂ ಆ ಸಂಸ್ಕೃತಿ ಮುಂದುವರಿಯುವ ಲಕ್ಷಣಗಳು ಗೋಚರಿಸಿದೆ.

ಹಿಬತುಲ್ಲಾ ಕುರಿತ ಮಾಹಿತಿ

2016ರಲ್ಲಿ ತಾಲಿಬಾನ್ ಸರ್ವೋಚ್ಛ ನಾಯಕ ಮುಲ್ಲಾ ಮನ್ಸೂರ್ ಅಖ್ತರ್ ಅಮೆರಿಕ ನಡೆಸಿದ ಡ್ರೋನ್ ದಾಳಿಯಲ್ಲಿ ಹತನಾಗಿದ್ದ. ಆಗ ಆತನ ಸ್ಥಾನವನ್ನು ತುಂಬಿದ್ದು ಇದೇ ಹಿಬತುಲ್ಲಾ ಅಕುಂಡ್ಜಾದ. ಈ ಹುದ್ದೆಗೆ ಏರುವ ಮುನ್ನ ಚಿಕ್ಕ ಪುಟ್ಟ ಹುದ್ದೆಯನ್ನು ಆತ ಸಂಘಟನೆಯಲ್ಲಿ ನಿರ್ವಹಿಸಿದ್ದ. ಆತನನ್ನು ಮಿಲಿಟರಿ ಕಮ್ಯಾಂಡರ್ ಎಂದು ಪರಿಗಣಿಸುವುದಕ್ಕಿಂತ ಹೆಚ್ಚಾಗಿ ತಾಲಿಬಾನ್ ಆತನನ್ನು ಧಾರ್ಮಿಕ ಮುಖಂಡನಾಗಿ ಪರಿಗಣಿಸುತ್ತದೆ ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.
ಆತ ತಾಲಿಬಾನ್ ಸರ್ವೋಚ್ಛ ನಾಯಕನಾಗಿ ಅಧಿಕಾರ ಸ್ವೀಕರಿಸಿದ ಸಂದರ್ಭದಲ್ಲಿ ಅಲ್ ಖೈದಾ ಮುಖ್ಯಸ್ಥ ಅಯ್ಮನ್ ಅಲ್ ಜವಾಹಿರಿ ಶ್ಲಾಘಿಸಿದ್ದ. ಆತನ ಸಹಾಯದಿಂದಾಗಿ ತಾಲಿಬಾನ್ ಸಂಘಟನೆಯಲ್ಲಿ ಹಿಬತುಲ್ಲಾ ತನ್ನ ಸ್ಥಾನವನ್ನು ಗಟ್ಟಿ ಮಾಡಿಕೊಂಡಿದ್ದ. ಇಂದಿಗೂ ಹಿಬತುಲ್ಲಾ ಬಗ್ಗೆ ಜಗತ್ತಿಗೆ ಹೆಚ್ಚಿನ ಮಾಹಿತಿ ಲಭ್ಯವಿಲ್ಲ. ಹಬ್ಬಗಳ ಸಮಯದಲ್ಲಿ ಆತ ನೀಡುತ್ತಿದ್ದ ಧಾರ್ಮಿಕ ಸಂದೇಶಗಳಷ್ಟೇ ಹೊರಜಗತ್ತಿಗೆ ಗೊತ್ತು.

ಮುಲ್ಲಾ ಯಾಕೂಬ್ ಕುರಿತ ಮಾಹಿತಿ

ತಾಲಿಬಾನ್ ಸ್ಥಾಪಕ ಸದಸ್ಯ ಮುಲ್ಲಾ ಓಮರ್ ಪುತ್ರನಾದ ಮುಲ್ಲಾ ಯಾಕೂಬ್ ತಾಲಿಬಾನ್ ಸಂಘಟನೆಯಲ್ಲಿನ ಶಕ್ತಿಶಾಲಿ ಸೇನಾ ಸಮಿತಿಯ ಮುಖ್ಯಸ್ಥನಾಗಿದ್ದಾನೆ. ತಾಲಿಬಾನ್ ಸಂಘಟನೆಯ ಹುಟ್ಟಿನಲ್ಲಿ ಪ್ರಮುಖ ಪಾತ್ರ ವಹಿಸಿರುವ ಮುಲ್ಲಾ ಓಮರ್ ಜಿಹಾದಿ ಚಳವಳಿಯ ಹರಿಕಾರ ಎನ್ನುವ ಹೆಸರಿಗೆ ಪಾತ್ರನಾಗಿದ್ದಾನೆ. ಆತನ ತಂದೆಯ ಹೆಸರಿನ ಕಾರಣ ಆತನ ಪುತ್ರನಿಗೆ ಸಂಘಟನೆಯಲ್ಲಿ ಎಲ್ಲಿಲ್ಲದ ಗೌರವವಿದೆ. ಕೇವಲ ನಾಮಕಾವಸ್ಥೆ ಆತನಿಗೆ ಜವಾಬ್ದಾರಿ ನೀಡಲಾಗಿದೆ ಎನ್ನುವ ಮಾತೂ ಇದೆ.

ಸಿರಾಜುದ್ದೀನ್ ಹಕ್ಕಾನಿ

ತಾಲಿಬಾನ್ ಸಂಘಟನೆಯ ಉಪನಾಯಕ ಮತ್ತು ಕುಖ್ಯಾತ ಹಕ್ಕಾನಿ ಉಗ್ರ ಜಾಲದ ಮುಖ್ಯಸ್ಥ ಸಿರಾಜುದ್ದೀನ್ ಹಕ್ಕಾನಿ ಕುರಿತು ಕೇಳದ ರಾಜಕೀಯ ಪರಿಣತನಿಲ್ಲ. ಅಫ್ಘಾನಿಸ್ತಾನದ ಅಪಾಯಕಾರಿ ಉಗ್ರನಾಯಕರಲ್ಲಿ ಈತನ ಹೆಸರು ಮುಂಚೂಣಿಯಲ್ಲಿ ಬರುತ್ತದೆ. ಆತನ ಜಾಲವನ್ನು ಜಗತ್ತಿನ ಅಪಾಯಕಾರಿ ಉಗ್ರಜಾಲ ಪಟ್ಟಿಗೆ ಅಮೆರಿಕ ಸೇರಿಸಿದೆ. ಕಾಬೂಲಿನಲ್ಲಿ ಹಲವಾರು ವರ್ಷಗಳಿಂದ ನಡೆಯುತ್ತಿರುವ ಆತ್ಮಹತ್ಯಾ ಬಾಂಬ್ ದಾಳಿಗಳು, ಸರ್ಕಾರಿ ಅಧಿಕಾರಿಗಳ ಹತ್ಯೆ ಮತ್ತಿತರ ಕುಕೃತ್ಯಗಳಿಗೆ ಹಕ್ಕಾನಿ ಜಾಲವೇ ಕಾರಣ ಎನ್ನುವ ಗುಮಾನಿಯಿದೆ.

ಮುಲ್ಲಾ ಅಬ್ದುಲ್ ಘನಿ ಕುರಿತು ಮಾಹಿತಿ

ಅಫ್ಘಾನಿಸ್ತಾನದಲ್ಲಿ ಸೋವಿಯತ್ ಕಾಳಗ ನಡೆಯುತ್ತಿದ್ದ ಸಮಯದಲ್ಲಿ ಒಕ್ಕಣ್ಣ, ಕುಖ್ಯಾತ ಧಾರ್ಮಿಕ ನಾಯಕ ಮುಲ್ಲಾ ಓಮರ್ ಜೊತೆ ಅಬ್ದುಲ್ ಘನಿ ಕೂಡಾ ಬಂದೂಕು ಹಿಡಿದು ರಷ್ಯನ್ನರ ವಿರುದ್ಧ ಹೋರಾಟ ನಡೆಸಿದ್ದ ಎನ್ನುವ ಕಥೆ ತಾಲಿಬಾನಿಗಳ ನಡುವೆ ಪ್ರಚಲಿತದಲ್ಲಿದೆ. 90ರ ದಶಕದಲ್ಲಿವರಿಬ್ಬರೂ ಸೇರಿ ತಾಲಿಬಾನ್ ಸಂಘಟನೆಯನ್ನು ಸ್ಥಾಪಿಸಿದ್ದರು. 2010ರಲ್ಲ್ಲಿ ಅಬ್ದುಲ್ ಘನಿ ಪಾಕಿಸ್ತಾನದಲ್ಲಿ ಬಂಧನಕ್ಕೊಳಗಾಗಿದ್ದ. 2018ರಲ್ಲಿ ಅಮೆರಿಕದ ಒತ್ತಾಯದ ಮೇರೆಗೆ ಪಾಕಿಸ್ತಾನ ಆತನನ್ನು ಬಿಡುಗಡೆಗೊಳಿಸಿತ್ತು. ನಂತರವೇ ಆತ ತಾಲಿಬಾನ್ ರಾಜಕೀಯ ಕಚೇರಿಯ ಮುಖ್ಯಸ್ಥನಾಗಿ ಆಯ್ಕೆಯಾಗಿದ್ದು. ನಂತರ ಅಮೆರಿಕ ಸೈನಿಕರ ವಾಪಸಾತಿ ಒಪ್ಪಂದದ ಮಾತುಕತೆಗೆ ತಾಲಿಬಾನ್ ಮುಂದೆ ಬಂದಿದ್ದು.