ಭಾರತದ ಆರ್ಥಿಕತೆಗೆ ದಿಢೀರ್ ಆಘಾತ, 90 ರೂಪಾಯಿ ದಾಟಿದ ಡಾಲರ್ ಮೌಲ್ಯ... Rupee And Dollar

ಭಾರತದ ಆರ್ಥಿಕತೆಗೆ ದಿಢೀರ್ ಆಘಾತ ಎದುರಾಗಿದೆ, ಜಾಗತಿಕ ಬಲಿಷ್ಠ ಆರ್ಥಿಕ ರಾಷ್ಟ್ರವಾಗುವ ಕಡೆಗೆ ದೊಡ್ಡ ಹೆಜ್ಜೆ ಇಟ್ಟಿರುವ ಭಾರತಕ್ಕೆ ಈಗ ಶಾಕ್ ಸಿಕ್ಕಿದೆ. ಅಮೆರಿಕನ್ ಡಾಲರ್ ಎದುರು, 90 ರೂಪಾಯಿ ದಾಟಿದ ರೂಪಾಯಿ ಮೌಲ್ಯ ಈಗ ಆತಂಕದ ವಾತಾವರಣ ಸೃಷ್ಟಿ ಮಾಡುತ್ತಿದೆ. ಹಾಗಾದರೆ ಭಾರತೀಯ ಆರ್ಥಿಕತೆ ಮೇಲೆ ಏನೆಲ್ಲಾ ಪರಿಣಾಮ ಬೀರಲಿದೆ ಈ ಬೆಳವಣಿಗೆ? ಭಾರತದ ಪ್ರಜೆಗಳಿಗೆ ಇದರಿಂದ ಏನೆಲ್ಲಾ ಸಮಸ್ಯೆ ಎದುರಾಗಬಹುದು? ಎಂಬ ಚರ್ಚೆ ಶುರುವಾಗಿದೆ.

ನೋಡ ನೋಡುತ್ತಲೇ ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯವು ಇದೀಗ 90 ರೂಪಾಯಿ 19 ಪೈಸೆಗೆ ತಲುಪಿದೆ. ಈ ಮೂಲಕ ಇದನ್ನು ಅಸುರಕ್ಷಿತ ಮಟ್ಟ ಎಂದು ಈಗ ಆರ್ಥಿಕ ತಜ್ಞರು ಪರಿಗಣಿಸಿದ್ದು, ಈ ಆತಂಕಕಾರಿ ಬೆಳವಣಿಗೆ ದೇಶದ ಆರ್ಥಿಕತೆ ಸ್ಥಿರತೆಯ ಬಗ್ಗೆ ತೀವ್ರ ಕಳವಳ ಹುಟ್ಟು ಹಾಕಿದೆ. ಪ್ರಮುಖವಾಗಿ 90 ರೂಪಾಯಿ ದಾಟಿದ ಡಾಲರ್ ಮೌಲ್ಯ ಹಣಕಾಸು ಮಾರುಕಟ್ಟೆಗಳಲ್ಲಿ ಸಂಚಲನವನ್ನೇ ಸೃಷ್ಟಿ ಮಾಡಿದೆ. ಹಲವು ವಿಚಾರಗಳಲ್ಲಿ ಇದು ತೀವ್ರ ಪ್ರಭಾವ ಬೀರುವ ಸಾಧ್ಯತೆ ಇದ್ದು, ಷೇರು ಮಾರುಕಟ್ಟೆ ಕೂಡ ಇದರ ಪರಿಣಾಮ ಎದುರಿಸುವ ಮುನ್ಸೂಚನೆ ಇದೀಗ ಸಿಗುತ್ತಿದೆ.

ರೂಪಾಯಿ ಮೌಲ್ಯ ಕುಸಿತದಿಂದ ಆಘಾತ...

ಹೌದು, ದಿಢೀರ್ ರೂಪಾಯಿ ಮೌಲ್ಯ ಕುಸಿತದಿಂದ ಏನೆಲ್ಲಾ ಸಮಸ್ಯೆ ಎದುರಾಗಲಿದೆ? ಎನ್ನುವ ಚರ್ಚೆ ಶುರುವಾಗಿದೆ. ಪ್ರಮುಖವಾಗಿ ಬೇರೆ ಬೇರೆ ದೇಶಗಳಿಂದ ಆಮದು ಮಾಡಿಕೊಳ್ಳುವ ವಸ್ತು ದುಬಾರಿ ಆಗಲಿದ್ದು, ಈ ರೀತಿ ಆಮದು ವಸ್ತುಗಳ ಬೆಲೆ ಏರಿಕೆ ಪರಿಣಾಮ ಹಣದುಬ್ಬರವು ಕೂಡ ಏರುಪೇರು ಆಗಲಿದೆ. ವಿಶೇಷವಾಗಿ ಇಂಧನ ತೈಲ, ಖಾದ್ಯ ತೈಲ, ಎಲೆಕ್ಟ್ರಾನಿಕ್ಸ್ & ಇತರ ಅಗತ್ಯ ವಸ್ತುಗಳು ದಿಢೀರ್ ಏರಿಕೆ ಕಾಣುವ ಭೀತಿ ಕಾಡುತ್ತಿದೆ. ಹಾಗೇ ಅಂತಾರಾಷ್ಟ್ರೀಯ ಮಟ್ಟದಲ್ಲಿನ ವ್ಯಾಪಾರ ಕೂಡ ಏರುಪೇರು ಆಗುವ ಆತಂಕ ಕಾಡುತ್ತಿದೆ.

ಆರ್‌ಬಿಐ ನೀತಿ ಬದಲಾವಣೆ ಗ್ಯಾರಂಟಿ?

ಅಂದಹಾಗೆ ಭಾರತದ ರಿಸರ್ವ್ ಬ್ಯಾಂಕ್ ತನ್ನ ನೀತಿಗಳನ್ನು ರೂಪಾಯಿ ಮೌಲ್ಯವನ್ನು ಆಧರಿಸಿ ನಿರ್ಧಾರ ಮಾಡುತ್ತದೆ. ಹೀಗಿದ್ದಾಗ ಆರ್‌ಬಿಐ ರೂಪಾಯಿ ಮೌಲ್ಯ ರಕ್ಷಣೆ ಮಾಡಬೇಕಾಗುತ್ತದೆ. ಈ ಹಿನ್ನೆಲೆ ಡಾಲರ್ ಎದುರು ರೂಪಾಯಿ ಮೌಲ್ಯ ತೀವ್ರವಾಗಿ ಕುಸಿತ ಕಂಡಿರುವ ಕಾರಣಕ್ಕೆ ಆರ್‌ಬಿಐ ನೀತಿ ಬದಲಾವಣೆ ಆಗುತ್ತಾ? ಎಂಬ ಟೆನ್ಷನ್ ಶುರುವಾಗಿದೆ. ಮತ್ತೊಂದು ಕಡೆ ಹೊರ ದೇಶದಲ್ಲಿ ಓದಬೇಕು ಅಂತಾ ಕನಸು ಕಟ್ಟಿಕೊಂಡವರಿಗೆ ಕೂಡ ಇದರಿಂದ ಶಾಕ್ ಸಿಕ್ಕಂತೆ ಆಗಿದೆ.

English summary

Rupee Crossed 90 Per Dollar And Here Is The Impact On Economy