ಮಹಿಳೆಯರ ನೆರವಿಗೆ ಕೇಂದ್ರ 'ಒನ್ ಸ್ಟಾಪ್ ಸೆಂಟರ್' ಸ್ಥಾಪನೆ: ಏನಿದು, ಇದರ ಉದ್ದೇಶ, ಕೆಲಸವೇನು?

ಬೆಂಗಳೂರು, ಸೆಪ್ಟಂಬರ್ 01: ಭಾರತದಲ್ಲಿ ಲಿಂಗ ಆಧಾರಿತ ಹಿಂಸೆ, ದೌರ್ಜನ್ಯಗಳಲ್ಲಿ ಬಹುತೇಕವಾಗಿ ಮಹಿಳೆಯರೇ ಸಾಕಷ್ಟು ನೋವು, ಅವಮಾನ ಅನುಭವಿಸುತ್ತಿದ್ದಾರೆ. ಯಾರೊಂದಿಗೂ ಹೇಳಿಕೊಳ್ಳದೇ ಕೆಲವು ಆತ್ಮಹತ್ಯೆ ದಾರಿಯನ್ನು ಹಿಡಿಯುತ್ತಾರೆ. ಅಂತಹ ಮಹಿಳೆಯರಿಗೆ ಸಕಾಲಕ್ಕೆ ನೆರವು ಒದಗಿಸಲು ಕೇಂದ್ರ ಸರ್ಕಾರ 'ಒನ್ ಸ್ಟಾಪ್ ಸೆಂಟರ್' ಯೋಜನೆ ಜಾರಿಗೊಳಿಸಿತು.

ಕೇಂದ್ರ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯ (MWCD), ಇಂದಿರಾ ಗಾಂಧಿ ಮಾತೃತ್ವ ಸಹಾಯ್ ಯೋಜನೆ ಸೇರಿದಂತೆ ಮಹಿಳೆಯರ ಸಬಲೀಕರಣಕ್ಕಾಗಿ ರಾಷ್ಟ್ರೀಯ ಮಿಷನ್‌ಗಾಗಿ ಅಂಬ್ರೆಲಾ ಯೋಜನೆಯ ಉಪ ಯೋಜನೆಯಾಗಿ ಒನ್ ಸ್ಟಾಪ್ ಸೆಂಟರ್'ಗಳನ್ನು ಜಿಲ್ಲೆಗಳಾದ್ಯಂತ ಸ್ಥಾಪಿಸಲು ಕೇಂದ್ರ ಸರ್ಕಾರ ಯೋಜನೆ ರೂಪಿಸಿತು. 'ಸಖಿ' ಎಂದು ಜನಪ್ರಿಯವಾಗಿರುವ ಈ ಯೋಜನೆ 2015ರ ಏಪ್ರಿಲ್ 01ರಿಂದು ಕಾರ್ಯರೂಪಕ್ಕೆ ಬಂದಿತು.

'ಒನ್ ಸ್ಟಾಪ್ ಸೆಂಟರ್' ಯೋಜನೆ ಉದ್ದೇಶ

ಹಿಂಸಾಚಾರಿಗಳಿಗೆ ಒಳಗಾದ ಮಹಿಳೆಯರಿಗೆ ಅಗತ್ಯ ನೆರವು ನೀಡುವುದು ಯೋಜನೆ ಉದ್ದೇಶವಾಗಿದೆ. ಖಾಸಗಿ ಮತ್ತು ಸಾರ್ವಜನಿಕ ಸ್ಥಳಗಳಲ್ಲಿ ಇವುಗಳ ಸ್ಥಾಪನೆಗೆ ಜಿಲ್ಲೆಗೆ ಒಂದರಂತೆ ಸ್ಥಾಪಿಸಲು ಕೇಂದ್ರ ಉದ್ದೇಶ ಹೊಂದಿತ್ತು. ಮಹಿಳೆಯರಿಗೆ ವಯಸ್ಸು, ವರ್ಗ, ಜಾತಿ, ವೈವಾಹಿಕ ಸ್ಥಿತಿ, ಜನಾಂಗ ಇದ್ಯಾವುದೇ ನೋಡದೇ ದೈಹಿಕ, ಲೈಂಗಿಕ, ಭಾವನಾತ್ಮಕ, ಮಾನಸಿಕ ಮತ್ತು ಆರ್ಥಿಕ ದೌರ್ಜನ್ಯಕ್ಕೆ ಒಳಗಾದವರು ಇಲ್ಲಿ ನೆರವು ಪಡೆಯಬಹುದಾಗಿದೆ.

ಇಂತಹ ಅನೇಕ ಘಟನೆಗಳಲ್ಲಿ ಮಹಿಳೆಯರು ಎದುರಿಸುವ ಸಮಸ್ಯೆಗಳಿಗೆ ಪರಿಹಾರ ಒದಗಿಸಲಾಗುತ್ತದೆ. ಲೈಂಗಿಕ ಕಿರುಕುಳ, ಲೈಂಗಿಕ ದೌರ್ಜನ್ಯ, ಕೌಟುಂಬಿಕವಾಗಿ ಹಿಂಸೆ ಅನುಭವಿಸಿರುವುದು, ಕಳ್ಳಸಾಗಣೆ, ಮರಿಯಾದೆ ವಿಚಾರಕ್ಕೆ ತೊಂದರೆ ಎದುರಿಸಿದ್ದರೆ, ಆಸಿಡ್ ದಾಳಿಗೆ ಒಳಲಾಗಿದ್ದರೆ ಇಂತಹ ಹಲವು ರೀತಿಯ ಹಿಂಸೆಯನ್ನು ಎದುರಿಸಿ ನೊಂದ ಮಹಿಳೆಯರಿಗೆ 'ಒನ್ ಸ್ಟಾಪ್ ಸೆಂಟರ್' ಕೇಂದ್ರಗಳು ಆಸರೆಗೆ ಬರುತ್ತವೆ.

'ಒನ್ ಸ್ಟಾಪ್ ಸೆಂಟರ್' ಕಾರ್ಯದ ಮಾಹಿತಿ

ವ್ಯಕ್ತಿ ಇಲ್ಲವೇ ಕುಟುಂಬ ಸದಸ್ಯರಿಂದ ದೈಹಿಕವಾಗಿ ಹಲ್ಲೆ, ಲೈಂಗಿಕ ದೌರ್ಜನ್ಯಕ್ಕೆ ಒಳಗಾದ ಮಹಿಳೆಗೆ ಏಕಕಾಲಕ್ಕೆ ವಸತಿ, ಊಟ ಇಲ್ಲಿ ಸಿಗಲಿದೆ. ಸಂತ್ರಸ್ತೆಗೆ ಕೌನ್ಸೆಲಿಂಗ್, ಚಿಕಿತ್ಸೆ ಹಾಗೂ ರಕ್ಷಣೆಯನ್ನು ಇಲ್ಲಿ ಒದಗಿಸಲಾಗುತ್ತದೆ. ಈ ಮೂಲಕ ಸಂತ್ರಸ್ತ ಮಹಿಳೆಗೆ ಎಲ್ಲ ಸೌಲಭ್ಯಗಳನ್ನು ಒಂದೇ ಸೂರಿನಡಿ ಒದಗಿಸಲಾಗುತ್ತದೆ.

ಈಯೋಜನೆ ಬಾರದಿದ್ದರೆ ಮಹಿಳೆಯರು ಕೌನ್ಸೆಲಿಂಗ್ ಒಂದೆಡೆ, ಚಿಕಿತ್ಸೆಗೆ ಮತ್ತೊಂದೆಡೆ ಅಲೆಯಬೇಕಿತ್ತು. ಅಲ್ಲದೆ ಊಟ, ವಸತಿ ಬೇರೊಂದು ಕಡೆ ಸಿಗುತ್ತಿತ್ತು. ಹೀಗಾದರೆ ಮಹಿಳೆಗೆ ನ್ಯಾಯ ಸಿಗುವುದು ತಡವಾಗಬಹುದು.

ಇದೆಲ್ಲ ಮನಗಂಡು ಸರ್ಕಾರ ಈ ಕೇಂದ್ರಗಳನ್ನು ಜಿಲ್ಲಾವಾರು ಸ್ಥಾಪಿಸಲು ಯೋಜನೆ ಜಾರಿ ಮಾಡಿತು. ನಿಗದಿತ ಅವಧಿಯಲ್ಲಿ ಕೆಲಸಗಳು ನಡೆದರೆ, ಎಲ್ಲಾ ತರಹದ ದಮನಿತ ಹೆಣ್ಣು ಮಕ್ಕಳು 2020ರ ಕೊನೆಯ ವೇಳೆಗೆ 'ಒನ್ ಸ್ಟಾಪ್ ಸೆಂಟರ್‌'ಗಳಲ್ಲಿ (ಸ್ವಂತ ಕಟ್ಟಡಗಳಲ್ಲಿ) ನಿರಾತಂಕವಾಗಿ ತಮಗೆ ಬೇಕಾದ ಸೇವಾ ಸೌಲಭ್ಯಗಳನ್ನು ಪಡೆಯಬಹುದು. ಇದು ತುರ್ತು ಮತ್ತು ತತ್‌ಕ್ಷಣಕ್ಕೆ ಸೇವೆ ನೀಡಲಿದೆ ಎಂದು ಸರ್ಕಾರಿ ತಿಳಿಸಿದೆ.

'ಒನ್ ಸ್ಟಾಪ್ ಸೆಂಟರ್' ಸಿಗುವ ಸೌಲಭ್ಯಗಳು

'ಒನ್ ಸ್ಟಾಪ್ ಸೆಂಟರ್' ನೀಡಲಾಗುವ ಸೇವೆಗಳು ಯಾವವು ಎಂದರೆ 'ಮಹಿಳಾ ಸಹಾಯವಾಣಿ, ಮಾನವ ಕಳ್ಳಸಾಗಣೆ ವಿರೋಧಿ ಘಟಕದ ಸೇವೆ (AHTUs), ಮಹಿಳಾ ಸಹಾಯ ಕೇಂದ್ರ (WHD) ಹಾಗೂ ವಿಶೇಷ ಫಾಸ್ಟ್ ಟ್ರ್ಯಾಕ್ ಕೋರ್ಟ್‌ಗಳಂತಹ ನಿರ್ಭಯಾ ನಿಧಿಯಡಿಯಲ್ಲಿ ಇತರ ಉಪಕ್ರಮಗಳ ಕುರಿತು ಸೇವೆ, ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರದ(DLSA) ಸೇವೆಗಳು ಸೇರಿದಂತೆ ಮತ್ತಿತರ ಸೇವೆಗಳು ಒಂದೇ ಸೂರಿನಡಿ ಸಿಗುತ್ತವೆ.

ಸಂತ್ರಸ್ತ ಮಹಿಳೆಯರು ಅಥವಾ ಅವರಿಗೆ ನೆರವಾಗುವವರು ಅನುಕೂಲವಾಗಲೆಂದು ಈ ಸೆಂಟರ್‌ ಸೇವೆಯನ್ನು ''ಪೊಲೀಸ್, ಆಂಬ್ಯುಲೆನ್ಸ್ ಮತ್ತು ಇತರ ತುರ್ತು ಪ್ರತಿಕ್ರಿಯೆ ಸಹಾಯವಾಣಿಗಳೊಂದಿಗೆ ಸಂಯೋಜಿಸಲಾಗಿದೆ. ನೀವು 108, 100 ಇನ್ನಿತರ ಸಹಾಯವಾಣಿ ಸಂಖ್ಯೆಗೂ ಸಂಪರ್ಕಿಸಿ ಸೆಂಟರ್‌ಗಳ ಸಹಾಯ ಪಡೆಯಬಹುದು.

ಜಿಲ್ಲಾವಾರು ಸೆಂಟರ್‌ ಸ್ಥಾಪನೆ ಕೇಂದ್ರ ಅನುದಾನ

ಒನ್‌ ಸ್ಟಾಪ್‌ ಸೆಂಟರ್‌ ಕರ್ನಾಟಕದ ಪ್ರತಿ ಜಿಲ್ಲೆಗಳಲ್ಲಿ ಸ್ವಂತ ಕಟ್ಟಡಗಳನ್ನು ನಿರ್ಮಿಸಿ, ಅದಕ್ಕೆ ಅಗತ್ಯ ಸಿಬ್ಬಂದಿ ನಿಯೋಜಿಸಲಾಗಿದೆ. ಅದಕ್ಕಾಗಿ ಕೇಂದ್ರ ಸರ್ಕಾರ ಪ್ರತಿ ಜಿಲ್ಲೆಗೆ ಒಂದು ಸೆಂಟರ್ ಸ್ಥಾಪನೆಗೆ ತಲಾ 48 ಲಕ್ಷ ರೂ. ಅನುದಾನ ಬಿಡುಗಡೆ ಮಾಡಿತ್ತು ಎಂದು ರಾಜ್ಯ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಮೂಲಗಳು ಮಾಹಿತಿ ನೀಡಿದೆ.

English summary

Central Govt implement One Stop Center scheme for help women who are subjected to violence.