ಬಜೆಟ್; ದೆಹಲಿ-ವಾರಣಾಸಿ ಹೈ-ಸ್ಪೀಡ್ ರೈಲು ಕಾರಿಡಾರ್ ಘೋಷಣೆ?

Updated: Thursday, January 20, 2022, 13:27 [IST]

ನವದೆಹಲಿ, ಜನವರಿ 20; ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಫೆಬ್ರವರಿ 1ರಂದು 2022-23ರ ಬಜೆಟ್ ಮಂಡಿಸಲಿದ್ದಾರೆ. ರೈಲ್ವೆ ಬಜೆಟ್ ಸಹ ಈಗ ಸಾಮಾನ್ಯ ಬಜೆಟ್‌ನಲ್ಲಿ ವಿಲೀನವಾಗಿರುವುದರಿಂದ ಇಲಾಖೆಯ ಹೊಸ ಘೋಷಣೆಗಳು ಸಹ ಬಜೆಟ್‌ನಲ್ಲಿ ಆಗಲಿವೆ. ಆದ್ದರಿಂದ ರೈಲ್ವೆ ವಲಯದ ನಿರೀಕ್ಷೆಗಳು ಸಹ ಸಾಕಷ್ಟಿವೆ.

ಈ ಬಾರಿಯ ಬಜೆಟ್‌ನಲ್ಲಿ ನವದೆಹಲಿ-ವಾರಣಾಸಿ ಹೈಸ್ಪೀಡ್ ರೈಲು ಕಾರಿಡಾರ್‌ ಯೋಜನೆ ಘೋಷಣೆಯಾಗುವ ನಿರೀಕ್ಷೆ ಇದೆ. ಮುಂಬೈ-ನಾಗ್ಪುರ ಕಾರಿಡಾರ್ ಪ್ರಸ್ತಾವನೆ ಸಹ ಸರ್ಕಾರದ ಮುಂದೆ ಇದೆ. ಆದರೆ ಮಹಾರಾಷ್ಟ್ರ ಸರ್ಕಾರದ ಹೂಡಿಕೆ ಮೇಲೆ ಆ ಯೋಜನೆಯ ಬಗ್ಗೆ ತೀರ್ಮಾನವಾಗಲಿದೆ. ಆದರೆ, ಬಜೆಟ್‌ನಲ್ಲಿ ಒಂದು ಯೋಜನೆಯಂತೂ ಘೋಷಣೆಯಾಗಲಿದೆ?.

2022-23ರಲ್ಲಿ ಭಾರತ ಸರ್ಕಾರ ಎರಡು ಬುಲೆಟ್ ರೈಲು ಯೋಜನೆ ಆರಂಭಿಸಲು ಬಯಸಿದೆ. ದೇಶದಲ್ಲಿ ಮೊದಲು ಘೋಷಣೆ ಮಾಡಿದ ಮುಂಬೈ-ಅಹಮದಾಬಾದ್ ಬುಲೆಟ್ ರೈಲು ಯೋಜನೆ ಕುಟುಂತ್ತಾ ಸಾಗಿದೆ. ಇದರ ನಡುವೆಯೇ ಹೊಸ ಯೋಜನೆ ಘೋಷಣೆಯಾಗಲಿದೆ.

ಹೈ-ಸ್ಪೀಡ್ ರೈಲು ಕಾರಿಡಾರ್‌ ಯೋಜನೆಗೆ ಅನುದಾನ ಬರುವ ಕುರಿತು ಸರ್ಕಾರಕ್ಕೆ ಇನ್ನೂ ಸ್ಪಷ್ಟ ಚಿತ್ರಣ ಲಭ್ಯವಾಗಿಲ್ಲ. ಆದರೆ ನವದೆಹಲಿ-ವಾರಣಾಸಿ, ಮುಂಬೈ-ನಾಗ್ಪುರ ಹೈ ಸ್ಪೀಡ್ ಕಾರಿಡಾರ್ ಯೋಜನೆ ಪ್ರಸ್ತಾವನೆ ಸರ್ಕಾರದ ಮುಂದಿದೆ. ನವದೆಹಲಿ-ವಾರಣಾಸಿ ರೈಲು ಯೋಜನೆ ವಿಸ್ತೃತ ಯೋಜನಾ ವರದಿ ಸಹ ತಯಾರಾಗಿದ್ದು, ಸರ್ಕಾರಕ್ಕೆ ಸಲ್ಲಿಕೆಯಾಗಿದೆ.

ಯೋಜನೆ ಡಿಪಿಆರ್ ಸಲ್ಲಿಕೆಯಾಗಿದೆ

2021ರ ನವೆಂಬರ್‌ನಲ್ಲಿ ನ್ಯಾಷನಲ್ ಹೈ-ಸ್ಪೀಡ್‌ ರೈಲು ಕಾರ್ಪೋರೇಷನ್‌ ಲಿಮಿಟೆಡ್‌ ನವದೆಹಲಿ-ವಾರಣಾಸಿ ಹೈ-ಸ್ಪೀಡ್ ರೈಲು ಯೋಜನೆ ವಿಸ್ತ್ರತ ಯೋಜನಾ ವರದಿ (ಡಿಪಿಆರ್) ಸರ್ಕಾರಕ್ಕೆ ಸಲ್ಲಿಕೆ ಮಾಡಿದೆ. ಆದರೆ ಮುಂಬೈ-ನಾಗ್ಪುರ ಯೋಜನೆ ಡಿಪಿಆರ್ ಇನ್ನೂ ಅಂತಿಮ ಹಂತದಲ್ಲಿದೆ. ಮಾರ್ಚ್ ಅಥವ ಏಪ್ರಿಲ್ ವೇಳೆಗೆ ಅದನ್ನು ಸರ್ಕಾರಕ್ಕೆ ಸಲ್ಲಿಕೆ ಮಾಡಲಾಗುತ್ತದೆ ಎಂದು ಹೈ-ಸ್ಪೀಡ್ ರೈಲು ಕಾರ್ಪೋರೇಷನ್ ಹೇಳಿದೆ. ಒಟ್ಟು 5 ಹೈ-ಸ್ಪೀಡ್ ರೈಲು ಕಾರಿಡಾರ್ ಡಿಪಿಆರ್ ಸಿದ್ಧವಾಗುತ್ತಿದ್ದು, 2023ರ ಆರ್ಥಿಕ ವರ್ಷಕ್ಕೆ ಎಲ್ಲವೂ ಪೂರ್ಣಗೊಳ್ಳಲಿದೆ.

1.5 ಲಕ್ಷ ಕೋಟಿ ರೂ. ಯೋಜನೆ

ನವದೆಹಲಿ ಮತ್ತು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ತವರು ಕ್ಷೇತ್ರ ವಾರಣಾಸಿ ಸಂಪರ್ಕಿಸುವ ಹೈ-ಸ್ಪೀಡ್ ರೈಲು ಕಾರಿಡಾರ್‌ಗೆ ಸುಮಾರು 1.5 ಲಕ್ಷ ಕೋಟಿ ವೆಚ್ಚವಾಗಲಿದೆ ಎಂದು ಡಿಪಿಆರ್ ಅಂದಾಜಿಸಿದೆ. ಯೋಜನೆ ಘೋಷಣೆಗೊಂಡು ಪೂರ್ಣಗೊಳ್ಳುವಾಗ ವೆಚ್ಚ ಅಧಿಕವಾಗಲೂ ಬಹುದು. ಆದರೆ ಮುಂಬೈ-ನಾಗ್ಪುರ ಯೋಜನೆಯ ವೆಚ್ಚ ಕಡಿಮೆಯಾಗಲಿದೆ. ಪ್ರಯಾಣಿಕರ ಸಂಖ್ಯೆ, ಗ್ರಾಮಗಳ ಮೇಲೆ ಆಗುವ ಪರಿಣಾಮ, ಭೂ ಸ್ವಾಧೀನ ಮುಂತಾದ ಅಂಶಗಳನ್ನು ಅಧ್ಯಯನ ಮಾಡಿ ಡಿಪಿಆರ್ ಸಿದ್ಧಪಡಿಸಲಾಗಿದೆ.

ಮುಂಬೈ-ಅಹಮದಾಬಾದ್ ಯೋಜನೆ

ದೇಶದಲ್ಲಿ ಮೊದಲು ಘೋಷಣೆಯಾಗಿದ್ದು ಮುಂಬೈ-ಅಹಮದಾಬಾದ್ ಬುಲೆಟ್ ರೈಲು ಯೋಜನೆ. ನ್ಯಾಷನಲ್ ಹೈ-ಸ್ಪೀಡ್‌ ರೈಲು ಕಾರ್ಪೋರೇಷನ್‌ ಲಿಮಿಟೆಡ್‌ ಈ ಯೋಜನೆ ಜಾರಿಯ ಹೊಣೆ ಹೊತ್ತುಕೊಂಡಿದೆ. ಆದರೆ ಮಾರ್ಗ ಬದಲಾವಣೆ, ಭೂ ಸ್ವಾಧೀನ ಮುಂತಾದ ಪ್ರಕ್ರಿಯೆಗಳಿಂದಾಗಿ ಯೋಜನೆ ವಿಳಂಬವಾಗುತ್ತಿದೆ. ಈ ಯೋಜನೆಗೆ ಸುಮಾರು 1 ಲಕ್ಷ ಕೋಟಿ ಹೂಡಿಕೆಯಾಗಿದೆ. ಜಪಾನ್‌ ಇ5 ತಂತ್ರಜ್ಞಾನದ ನೆರವಿನಿಂದ ಈ ಯೋಜನೆಯನ್ನು ಜಾರಿಗೊಳಿಸಲಾಗುತ್ತಿದೆ. ಈ ಯೋಜನೆ ಪೂರ್ಣಗೊಂಡರೆ ಗಂಟೆಗೆ ರೈಲು 300 ಕಿ. ಮೀ.ಯಲ್ಲಿ ಸಂಚಾರ ನಡೆಸಲಿದೆ ಎಂದು ನಿರೀಕ್ಷಿಸಲಾಗಿದೆ.

50 ಕಿ. ಮೀ. ಪ್ರಾಯೋಗಿಕ ಸಂಚಾರ

ಸೂರತ್‌ನಿಂದ 50 ಕಿ. ಮೀ. ಪ್ರಾಯೋಗಿಕ ಸಂಚಾರ 2026ರಲ್ಲಿ ಆರಂಭವಾಗಬಹುದು ಎಂದು ಅಂದಾಜಿಸಲಾಗಿದೆ. ಮುಂಬೈ-ಅಹಮದಾಬಾದ್ ಯೋಜನೆಗೆ ಇದುವರೆಗೂ ಸುಮಾರು 39,000 ಕೋಟಿ ವೆಚ್ಚ ಮಾಡಲಾಗಿದೆ. ಕಳೆದ ಬಜೆಟ್‌ನಲ್ಲಿಯೇ ಸರ್ಕಾರ ದೇಶದ ವಿವಿಧ ಬುಲೆಟ್ ರೈಲು ಯೋಜನೆಗೆ ಅಧ್ಯಯನ ನಡೆಸಲು ಅನುದಾನ ನೀಡಿತ್ತು.