ಅಜಿತ್ ಪವಾರ್ ವಿಮಾನ ದುರಂತಕ್ಕೆ ಕಾರಣವೇನು? ಗಿರೀಶ್ ಲಿಂಗಣ್ಣ ವಿಶ್ಲೇಷಣೆ

Ajit Pawar Plane Crash reason: ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಅಜಿತ್ ಪವಾರ್ ಅವರ ಅಕಾಲಿಕ ನಿಧನಕ್ಕೆ ಕಾರಣವಾದ ಬಾರಾಮತಿ ವಿಮಾನ ದುರಂತದ ಬಗ್ಗೆ ಹಲವು ಪ್ರಶ್ನೆಗಳು ಹುಟ್ಟಿಕೊಂಡಿವೆ. ಈ ನಡುವೆ, ರಕ್ಷಣಾ ಮತ್ತು ವೈಮಾನಿಕ ಕ್ಷೇತ್ರದ ತಜ್ಞರಾದ ಗಿರೀಶ್ ಲಿಂಗಣ್ಣ ಅವರು ಈ ಘಟನೆಯ ಕುರಿತು ಮಹತ್ವದ ತಾಂತ್ರಿಕ ವಿಶ್ಲೇಷಣೆಯನ್ನು ನೀಡಿದ್ದಾರೆ. ಅವರ ಪ್ರಕಾರ, ಈ ದುರಂತಕ್ಕೆ ಪೈಲಟ್ ದೋಷಕ್ಕಿಂತ ಹೆಚ್ಚಾಗಿ ವಿಮಾನದ ತಾಂತ್ರಿಕ ವೈಫಲ್ಯವೇ ಪ್ರಮುಖ ಕಾರಣವಾಗಿರಬಹುದು.

ಅಜಿತ್ ಪವಾರ್ ಪ್ರಯಾಣಿಸುತ್ತಿದ್ದ ಕೆನಡಾ ಮೂಲದ ಬೊಂಬಾರ್ಡಿಯರ್ ಕಂಪನಿಯ 'ಲಿಯರ್‌ಜೆಟ್ 45' ವಿಮಾನವು ಅತ್ಯಂತ ವೇಗವಾಗಿ ಲ್ಯಾಂಡಿಂಗ್ ಆಗುವ ಸಾಮರ್ಥ್ಯ ಹೊಂದಿದೆ. ಗಿರೀಶ್ ಲಿಂಗಣ್ಣ ಅವರ ಪ್ರಕಾರ, ಈ ವಿಮಾನದ ಲ್ಯಾಂಡಿಂಗ್ ವೇಗ ಗಂಟೆಗೆ ಸುಮಾರು 240 ರಿಂದ 250 ಕಿ.ಮೀ. ಇರುತ್ತದೆ. ಇಷ್ಟು ವೇಗದಲ್ಲಿ ಬರುವ ವಿಮಾನವನ್ನು ನಿಯಂತ್ರಿಸಲು ಮತ್ತು ನಿಲ್ಲಿಸಲು ಪೈಲಟ್‌ಗೆ ಅತಿ ಹೆಚ್ಚು ಕೌಶಲ್ಯ ಮತ್ತು ಸರಿಯಾದ ಉದ್ದದ ರನ್‌ವೇ ಅಗತ್ಯವಿರುತ್ತದೆ.

ದುರಂತಕ್ಕೆ ಪ್ರಮುಖ 3 ಸಾಧ್ಯತೆಗಳು

ಗಿರೀಶ್ ಲಿಂಗಣ್ಣ ವಿವರಿಸಿರುವಂತೆ, ಈ ಅಪಘಾತಕ್ಕೆ ಮೂರು ಪ್ರಮುಖ ತಾಂತ್ರಿಕ ಕಾರಣಗಳಿರಬಹುದು:

1) ಇಂಜಿನ್ ಅಸಮತೋಲನ: ಪ್ರತ್ಯಕ್ಷದರ್ಶಿಗಳ ಪ್ರಕಾರ, ವಿಮಾನ ಇಳಿಯುವಾಗ ದೊಡ್ಡ ಶಬ್ದ ಕೇಳಿಸಿತ್ತು ಮತ್ತು ವಿಮಾನ ಒಂದು ಕಡೆಗೆ ವಾಲಿತ್ತು. ಇದು ಇಂಜಿನ್‌ನ ಪ್ರೊಪೆಲ್ಲರ್ ಅಥವಾ ಫ್ಯಾನ್ ಬ್ಲೇಡ್‌ಗಳ ಅಸಮತೋಲನದಿಂದ ಆಗಿರಬಹುದು. ಇಂಜಿನ್‌ನ ಗೇರ್‌ಗಳಲ್ಲಿ ಸಮಸ್ಯೆ ಉಂಟಾದಾಗ ಇಂತಹ ಶಬ್ದ ಬರುವುದು ಸಹಜ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

2) ಐಸಿಂಗ್ ಸಮಸ್ಯೆ: ವಿಮಾನವು ಹೆಚ್ಚಿನ ಎತ್ತರದಲ್ಲಿ ಹಾರಾಟ ನಡೆಸುವಾಗ, ಅಲ್ಲಿನ ತಣ್ಣನೆಯ ವಾತಾವರಣದಿಂದಾಗಿ ಇಂಜಿನ್ ಬ್ಲೇಡ್‌ಗಳ ಮೇಲೆ ಮಂಜುಗಡ್ಡೆ ಕಟ್ಟಿಕೊಳ್ಳುವ ಸಾಧ್ಯತೆಯಿರುತ್ತದೆ. ಇದನ್ನು 'ಐಸಿಂಗ್' ಎಂದು ಕರೆಯುತ್ತಾರೆ. ಹೀಗಾದಾಗ ಇಂಜಿನ್ ಕಾರ್ಯಕ್ಷಮತೆ ಕುಸಿಯುತ್ತದೆ. ಲ್ಯಾಂಡಿಂಗ್ ವೇಳೆ ವಿಮಾನದ ವೇಗ ಕಡಿಮೆ ಮಾಡುವಾಗ ಇದು ಪೈಲಟ್‌ಗೆ ದೊಡ್ಡ ಸವಾಲಾಗಿ ಪರಿಣಮಿಸಿರಬಹುದು.

3) ರನ್‌ವೇ ಉದ್ದದ ಕೊರತೆ: ಬಾರಾಮತಿ ವಿಮಾನ ನಿಲ್ದಾಣದಲ್ಲಿ ವಿಐಪಿ ವಿಮಾನಗಳು ಇಳಿಯುತ್ತಿದ್ದರೂ, ಈ ತರಹದ ಜೆಟ್ ವಿಮಾನಗಳಿಗೆ ತುರ್ತು ಪರಿಸ್ಥಿತಿಯಲ್ಲಿ ಲ್ಯಾಂಡ್ ಆಗಲು ಬೇಕಾದಷ್ಟು ಉದ್ದದ ರನ್‌ವೇ (ಸುಮಾರು 2.5 ಕಿ.ಮೀ.) ಲಭ್ಯವಿತ್ತೇ ಎಂಬುದು ಪ್ರಶ್ನೆಯಾಗಿದೆ. ತಾಂತ್ರಿಕ ದೋಷವಿದ್ದಾಗ ಕಡಿಮೆ ಅಂತರದಲ್ಲಿ ವಿಮಾನ ನಿಲ್ಲಿಸುವುದು ಅಸಾಧ್ಯದ ಮಾತು.
 
ಅಜಿತ್ ಪವಾರ್ ಕೊನೆಯ ಸೋಷಿಯಲ್ ಮೀಡಿಯಾ ಮೆಸೇಜ್ ವೈರಲ್, ಏನು ಹೇಳಿದ್ದರು ಮಹಾರಾಷ್ಟ್ರ ಉಪಮುಖ್ಯಮಂತ್ರಿ? Ajit Pawar 

ಹಕ್ಕಿ ಡಿಕ್ಕಿ ಹೊಡೆದಿರಬಹುದೇ?

ಟರ್ಬೊ ವಿಮಾನಗಳಲ್ಲಿ ಹಕ್ಕಿ ಡಿಕ್ಕಿ ಹೊಡೆಯುವುದು (Bird Hit) ಕೂಡ ಅಪಘಾತಕ್ಕೆ ಕಾರಣವಾಗಬಹುದು. ಆದರೆ, ಅಜಿತ್ ಪವಾರ್ ಅವರ ವಿಮಾನದ ವಿಷಯದಲ್ಲಿ ಇದು ಎಷ್ಟು ಮಟ್ಟಿಗೆ ಸತ್ಯ ಎಂಬುದು ತನಿಖೆಯಿಂದ ತಿಳಿಯಬೇಕಿದೆ.

ಅಂತಿಮವಾಗಿ, ಗಿರೀಶ್ ಲಿಂಗಣ್ಣ ಅವರು ಹೇಳುವಂತೆ, "ಇವೆಲ್ಲವೂ ನಮ್ಮ ಊಹೆಗಳಷ್ಟೇ. ನಿಖರವಾದ ಕಾರಣ ತಿಳಿಯಲು 'ಬ್ಲ್ಯಾಕ್ ಬಾಕ್ಸ್' ಅಥವಾ ಫ್ಲೈಟ್ ಡೇಟಾ ರೆಕಾರ್ಡರ್ ಸಿಗಲೇಬೇಕು. ಅದರ ವಿಶ್ಲೇಷಣೆ ನಡೆದ ನಂತರವಷ್ಟೇ, ಕೊನೆಯ ಕ್ಷಣದಲ್ಲಿ ಕಾಕ್‌ಪಿಟ್‌ನಲ್ಲಿ ಏನಾಯಿತು ಎಂಬ ಸತ್ಯ ಹೊರಬರಲಿದೆ." ಅಲ್ಲಿಯವರೆಗೆ ಇದೊಂದು ತಾಂತ್ರಿಕ ವೈಫಲ್ಯ ಎಂದೇ ಮೇಲ್ನೋಟಕ್ಕೆ ಕಂಡುಬರುತ್ತಿದೆ.

English summary

Ajit Pawar Plane Crash: What caused Ajit Pawar's Learjet 45 crash? Aviation expert Girish Linganna analyzes potential reasons, ranging from engine failure to 'icing' on blades.