ಫೆ.15ರಿಂದ ಫಾಸ್‌ಟ್ಯಾಗ್ ಕಡ್ಡಾಯ, ಇಲ್ಲಾಂದ್ರೆ ದುಪ್ಪಟ್ಟು ದಂಡ

Updated: Monday, February 15, 2021, 10:16 [IST]

ದೇಶದ ಎಲ್ಲ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಚಲಿಸುವ ವಾಹನಗಳು ಟೋಲ್ ಸಂಗ್ರಹ ಕೇಂದ್ರ ದಾಟಬೇಕಾದರೆ ಫಾಸ್‌ಟ್ಯಾಗ್ (FASTag) ಹೊಂದುವುದು ಕಡ್ಡಾಯವಾಗಿದೆ. ಫೆಬ್ರವರಿ 15ರಿಂದ ಟೋಲ್ ಶುಲ್ಕ ಪಾವತಿಗೆ ಫಾಸ್‌ಟ್ಯಾಗ್ ಅತ್ಯಗತ್ಯ. ಫಾಸ್‌ಟ್ಯಾಗ್ ಇಲ್ಲದ ವಾಹನಗಳಿಗೆ ದುಪ್ಪಟ್ಟು ದಂಡ ವಸೂಲಿ ಮಾಡಲು ಸೂಚಿಸಲಾಗಿದೆ.

ಸದ್ಯ ದಿನವೊಂದಕ್ಕೆ 93 ಕೋಟಿ ರು ಸಂಗ್ರಹವಾಗುತ್ತಿದ್ದು, ಪ್ರತಿ ದಿನ 100 ಕೋಟಿ ರು ಸುಂಕ ಸಂಗ್ರಹದ ಗುರಿ ಹೊಂದಲಾಗಿದೆ. ಸುಮಾರು 2 ಕೋಟಿಗೂ ಅಧಿಕ ಮಂದಿ ಫಾಸ್ಟ್‌ಟ್ಯಾಗ್ ಬಳಸುತ್ತಿದ್ದಾರೆ ಎಂದು ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರ ಹೇಳಿದೆ.

ಫಾಸ್‌ಟ್ಯಾಗ್ ಬ್ರ್ಯಾಂಡ್ ಹೆಸರು ಭಾರತೀಯ ರಾಷ್ಟ್ರೀಯ ಹೆದ್ದಾರಿ ನಿರ್ವಹಣಾ ಕಂಪೆನಿ ನಿಯಮಿತದ (ಐಎಚ್‌ಎಂಸಿಎಲ್) ಸ್ವಾಮ್ಯಕ್ಕೆ ಒಳಪಟ್ಟಿದೆ. 2014ರಲ್ಲಿ ಪ್ರಾಯೋಗಿಕವಾಗಿ ಜಾರಿಗೊಂಡರೂ ಸಂಪೂರ್ಣವಾಗಿ ಫೆಬ್ರವರಿ 15, 2021ರಿಂದ ಜಾರಿಗೊಳ್ಳಲಿದೆ. ರಾಷ್ಟ್ರೀಯ ವಿದ್ಯುನ್ಮಾನ ಸುಂಕ ಸಂಗ್ರಹ(ಎನ್ ಇಟಿಸಿ) ವ್ಯವಸ್ಥೆಯಡಿಯಲ್ಲಿ ಎಲ್ಲಾ ಟೋಲ್ ಪ್ಲಾಜಾಗಳಲ್ಲೂ ಫಾಸ್ ಟ್ಯಾಗ್ ಬಳಸಬಹುದಾಗಿದೆ.

ಎರಡು ಬಾರಿ ಗಡುವು ವಿಸ್ತರಿಸಲಾಗಿತ್ತು

2017 ರ ಡಿಸೆಂಬರ್ 1 ರ ಮೊದಲು ಮಾರಾಟವಾದ ವಾಹನಗಳಿಗೆ ಫಾಸ್‌ಟ್ಯಾಗ್ ಕಡ್ಡಾಯಗೊಳಿಸುವುದಾಗಿ ಕೇಂದ್ರ ಸರ್ಕಾರ ಘೋಷಿಸಿತ್ತು. ಮೋಟಾರು ವಾಹನ ಕಾಯ್ದೆ 1989 ರ ಅಡಿಯಲ್ಲಿ ಕೇಂದ್ರ ಸರ್ಕಾರವು ಎಲ್ಲಾ ವಾಹನ ತಯಾರಕರು ಮತ್ತು ವಿತರಕರಿಗೆ ವಾಹನ ನೋಂದಣಿ ಸಮಯದಲ್ಲಿ ಫಾಸ್ಟ್‌ಟ್ಯಾಗ್‌ ನೀಡುವಂತೆ ಆದೇಶಿಸಿತ್ತು. 2021ರ ಜನವರಿ 1 ನಂತರ ಫೆಬ್ರವರಿ 1 ಕ್ಕೆ ಎರಡು ಬಾರಿ ಫಾಸ್‌ಟ್ಯಾಗ್ ಕಡ್ಡಾಯ ಎಂದು ಘೋಷಿಸಲಾಗಿತ್ತು ಆದರೆ, ನಂತರ ವಿನಾಯಿತಿ ನೀಡಿ ಫೆಬ್ರವರಿ 15ರ ತನಕ ಅವಕಾಶ ನೀಡಲಾಗಿತ್ತು. ಫಾಸ್‌ಟ್ಯಾಗ್ 5 ವರ್ಷದ ಮಾನ್ಯತೆ ಹೊಂದಿದೆ.

ಫಾಸ್‌ಟ್ಯಾಗ್ ಆರಂಭವಾಗಿದ್ದು ಯಾವಾಗ?

ಫಾಸ್‌ಟ್ಯಾಗ್ ಗಳನ್ನು 2016 ರಲ್ಲಿ ಪ್ರಾರಂಭಿಸಲಾಯಿತು ಮತ್ತು ಎಚ್ ಡಿ ಎಫ್ ಸಿ, ಆಕ್ಸಿಸ್, ಕೋಟಕ್, ಐಡಿ ಎಫ್ ಸಿ, ಐಸಿಐಸಿಐ ಬ್ಯಾಂಕುಗಳು ಒಟ್ಟಾಗಿ ಅವುಗಳಲ್ಲಿ ಒಂದು ಲಕ್ಷ ಮಾರಾಟ ಮಾಡಿವೆ. 2017 ರ ಹೊತ್ತಿಗೆ ಅದರ ಸಂಖ್ಯೆ ಏಳು ಲಕ್ಷಕ್ಕೆ ಏರಿತು. ಈ ಸೌಲಭ್ಯದೊಂದಿಗೆ, ಯಾವುದೇ ಟೋಲ್ ಪ್ಲಾಜಾ ಮೂಲಕ ಹಾದುಹೋಗುವಾಗ ವಾಹನ ಸವಾರರು ಸುಲಭವಾಗಿ ಟೋಲ್ ಪ್ಲಾಜಾ ದಾಟಿದರು. 720 ಟೋಲ್ ಪ್ಲಾಜಾಗಳಲ್ಲಿ ಫಾಸ್‌ಟ್ಯಾಗ್ ಚಾಲ್ತಿಯಲ್ಲಿದೆ.

ಎಲ್ಲಿ ಪಡೆಯುವುದು? ಆಕ್ಟಿವೇಷನ್ ಹೇಗೆ

ಬ್ಯಾಂಕ್ , ಟೋಲ್ ಪ್ಲಾಜಾಗಳಲ್ಲಿ ಲಭ್ಯ ಎಚ್ ಡಿ ಎಫ್ ಸಿ, ಐಸಿಐಸಿಐ, ಸಿಂಡಿಕೇಟ್, ಐಡಿ ಎಫ್ ಸಿ, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ, ಆಕ್ಸಿಸ್ ಬ್ಯಾಂಕಿನಿಂದ ಫ್ಯಾಸ್ಟ್ ಟ್ಯಾಗ್ ಪಡೆದುಕೊಳ್ಳಬಹುದು. ನಂತರ ಫ್ಯಾಸ್ಟ್ ಟ್ಯಾಗ್ ಸ್ಟೀಕರ್ ನಿಮ್ಮ ವಾಹನದ ಮುಂಭಾಗದ ವಿಂಡ್ ಸ್ಕ್ರೀನ್ ಗೆ ಹಾಕಬೇಕು. My FASTag ಆಪ್ ಬಳಸಿ ವಾಹನ ಸಂಖ್ಯೆ ನೀಡಿ activate ಮಾಡಬಹುದು. ನಿಮ್ಮ ಸಮೀಪದ ಪ್ರಮಾಣೀಕೃತ ಬ್ಯಾಂಕಿಗೆ ತೆರಳಿ ಫಾಸ್ಟ್ ಟ್ಯಾಗ್ ಜೊತೆಗೆ ನಿಮ್ಮ ಬ್ಯಾಂಕ್ ಖಾತೆ ಲಿಂಕ್ ಮಾಡಿಸಿ ಆಕ್ಟಿವೇಟ್ ಮಾಡಿಸಿಕೊಳ್ಳಬಹುದು.

ರೀಚಾರ್ಜ್ ಮಾಡುವುದು ಹೇಗೆ?

Indian Highways Management Company Ltd.Productivity ಒಡೆತನದ ಈ ಆಪ್ ಬಳಸಿ ತ್ವರಿತವಾಗಿ ಯುಪಿಐ ಮೂಲಕ ರೀಚಾರ್ಜ್ ಮಾಡಿಕೊಳ್ಳಬಹುದು. ರೀಚಾರ್ಜ್ ಮಾಡಲು ಕ್ರೆಡಿಟ್/ ಡೆಬಿಟ್/ ಎನ್ ಇಎಫ್ ಟಿ/ ಆರ್ ಟಿಜಿಎಸ್ ಅಥವಾ ನೆಟ್ ಬ್ಯಾಂಕಿಂಗ್ ಬಳಸಬಹುದು. 100 ರು ನಿಂದ 1 ಲಕ್ಷ ರು ತನಕ ಮಾತ್ರ ರೀಚಾರ್ಜ್ ಮಾಡಬಹುದು. FASTag ಪ್ರೀಪೇಯ್ಡ್ ವ್ಯಾಲೆಟ್ ನಲ್ಲಿ 20,000 ರು ತನಕ ಮಾತ್ರ ಹೊಂದಬಹುದು. ಪ್ರತಿ ತಿಂಗಳ ಮಿತಿ ಇದಾಗಿದೆ. ಪೂರ್ತಿ ಕೆವೈಸಿ ಫಾಸ್ಟ್ ಟ್ಯಾಗ್ ಖಾತೆ ದಾರರಿಗೆ ಮಾತ್ರ 1 ಲಕ್ಷ ರು ತನಕ ಪ್ರೀ ಪೇಯ್ಡ್ ವ್ಯಾಲೆಟ್ ಹೊಂದಲು ಅವಕಾಶವಿದೆ. ಹಾಗೂ ರೀಚಾರ್ಜ್ ಕೂಡಾ ಮಾಡಿಸಿಕೊಳ್ಳಬಹುದು. ಪ್ರತಿ ಫಾಸ್ಟ್ ಟ್ಯಾಗ್ ಪ್ರತಿ ವಾಹನಕ್ಕೆ ವಿಶಿಷ್ಟವಾಗಿದ್ದು, ಎರಡು ವಾಹನಕ್ಕೆ ಒಂದೇ ಫಾಸ್ಟ್ ಟ್ಯಾಗ್ ಹೊಂದಲು ಅವಕಾಶವಿಲ್ಲ.

ಟ್ರಾವೆಲ್ಸ್ ಏಜೆನ್ಸಿಗಳು ತಲೆ ಕೆಡಿಸಿಕೊಂಡಿವೆ

ಫಾಸ್‌ಟ್ಯಾಗ್ ವ್ಯವಸ್ಥೆಯಿಂದ ಹೆಚ್ಚು ಸಂಕಷ್ಟಕ್ಕೆ ಸಿಲುಕಿರುವವರು ಟ್ರಾವೆಲ್ಸ್ ವಾಹನಗಳ ಮಾಲೀಕರು. ಅವರು ತಮ್ಮ ವಾಹನಗಳಿಗೆ ಫಾಸ್‌ಟ್ಯಾಗ್ ಬಳಸಲು ಪ್ರತ್ಯೇಕ ಖಾತೆಗಳನ್ನು ತೆರೆದು ಅದರಲ್ಲಿ ಹೆಚ್ಚಿನ ಹಣ ಜಮೆ ಮಾಡಬೇಕಾಗುತ್ತದೆ. ನಿರಂತರ ವ್ಯವಹಾರಗಳನ್ನು ನಡೆಸುವುದರಿಂದ ಅವರು ತಮ್ಮ ದೈನಂದಿನ ವ್ಯವಹಾರಗಳ ಖಾತೆಯಲ್ಲದೆ ವಾಹನಗಳಿಗೆಂದೇ ಪ್ರತ್ಯೇಕ ಖಾತೆ ತೆರೆಯಬೇಕಾದ ಕಷ್ಟಕ್ಕೆ ಸಿಲುಕಲಿದ್ದಾರೆ. ವಾಹನ ಮಾಲೀಕರು ತಮ್ಮ ಬ್ಯಾಂಕ್ ಖಾತೆ ಅಥವಾ ಫಾಸ್‌ಟ್ಯಾಗ್ ವ್ಯಾಲೆಟ್‌ನಲ್ಲಿ ಸೂಕ್ತ ಪ್ರಮಾಣದ ಬ್ಯಾಲೆನ್ಸ್ ಕಾಪಾಡಿಕೊಳ್ಳದೆ ಇದ್ದರೆ ಆ ಫಾಸ್‌ಟ್ಯಾಗ್‌ಅನ್ನು ಕಪ್ಪುಪಟ್ಟಿಗೆ ಸೇರಿಸಬಹುದು. ಫಾಸ್‌ಟ್ಯಾಗ್ ಹೊಂದಿದ್ದರೂ ಖಾತೆಯಲ್ಲಿ ಸಾಕಷ್ಟು ಬ್ಯಾಲೆನ್ಸ್ ಹೊಂದಿರದೆ ಇದ್ದರೆ ಅದು ರಾಷ್ಟ್ರೀಯ ವಿದ್ಯುನ್ಮಾನ ಸುಂಕ ಸಂಗ್ರಹ (ಎನ್‌ಇಟಿಸಿ) ಸೇವೆಗಳಿಗೆ ಒಳಪಡುವುದಿಲ್ಲ. ಸದ್ಯದ ಪರಿಸ್ಥಿತಿಯಲ್ಲಿ ನಗದು ರೂಪದಲ್ಲಿ ಸುಂಕ ಪಾವತಿಸುವ ಅವಕಾಶವಿದೆ. ಆದರೆ, ಇನ್ಮುಂದೆ ಏನು ಮಾಡುವುದು ಎಂದು ಟ್ರಾವೆಲ್ಸ್ ಏಜೆನ್ಸಿಗಳು ತಲೆ ಕೆಡಿಸಿಕೊಂಡಿವೆ.