Bengaluru: ಬೆಂಗಳೂರಿನಲ್ಲಿ ಬರಲಿವೆ ರೈಲ್ವೇ ಕೋಚ್ ರೆಸ್ಟೋರೆಂಟ್ಗಳು- ಎಲ್ಲೆಲ್ಲಿ? ವಿಶೇಷತೆಗಳೇನು? ತಿಳಿಯಿರಿ
ಬೆಂಗಳೂರು, ಜುಲೈ 24: ಬೆಂಗಳೂರಿನ ಎರಡು ಸ್ಥಳಗಳಲ್ಲಿ ಥೀಮ್ ಆಧಾರಿತ ರೈಲು ಕೋಚ್ ರೆಸ್ಟೋರೆಂಟ್ಗಳನ್ನು ಸ್ಥಾಪಿಸಲು ನೈಋತ್ಯ ರೈಲ್ವೇ ಯೋಜಿಸುತ್ತಿದೆ.
ಮೆಜೆಸ್ಟಿಕ್ನಲ್ಲಿರುವ ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ರೈಲು ನಿಲ್ದಾಣದಲ್ಲಿ ಮತ್ತು ಬೈಯಪ್ಪನಹಳ್ಳಿಯ ಸರ್ ಎಂ.ವಿಶ್ವೇಶ್ವರಯ್ಯ ಟರ್ಮಿನಲ್ನಲ್ಲಿ (ಎಸ್ಎಂವಿಟಿ) ರೈಲು ಕೋಚ್ ರೆಸ್ಟೋರೆಂಟ್ ಸ್ಥಾಪಿಸಲಾಗುವುದು ಎಂದು ಎಸ್ಡಬ್ಲ್ಯೂಆರ್ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
'ರೈಲ್ವೇ ಕೋಚ್ ರೆಸ್ಟೊರೆಂಟ್ ನಿರ್ಮಿಸಲು ರೈಲ್ವೇ ಕೋಚ್ ಅನ್ನು ಬಳಸಲಾಗುತ್ತದೆ. ಆಹಾರದ ಅಭಿರುಚಿಗೆ ತಕ್ಕಂತೆ ಅದನ್ನು ಮಾರ್ಪಡಿಸಲಾಗುವುದು. ಥೀಮ್ ಆಧಾರಿತ ರೈಲು ಕೋಚ್ ರೆಸ್ಟೋರೆಂಟ್ಗಳು ಅಕ್ಟೋಬರ್ ವೇಳೆಗೆ ಗ್ರಾಹಕರಿಗೆ ಸೇವೆ ಸಲ್ಲಿಸಲು ಪ್ರಾರಂಭಿಸುತ್ತವೆ' ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಈಗಾಗಲೇ ಹುಬ್ಬಳ್ಳಿಯ ಶ್ರೀ ಸಿದ್ಧಾರೂಢ ಸ್ವಾಮಿ ರೈಲು ನಿಲ್ದಾಣದಲ್ಲಿ ಥೀಮ್ ಆಧಾರಿತ ರೈಲು ಕೋಚ್ ರೆಸ್ಟೋರೆಂಟ್ ಅನ್ನು ನೈರುತ್ಯ ರೈಲ್ವೇ ಸ್ಥಾಪಿಸಿದೆ. ರೈಲು ಕೋಚ್ ರೆಸ್ಟೋರೆಂಟ್ಗೆ 'ಬೋಗಿ ಬೋಗಿ' ಎಂದು ಹೆಸರಿಡಲಾಗಿದೆ.
ಅಧಿಕಾರಿಗಳ ಪ್ರಕಾರ, ರೈಲ್ ಕೋಚ್ ರೆಸ್ಟೋರೆಂಟ್ಗಳು ರೈಲು ನಿಲ್ದಾಣಗಳ ಮುಖ್ಯ ಗೇಟ್ ಬಳಿ ಇರುತ್ತವೆ. ರೆಸ್ಟೋರೆಂಟ್ ಹವಾನಿಯಂತ್ರಿತವಾಗಿರುತ್ತದೆ. ಹೆಚ್ಚುವರಿಯಾಗಿ, ರೈಲ್ ಕೋಚ್ ರೆಸ್ಟೋರೆಂಟ್ನ ಊಟದ ಸ್ಥಳದ ಹೊರಗೆ ಆಸನ ವ್ಯವಸ್ಥೆ ಇರುತ್ತದೆ. ಅದು ಹವಾನಿಯಂತ್ರಿತವಾಗಿರುವುದಿಲ್ಲ. ನವೀಕರಿಸಿದ ರೈಲ್ವೇ ಕೋಚ್ ಅನ್ನು ವರ್ಣಚಿತ್ರಗಳು, ದೀಪಗಳು ಮತ್ತು ಆರಾಮದಾಯಕ ಆಸನಗಳಿಂದ ಅಲಂಕರಿಸಲಾಗುತ್ತದೆ.
ಸದ್ಯಕ್ಕೆ ಎಸ್ಡಬ್ಲ್ಯುಆರ್ ಪ್ರತಿ ನಿಲ್ದಾಣದಲ್ಲಿ ಇಂತಹ ಒಂದು ರೆಸ್ಟೋರೆಂಟ್ ಅನ್ನು ಮಾತ್ರ ಆರಂಭಿಸಲು ಯೋಜಿಸಿದೆ. ಯೋಜನೆಯ ಪ್ರಕಾರ, ಆಯ್ಕೆಯಾದ ಬಿಡ್ದಾರರಿಗೆ ಖಾಲಿ ಕೋಚ್ ಅನ್ನು ಹಂಚಲಾಗುತ್ತದೆ, ಅವರು ಅದನ್ನು ಥೀಮ್ ಆಧಾರಿತ ರೆಸ್ಟೋರೆಂಟ್ಗೆ ಪರಿವರ್ತಿಸಬಹುದು. ಅದು ದಿನದ 24 ಗಂಟೆಯೂ ಕಾರ್ಯನಿರ್ವಹಿಸುತ್ತದೆ.
ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಊಟವು ಲಭ್ಯವಿರುತ್ತದೆ. ರೆಸ್ಟೋರೆಂಟ್ ಅನ್ನು ವಿನ್ಯಾಸಗೊಳಿಸಲು ನೈರುತ್ಯ ರೈಲ್ವೆ ಯೋಜಿಸಿದೆ. ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಭಕ್ಷ್ಯಗಳನ್ನು ತಯಾರಿಸಲು ಪ್ರತ್ಯೇಕ ಅಡುಗೆಮನೆಗಳು ಇರುತ್ತವೆ. ರೆಸ್ಟೊರೆಂಟ್ಗಳು ಉತ್ತರ ಭಾರತ ಮತ್ತು ದಕ್ಷಿಣ ಭಾರತದ ಖಾದ್ಯಗಳನ್ನು ಒದಗಿಸುತ್ತವೆ, ಕೋಚ್ ರೆಸ್ಟೋರೆಂಟ್ನ ಒಳಗೆ 50 ಆಸನ ಸಾಮರ್ಥ್ಯ ಮತ್ತು ಕೋಚ್ನ ಹೊರಗೆ ಇನ್ನೂ ಕೆಲವು ಆಸನಗಳು ಇರಲಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
Click it and Unblock the Notifications
Sign in with Google