ಇಂದಿರಾ ಕ್ಯಾಂಟೀನ್ ಮೊದಲ ದಿನ ಊಟ, ವ್ಯವಸ್ಥೆ ಹೇಗಿತ್ತು?
ಬೆಂಗಳೂರು, ಆಗಸ್ಟ್ 16: ಇಂದಿರಾ ಕ್ಯಾಂಟೀನ್ ಕಾಂಗ್ರೆಸ್ ಪಾಲಿಗೆ ಗೇಮ್ ಚೇಂಜರ್ ಆಗುವಂತೆ ಕಾಣುತ್ತಿದೆ. ಮೊದಲ ದಿನ ಅಂದರೆ ಬುಧವಾರದಂದು ತಯಾರಿ ಮಾಡಿದ್ದ ವಾಂಗೀಬಾತ್, ಮೊಸರನ್ನ, ಸಾಂಬಾರ್ ಹಾಗೂ ಮೈಸೂರ್ ಪಾಕ್ ನ ಗುಣಮಟ್ಟ ಹಾಗೂ ಅವುಗಳನ್ನು ಉಣಬಡಿಸಲು ಮಾಡಿದ್ದ ವ್ಯವಸ್ಥೆ ತುಂಬ ಅಚ್ಚುಕಟ್ಟಾಗಿತ್ತು.
ಮೊದಲ ದಿನದ ಮಟ್ಟಿಗೆ ಪ್ರದರ್ಶನ ಯಶಸ್ವಿ ಕಂಡಂತಾಗಿದೆ. ವ್ಯವಸ್ಥೆ, ಗುಣಮಟ್ಟ ಮತ್ತಿತರ ವಿವರಗಳನ್ನು ತಿಳಿಯಲು ಜಯನಗರದ ಕನಕನ ಪಾಳ್ಯದ ಬಳಿಯ ಇಂದಿರಾ ಕ್ಯಾಂಟೀನ್ ಗೆ ತೆರಳಿದಾಗ ಅನುಭವಕ್ಕೆ ಬಂದಿದ್ದನ್ನು ನಿಮ್ಮ ಮುಂದೆ ಇಡಲಾಗುತ್ತಿದೆ.
ಸಾಲಾಗಿ ನಿಂತು ಊಟ ಪಡೆಯುವುದಕ್ಕೆ ಬಹಳ ಕೌಂಟರ್ ಗಳನ್ನು ಮಾಡಲಾಗಿತ್ತು. ಊಟ ಬಡಿಸುವುದಕ್ಕೆ ಖಾಸಗಿ ಕ್ಯಾಟರಿಂಗ್ ಅವರನ್ನು ಕರೆಸಿದಂತಿತ್ತು. ಕೈಗವಸು, ತಲೆಯ ಮೇಲೆ ಟೊಪ್ಪಿ ಧರಿಸಿದ್ದ ಹುಡುಗರು, ಒಂದೇ ಬಣ್ಣದ ಸೀರೆಯುಟ್ಟು ವೃತ್ತಿಪರ ವಾತಾವರಣ ನಿರ್ಮಿಸಿದ್ದರು ಹೆಣ್ಣುಮಕ್ಕಳು.
ಒಟ್ಟಾರೆ ಸರಕಾರಿ ಕಾರ್ಯಕ್ರಮದ ಬಗ್ಗೆ ಇರುವ ನಕಾರಾತ್ಮಕ ಭಾವನೆಯನ್ನು ದೂರ ಮಾಡುವಂತೆ ಅಚ್ಚುಕಟ್ಟಾಗಿ ಆಯೋಜನೆಯಾಗಿತ್ತು ಇಂದಿರಾ ಕ್ಯಾಂಟೀನ್ ಉದ್ಘಾಟನೆ ಕಾರ್ಯಕ್ರಮ. "ಒಂದು ವೇಳೆ ಇದೇ ಗುಣಮಟ್ಟದ ಆಹಾರ ನೀಡಿದರೆ, ಇದೇ ಕ್ಯಾಂಟೀನ್ ಅನ್ನು ರಾಜ್ಯದಾದ್ಯಂತ ವಿಸ್ತರಣೆ ಮಾಡಿದರೆ ಸಿದ್ದರಾಮಯ್ಯ ಅವರ ಉದ್ದೇಶ ಗೆದ್ದೇ ಬಿಡುತ್ತದೆ" ಎಂಬಂತೆ ಅಲ್ಲಿದ್ದ ಜನ ಕೂಡ ಮಾತನಾಡಿಕೊಳ್ಳುತ್ತಿದ್ದರು.
Click it and Unblock the Notifications
Sign in with Google