ನಿಮ್ಮ ಸಂಬಳಕ್ಕೆ ಎಷ್ಟು ಬೆಲೆಯ ಮನೆ ಖರೀದಿಸಬಹುದು? Viral ಆಗುತ್ತಿದೆ ಬೆಂಗಳೂರಿನ ಸಿಎ ತಿಳಿಸಿದ 20-30-40 ರೂಲ್
ಬೆಂಗಳೂರು: ಹಲವರಿಗೆ ಸ್ವಂತ ಮನೆ ಹೊಂದುವುದು ಜೀವನದ ಅತಿ ದೊಡ್ಡ ಕನಸು, ಇದು ಸ್ಥಿರತೆ ಮತ್ತು ಯಶಸ್ಸಿನ ಸಂಕೇತವಾಗಿದೆ. ಆದರೆ ಮನೆಗಳನ್ನು ಹುಡುಕುವ ಮತ್ತು ಇಎಂಐ (EMI) ಲೆಕ್ಕಾಚಾರ ಮಾಡುವ ಉತ್ಸಾಹದ ಹಿಂದೆ ಬಹಳ ಮುಖ್ಯವಾದ ಪ್ರಶ್ನೆಯೊಂದು ಅಡಗಿರುತ್ತದೆ: ಆ ಮನೆ ಖರೀದಿಯ ನಂತರದ ಜೀವನವನ್ನು ನಿಭಾಯಿಸಲು ನಿಮ್ಮ ಪ್ರಸ್ತುತ ಆದಾಯ ನಿಜಕ್ಕೂ ಸಾಕಾಗುತ್ತದೆಯೇ? ಈ ಕುರಿತು ಆನ್ಲೈನ್ನಲ್ಲಿ ಹೊಸ ಚರ್ಚೆಯೊಂದನ್ನು ಹುಟ್ಟುಹಾಕಿರುವ ಬೆಂಗಳೂರು ಮೂಲದ ಚಾರ್ಟರ್ಡ್ ಅಕೌಂಟೆಂಟ್ (ಸಿಎ) ಮೀನಲ್ ಗೋಯಲ್ ಅವರು, ಮನೆ ಖರೀದಿಯ ಸಾಮರ್ಥ್ಯವನ್ನು ಪ್ರಾಯೋಗಿಕ ಚೌಕಟ್ಟಿನಲ್ಲಿ ಅತ್ಯಂತ ಸರಳವಾಗಿ ವಿವರಿಸಿದ್ದಾರೆ.
ಮನೆ ಖರೀದಿಸುವುದು ಎಂದರೆ ಕೇವಲ ಹಣ ಕೊಡುವುದಲ್ಲ, ಅದು ಜೀವನದ ಇತರ ಖರ್ಚುಗಳನ್ನು ನಿಭಾಯಿಸುತ್ತಲೇ ದೀರ್ಘಕಾಲದವರೆಗೆ ಮಾಡುವ ಒಂದು ಆರ್ಥಿಕ ಹೂಡಿಕೆ. ಇದನ್ನು ಸುಲಭವಾಗಿ ಅರ್ಥಮಾಡಿಕೊಳ್ಳಲು ಗೋಯಲ್ ಅವರು "20-30-40 ನಿಯಮ"ವನ್ನು ಪರಿಚಯಿಸಿದ್ದಾರೆ. ಈ ನಿಯಮವು ಮನೆ ಖರೀದಿಯ ಸಾಮರ್ಥ್ಯವನ್ನು ಸಾಲದ ಅವಧಿ, ಇಎಂಐ ಪ್ರಮಾಣ ಮತ್ತು ಡೌನ್ ಪೇಮೆಂಟ್ ಎಂಬ ಮೂರು ಪ್ರಮುಖ ಅಂಶಗಳಾಗಿ ವಿಭಜಿಸುತ್ತದೆ.
ಗೋಯಲ್ ಅವರ ಪ್ರಕಾರ, ಗೃಹ ಸಾಲದ ಹೊರೆ ಕಡಿಮೆ ಮಾಡಲು '20-30-40 ನಿಯಮ' ಅತ್ಯುತ್ತಮವಾಗಿದೆ. ಈ ನಿಯಮದಂತೆ, ನಿಮ್ಮ ಸಾಲದ ಅವಧಿ 20 ವರ್ಷಗಳಿಗಿಂತ ಹೆಚ್ಚಿರಬಾರದು ಮತ್ತು ತಿಂಗಳ ಇಎಂಐ ನಿಮ್ಮ ಆದಾಯದ 30% ಮೀರದಂತಿರಬೇಕು; ಇದರಿಂದ ಜೀವನದ ಇತರ ಅಗತ್ಯ ಖರ್ಚುಗಳಿಗೆ ತೊಂದರೆಯಾಗುವುದಿಲ್ಲ. ಎಲ್ಲಕ್ಕಿಂತ ಮುಖ್ಯವಾಗಿ, ಮನೆಯ ಒಟ್ಟು ಬೆಲೆಯಲ್ಲಿ 40% ಹಣವನ್ನು ಮುಂಗಡವಾಗಿ ಪಾವತಿಸಬೇಕು. ಹೀಗೆ ಮಾಡುವುದರಿಂದ ಸಾಲದ ಅಸಲು ಮೊತ್ತ ಕಡಿಮೆಯಾಗಿ, ನೀವು ಬ್ಯಾಂಕಿಗೆ ಪಾವತಿಸುವ ಬಡ್ಡಿಯ ಹೊರೆ ಗಣನೀಯವಾಗಿ ತಗ್ಗುತ್ತದೆ.
ಇದು ನಿಜ ಜೀವನದಲ್ಲಿ ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ವಿವರಿಸಲು, ಗೋಯಲ್ ಅವರು ವಿವಿಧ ಆಸ್ತಿ ಬೆಲೆಗಳ ಉದಾಹರಣೆಗಳನ್ನು ಹಂಚಿಕೊಂಡಿದ್ದಾರೆ. 50 ಲಕ್ಷ ರೂ. ಮೌಲ್ಯದ ಮನೆ ಖರೀದಿಸುವುದಾದರೆ, ಅದರ ಇಎಂಐ ಅಂದಾಜು 28,950 ರೂ. ಬರುತ್ತದೆ. ಇದಕ್ಕೆ ಕನಿಷ್ಠ 96,500 ರೂ. ಮಾಸಿಕ ವೇತನ ಹಾಗೂ 20 ಲಕ್ಷ ರೂ. ಡೌನ್ ಪೇಮೆಂಟ್ ಅಗತ್ಯವಿರುತ್ತದೆ. ಅದೇ 1 ಕೋಟಿ ರೂ. ಮೌಲ್ಯದ ಆಸ್ತಿಗೆ ಹೋದರೆ, ಇಎಂಐ ದುಪ್ಪಟ್ಟಾಗಿ ಸುಮಾರು 57,900 ರೂ. ಆಗುತ್ತದೆ. ಅಂದರೆ, ಕನಿಷ್ಠ 1.93 ಲಕ್ಷ ರೂ. ಮಾಸಿಕ ಆದಾಯ ಮತ್ತು 40 ಲಕ್ಷ ರೂ. ಮುಂಗಡ ಪಾವತಿಯ ಅಗತ್ಯವಿರುತ್ತದೆ. ಇನ್ನು 3 ಕೋಟಿ ರೂ. ಬೆಲೆಯ ಐಷಾರಾಮಿ ಮನೆ ಖರೀದಿಸಬೇಕಾದರೆ, ಸುಮಾರು 1.73 ಲಕ್ಷ ರೂ. ಇಎಂಐ ಕಟ್ಟಬೇಕಾಗುತ್ತದೆ. ಇದಕ್ಕೆ ಮಾಸಿಕ ವೇತನ ಸುಮಾರು 5.79 ಲಕ್ಷ ರೂ. ಇರಬೇಕು ಮತ್ತು 1.2 ಕೋಟಿ ರೂ.ಗಳ ಬೃಹತ್ ಮೊತ್ತವನ್ನು ಡೌನ್ ಪೇಮೆಂಟ್ ಆಗಿ ನೀಡಬೇಕಾಗುತ್ತದೆ.
ಬ್ಯಾಂಕುಗಳು ನಿಮ್ಮ ಅರ್ಹತೆ ನೋಡಿ ಸುಲಭವಾಗಿ ಸಾಲ ನೀಡಬಹುದು, ಆದರೆ ಸಾಲ ಸಿಕ್ಕ ತಕ್ಷಣ ನಿಮ್ಮ ಆರ್ಥಿಕ ಸ್ಥಿತಿ ಸುರಕ್ಷಿತವಾಗಿದೆ ಎಂದು ಅರ್ಥವಲ್ಲ. ಮನೆ ಖರೀದಿಸುವಾಗ ಬರಿ ಆಸೆಗೆ ಮರುಳಾಗದೆ, ನಿಮ್ಮ ನಿಜವಾದ ಆದಾಯ ಅಥವಾ ಸಂಬಳಕ್ಕೆ ತಕ್ಕಂತೆ ಮನೆಯನ್ನು ಆಯ್ಕೆ ಮಾಡಬೇಕು ಎಂದು ಗೋಯಲ್ ಎಚ್ಚರಿಸುತ್ತಾರೆ. ನಿಮ್ಮ ಮಿತಿಯನ್ನು ಮೀರಿ ದೊಡ್ಡ ಮೊತ್ತದ ಸಾಲ ಮಾಡಿದರೆ, ಪ್ರತಿ ತಿಂಗಳು ಹೆಚ್ಚಿನ ಇಎಂಐ ಕಟ್ಟಲಾಗದೆ ನೀವು ಆರ್ಥಿಕ ಸಂಕಷ್ಟಕ್ಕೆ ಸಿಲುಕುವ ಸಾಧ್ಯತೆ ಇರುತ್ತದೆ.
Click it and Unblock the Notifications
Sign in with Google