Namma Metro: ಆರ್‌.ವಿ.ರಸ್ತೆ- ಬೊಮ್ಮಸಂದ್ರ 'ಹಳದಿ ಮಾರ್ಗ'ದಲ್ಲಿ ಶೀಘ್ರವೇ ಸಂಚಾರ

Updated: Sunday, October 30, 2022, 16:45 [IST]

ಬೆಂಗಳೂರು, ಅಕ್ಟೋಬರ್ 30: ಸಿಲಿಕಾನ್ ಸಿಟಿಯಲ್ಲಿ ನಿತ್ಯ ಲಕ್ಷಾಂತರ ಮಂದಿಗೆ ವೇಗದ ಸಾರಿಗೆ ನೀಡುರುತ್ತಿರುವ 'ನಮ್ಮ ಮೆಟ್ರೋ'ದ ಆರ್‌.ವಿ.ರಸ್ತೆ-ಬೊಮ್ಮಸಂದ್ರ ಮಾರ್ಗದವರೆಗಿನ 'ಹಳದಿ ಮಾರ್ಗ' ನಿರ್ಮಾಣ ಕೆಲಸ ಬಹುತೇಕ ಮುಗಿದಿದೆ. ಬಾಕಿ ಕೆಲಸ ಹಾಗೂ ಪ್ರಾಯೋಗಿಕ ಪರಿಶೀಲನೆ ಬಳಿಕ ಆದಷ್ಟು ಶೀಘ್ರವೇ ಆರಂಭವಾಗಲಿದೆ.

ಒಟ್ಟು 18.82 ಕಿ.ಮೀ ಉದ್ದದ ಆರ್‌.ವಿ.ರಸ್ತೆ-ಬೊಮ್ಮಸಂದ್ರವರೆಗಿನ 'ಹಳದಿ ಮಾರ್ಗ'ದ ನಿರ್ಮಾಣ ಕಾಮಗಾರಿ ಶೇ. 90ರಷ್ಟು ಪೂರ್ಣಗೊಂಡಿದೆ. ಮೆಟ್ರೋ ಎರಡನೇ ಹಂತದ ಯೋಜನೆಯ ವ್ಯಾಪ್ತಿಗೆ ಬರುವ ಈ ಕಾಮಗಾರಿಯಲ್ಲಿ ಸಿವಿಲ್ ಕೆಲಸಗಳು ಮುಗಿದಿದ್ದು, ತಾಂತ್ರಿಕ ಕೆಲಸಗಳು, ಹಳಿ ಜೋಡಣೆ ಕೆಲಸಗಳು ಬಾಕಿ ಇವೆ. ಒಟ್ಟು ಮೂರು ಹಂತದಲ್ಲಿ ಇಲ್ಲಿ ಕೆಲಸಗಳು ನಡೆದಿವೆ.

ಈ ಮಾರ್ಗದಲ್ಲಿ 2023ರ ಜೂನ್‌ ವೇಳೆಗೆ ವಾಣಿಜ್ಯ ಸಂಚಾರ ಆರಂಭವಾಗುವ ನಿರೀಕ್ಷೆ ಇದೆ. ಇದಕ್ಕೂ ಮುನ್ನ ಬೆಂಗಳೂರು ಮೆಟ್ರೋ ರೈಲ್ ಕಾರ್ಪೋರೇಷನ್ ಲಿಮಿಟೆಡ್ (ಬಿಎಂಆರ್‌ಸಿಎಲ್) ಉನ್ನತ ಅಧಿಕಾರಿಗಳು ಪ್ರಾಯೋಗಿಕ ಸಂಚಾರ ನಡೆಸಲಿದ್ದಾರೆ ಎಂದು ನಮ್ಮ ಮೆಟ್ರೋ ಅಧಿಕಾರಿಗಳು ತಿಳಿಸಿದರು.

ಮೆಟ್ರೋ ಹಳಿಗಳ ಜೋಡಣಾ ಕೆಲಸ ಬಾಕಿ

ಈ ಮೆಟ್ರೋ ಹಳದಿ ಮಾರ್ಗದ ಒಟ್ಟು (18.82 ಕಿ.ಮೀ) ಉದ್ದದಲ್ಲಿ ಬೊಮ್ಮಸಂದ್ರದಿಂದ ಬೆರಟೇನ ಅಗ್ರಹಾರ (6.38 ಕಿ.ಮೀ), ಬೆರಟೇನ ಅಗ್ರಹಾರದಿಂದ ಬೊಮ್ಮನಹಳ್ಳಿ ವರೆಗೆ (6.38ಕಿ.ಮೀ.) ಹಾಗೂ ನಂತರ ಅಲ್ಲಿಂದ ಆರ್‌.ವಿ .ರಸ್ತೆವರೆಗಿನ (6.37 ಕಿ.ಮೀ.) ಕ್ರಮವಾಗಿ ಮೂರು ಹಂತದಲ್ಲಿ ಕಾಮಗಾರಿಗಳು ನಡೆದಿವೆ. ಈ ಹಂತಗಳಲ್ಲಿ ಕೆಲಸ ಬಹುತೇಕ ಮುಗಿದಿವೆ. ಕಾರ್ಮಿಕರು ಮತ್ತು ಅಧಿಕಾರಿಗಳು ಹಳಿಗಳ ಜೋಡಣೆ ಕೆಲಸದಲ್ಲಿ ನಿರತರಾಗಿದ್ದಾರೆ. ಮುಂದಿನ ವರ್ಷ ಸಾರ್ವಜನಿಕ ಸೇವೆಗೆ ಮುಕ್ತವಾಗಲಿರುವ ಈ ಹಳದಿ ಮಾರ್ಗದಲ್ಲಿ ನಿತ್ಯ ಸಂಚಾರ ದಟ್ಟಣೆ ಅಧಿಕವಾಗಿರುತ್ತದೆ. ಇದರಿಂದ ಸಾರ್ವಜನಿಕರ ಓಡಾಟ ತ್ರಾಸದಾಯಕವಾಗಿದ್ದು, ಮೆಟ್ರೋ ಶೀಘ್ರ ಆರಂಭವಾದರೆ ಹೆಚ್ಚು ಅನುಕೂಲವಾಗುತ್ತದೆ ಎನ್ನುತ್ತಾರೆ ಪ್ರಯಾಣಿಕರು.

ಬಿಎಂಆರ್‌ಸಿಎಲ್‌ಗೆ ಇಲ್ಲಿಂದಲೇ ಹೆಚ್ಚು ಆದಾಯ

4,255 ಕೋಟಿ ರೂ. ವೆಚ್ಚದಲ್ಲಿ ಈ ಹಳದಿ ಮಾರ್ಗದ ಕಾಮಗಾರಿ ನಿರ್ಮಾಣವಾಗುತ್ತಿದೆ. ಆರ್‌.ವಿ.ರಸ್ತೆಯಿಂದ ಹಿಡಿದು ಬೊಮ್ಮಸಂದ್ರವರೆಗೆ ಒಟ್ಟು 16 ಮೆಟ್ರೋ ನಿಲ್ದಾಣಗಳು ಬರುತ್ತವೆ. ಐಟಿ ಬಿಟಿ ಕಂಪನಿ ಸೇರಿದಂತೆ ಇನ್ನಿತ ಉದ್ಯೋಗಿಗಳು ಈ ಮಾರ್ಗದಲ್ಲಿ ಸಂಚರಿಸುವುದು ಹೆಚ್ಚು. ಈ ಮಾರ್ಗದಲ್ಲಿ ಸರಿ ಸುಮಾರು 3ಲಕ್ಷಕ್ಕೂ ಹೆಚ್ಚು ನಿತ್ಯ ಸಂಚರಿಸುತ್ತಾರೆ ಎನ್ನಲಾಗಿದೆ. ಇಲ್ಲಿ ಮೆಟ್ರೋ ಸಂಚಾರ ಶುರುವಾರದರೆ ಬಿಎಂಆರ್‌ಸಿಎಲ್‌ಗೆ ಅಧಿಕ ಆದಾಯ ಇಲ್ಲಿಂದಲೇ ಬರಬಹುದು ಎನ್ನಲಾಗಿದೆ.

ಈ ಹಳದಿ ಮಾರ್ಗದ 16 ನಿಲ್ದಾಣಗಳ ಪೈಕಿ ಒಂದಾದ ಜಯದೇವ ಮೆಟ್ರೋ ನಿಲ್ದಾಣವು ಇಂಟರ್‌ ಚೇಂಜ್ ಮೆಟ್ರೋ ನಿಲ್ದಾಣವಾಗಿ ಬದಲಾಗಲಿದೆ. ಗೊಟ್ಟಿಗೆರೆಯಿಂದ ನಾಗವಾರವರೆಗಿನ 'ಗುಲಾಬಿ ಮಾರ್ಗ'ವು ಜಯದೇವ ಆಸ್ಪತ್ರೆ ನಿಲ್ದಾಣ ಬಳಿ ಹಾದು ಹೋಗಲಿದೆ. ಇಲ್ಲಿ ಭವಿಷ್ಯದಲ್ಲಿ ಐದು ಹಂತದ ಸಾರಿಗೆ ವ್ಯವಸ್ಥೆ ಬರಲಿದೆ. ಹೀಗಾಗಿ ಇದು ದೇಶದ ಅತೀ ಎತ್ತರದ ಮೆಟ್ರೋ ನಿಲ್ದಾಣ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ.

ಜಯದೇವ ಮೆಟ್ರೋ ನಿಲ್ದಾಣದಲ್ಲಿ ಇಂಟರ್‌ ಚೇಂಜ್

ಈ ಹಳದಿ ಮಾರ್ಗದ 16ನಿಲ್ದಾಣಗಳ ಪೈಕಿ ಒಂದಾದ ಜಯದೇವ ಮೆಟ್ರೋ ನಿಲ್ದಾಣವು ಇಂಟರ್‌ ಚೇಂಜ್ ಮೆಟ್ರೋ ನಿಲ್ದಾಣವಾಗಿ ಬದಲಾಗಲಿದೆ. ಗೊಟ್ಟಿಗೆರೆಯಿಂದ ನಾಗವಾರವರೆಗಿನ 'ಗುಲಾಬಿ ಮಾರ್ಗ'ವು ಜಯದೇವ ಆಸ್ಪತ್ರೆ ನಿಲ್ದಾಣ ಬಳಿ ಹಾದು ಹೋಗಲಿದೆ. ಇಲ್ಲಿ ಭವಿಷ್ಯದಲ್ಲಿ ಐದು ಹಂತದ ಸಾರಿಗೆ ವ್ಯವಸ್ಥೆ ಬರಲಿದೆ. ಹೀಗಾಗಿ ಇದು ದೇಶದ ಅತೀ ಎತ್ತರದ ಮೆಟ್ರೋ ನಿಲ್ದಾಣ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ.

ಚಾಲಕರಿಲ್ಲದೇ ಮೆಟ್ರೋ ರೈಲು ಸೇವೆ

ಆರ್‌.ವಿ.ರಸ್ತೆಯಿಂದ ಬೊಮ್ಮಸಂದ್ರವರೆಗಿನ ಮಾರ್ಗದಲ್ಲಿ ಆರು ಬೋಗಿ (ಕೋಚ್) ಒಳಗೊಂಡ 12 ರೈಲುಗಳು ನಿತ್ಯ ಓಡಾಡಲಿವೆ. ಚಾಲಕರಿಲ್ಲದೇ ಮೆಟ್ರೋ ಸಂಚರಿಸಬಹುದಾದ ರೈಲುಗಳಿಂದ ಈ ಭಾಗದಲ್ಲಿ ಸರಕ್ಷಿತ ಸಂಚಾರ ಸೇವೆ ಒದಗಿಸಲು ಬಿಎಂಆರ್‌ಸಿಎಲ್‌ ತಯಾರಿ ನಡೆಸಿದೆ. ಇದರಲ್ಲ ಎಲ್ಲ ನಿರ್ವಹಣೆ ನಮ್ಮ ಮೆಟ್ರೋ ಕಂಟ್ರೋಲ್ ರೂಮ್ ನಿಂದಲೇ ನಡೆಯಲಿದೆ. ಅದಕ್ಕಾಗಿ ಸಿಬ್ಬಂದಿ ಇರಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.