ಮಾಸ್ಕ್ ಧರಿಸುವುದು ಕಡ್ಡಾಯ; ದಂಡದ ಮೊತ್ತ ಇಳಿಸಿದ ಬಿಬಿಎಂಪಿ

ಬೆಂಗಳೂರು, ಮೇ 06 : ಸಾರ್ವಜನಿಕ ಸ್ಥಳದಲ್ಲಿ ಸಂಚಾರ ನಡೆಸುವವರು ಮಾಸ್ಕ್ ಧರಿಸುವುದು ಕಡ್ಡಾಯವಾಗಿದೆ. ಮಾಸ್ಕ್ ಹಾಕದಿದ್ದವರಿಗೆ ವಿಧಿಸುತ್ತಿದ್ದ 1000 ರೂ. ದಂಡವನ್ನು ಬಿಬಿಎಂಪಿ 200ಕ್ಕೆ ಇಳಿಕೆ ಮಾಡಿ ಆದೇಶ ಹೊರಡಿಸಿದೆ.

ಬಿಬಿಎಂಪಿ ಮೇಯರ್ ಗೌತಮ್ ಕುಮಾರ್ ಜೈನ್ ಈ ಕುರಿತು ಟ್ವೀಟ್ ಮಾಡಿದ್ದಾರೆ. ಮಾಸ್ಕ್ ಹಾಕದಿದ್ದವರಿಗೆ ದಂಡ ವಿಧಿಸುವ ಕುರಿತು ಏಪ್ರಿಲ್ 30ರಂದು ಹೊರಡಿಸಿದ್ದ ಆದೇಶವನ್ನು ಪರಿಷ್ಕರಣೆ ಮಾಡಲಾಗಿದೆ ಎಂದು ಹೇಳಿದ್ದಾರೆ.

ಏಪ್ರಿಲ್ 30ರ ಆದೇಶದ ಪ್ರಕಾರ ಮಾಸ್ಕ್ ಹಾಕದಿದ್ದರೆ ಮೊದಲ ಬಾರಿ 1000 ರೂ., ಎರಡನೇ ಬಾರಿ 2000 ರೂ. ದಂಡ ಹಾಕಲಾಗುತ್ತಿತ್ತು. ಹಿರಿಯ ಆರೋಗ್ಯ ಪರಿವೀಕ್ಷಕರು, ಕಿರಿಯ ಆರೋಗ್ಯ ಪರಿವೀಕ್ಷಕರು ಹಾಗೂ ಮಾರ್ಷಲ್‌ಗಳಿಗೆ ಸ್ಥಳದಲ್ಲಿಯೇ ದಂಡ ಹಾಕುವ ಅವಕಾಶ ನೀಡಲಾಗಿತ್ತು.

ಈಗ ಆದೇಶವನ್ನು ಪರಿಷ್ಕರಣೆ ಮಾಡಲಾಗಿದೆ. ಮಾಸ್ಕ್ ಹಾಕದಿದ್ದರೆ ಮೊದಲ ಬಾರಿ 200, ಎರಡನೇ ಬಾರಿಯೂ 200 ರೂ. ದಂಡ ಹಾಕಲಾಗುತ್ತದೆ. ಕರ್ನಾಟಕ ಸರ್ಕಾರ ಮೇ 2ರಂದು ಸಾಂಕ್ರಾಮಿಕ ರೋಗ ನಿಯಂತ್ರಣ ಕುರಿತು ಅಧಿಸೂಚನೆ ಹೊರಡಿಸಿದೆ.

ATTN: #BBMP has revised its earlier order. People not wearing facial mask in public place and failing to maintain social distance of one metre from others will now be fined ₹200.

Please dispose of facial masks and gloves properly after use.#BBMPFightsCovid19 #StayHome pic.twitter.com/5f9N9xm8qx

— M Goutham Kumar (@BBMP_MAYOR) May 5, 2020

ಈ ಅಧಿಸೂಚನೆ ಅನ್ವಯ ಸಾರ್ವಜನಿಕ ಪ್ರದೇಶದಲ್ಲಿ ಮಾಸ್ಕ್ ಹಾಕುವುದು, ಪರಸ್ಪರ 1 ಮೀಟರ್ ಅಂತರ ಕಾಯ್ದುಕೊಳ್ಳುವುದು ಕಡ್ಡಾಯವಾಗಿದೆ. ಜನರು ಮನೆಯಲ್ಲಿ ತಯಾರಿಸಿದ ಮಾಸ್ಕ್, ಮೂಗು ಮತ್ತು ಬಾಯಿ ಮುಚ್ಚುವಂತಹ ಬಟ್ಟೆಯನ್ನು ಸಹ ಬಳಕೆ ಮಾಡಬಹುದು.

ಬಿಬಿಎಂಪಿ ಮಾಸ್ಕ್ ಧರಿಸದ ಜನರಿಂದ ಮೇ 2ರಂದು 51, 700, ಮೇ 3ರಂದು 98, 350, ಮೇ 4ರಂದು 89,455 ರೂ. ದಂಡವನ್ನು ಸಂಗ್ರಹ ಮಾಡಿದೆ. ಮೇ 5ರಿಂದ ದಂಡದ ಮೊತ್ತ ಇಳಿಕೆಯ ಆದೇಶ ಜಾರಿಗೆ ಬಂದಿದೆ.

English summary

BBMP revised the its earlier order and cut the penalty for not wearing mask. Wearing a facial mask to cover mouth and nose is compulsory public place and in a working place with more than 5 people.