ಬೆಳಗಾವಿ : ಅರಣ್ಯ ಇಲಾಖೆಯ ಹಸಿರೀಕರಣ ಯೋಜನೆ

ಬೆಳಗಾವಿ, ಜೂ. 4 : ಕುಂದಾನಗರಿ ಬೆಳಗಾವಿಯಲ್ಲಿ ಹಸಿರು ಕ್ರಾಂತಿ ಮಾಡಲು ಅರಣ್ಯ ಇಲಾಖೆ ಸಿದ್ಧತೆ ನಡೆಸಿದೆ. ನಗರದ ಸೌಂದರ್ಯ ವೃದ್ಧಿಸಿ, ಪರಿಸರ ಉಳಿಸಲು ನಗರದ ತುಂಬಾ ಐವತ್ತು ಸಾವಿರಕ್ಕೂ ಅಧಿಕ ವಿವಿಧ ಜಾತಿಯ ಗಿಡಗಳನ್ನು ನೆಡಲು ಸಜ್ಜಾಗಿದೆ. ಈ ಕಾರ್ಯಕ್ರಮ ಜೂನ್ 5ರ ಬುಧವಾರದಿಂದ ಪ್ರಾರಂಭವಾಗಲಿದೆ.

ಅರಣ್ಯ ಇಲಾಖೆ ವಿವಿಧ ಖಾಸಗಿ ಸಂಸ್ಥೆಗಳ ಸಹಯೋಗದಲ್ಲಿ ಗಿಡಗಳನ್ನು ನೆಟ್ಟು, ಪರಿಸರ ಸಂರಕ್ಷಣೆ ಮಾಡಲು ತೀರ್ಮಾನಿಸಿತ್ತು. ಆ ಯೋಜನೆ ಈಗ ಕಾರ್ಯರೂಪಕ್ಕೆ ಬರುತ್ತಿದ್ದು, ನಗರದಲ್ಲಿ ಐವತ್ತು ಸಾವಿರಕ್ಕೂ ಅಧಿಕ ಗಿಡಗಳನ್ನು ನೆಟ್ಟು, ಜನರಿಗೂ ಪರಿಸರ ಕಾಳಜಿ ಮೂಡಿಸಲು ಮುಂದಾಗಿದೆ.

ಮಾನ್ಸ್ ಸೂನ್ ಪ್ರಾರಂಭವಾದ ತಕ್ಷಣ ಪ್ರಾರಂಭವಾಗುವ ಈ ಹಸಿರೀಕರಣ ಯೋಜನೆ, ಸೆಪ್ಟೆಂಬರ್ ತಿಂಗಳಿನವರೆಗೆ ನಡೆಯಲಿದೆ. ಜೂನ್ 5 ರಂದು ಅಧಿಕೃತವಾಗಿ ಈ ಯೋಜನೆಗೆ ಚಾಲನೆ ದೊರೆಯಲಿದೆ. ನಾಲ್ಕು ತಿಂಗಳ ಅವಧಿಯಲ್ಲಿ ನಗರದಲ್ಲಿ ಐವತ್ತು ಸಾವಿರ ಸಸಿ ನೆಟ್ಟು, ಪೋಷಿಸುವ ಗುರಿ ಅರಣ್ಯ ಇಲಾಖೆಯ ಮುಂದಿದೆ.

ಬೆಳಗಾವಿ ಮಹಾನಗರ ಪಾಲಿಕೆ ಅರಣ್ಯ ಇಲಾಖೆಯ ಈ ಪ್ರಯತ್ನಕ್ಕೆ ಆರ್ಥಿಕ ಬೆಂಬಲ ನೀಡುತ್ತಿದ್ದು, ನಗರದ ಸುತ್ತಲಿನ ಗಿಡಗಳ ನಿರ್ವಹಣೆಯ ಜವಾಬ್ದಾರಿಯನ್ನು ವಹಿಸಿಕೊಂಡಿದೆ. ಗಿಡಗಳನ್ನು ನೆಡಲು ನಗರದ ಸುತ್ತ-ಮುತ್ತಲಿನ ಹಲವು ಸ್ಥಳಗಳನ್ನು ಗುರುತಿಸಲಾಗಿದೆ.

ಯಾವ ಸ್ಥಳಗಳು ಆಯ್ಕೆ : ಹೊಸ ಬಡಾವಣೆಗಳು, ಸರ್ಕಾರಿ ಭೂಮಿಗಳು, ಕಾರ್ಖನೆಗಳ ಆವರಣ, ಶಾಲೆ ಮತ್ತು ಕಾಲೇಜುಗಳಲ್ಲಿ ಮೊದಲನೇ ಹಂತದಲ್ಲಿ ಗಿಡಗಳನ್ನು ನೆಟ್ಟು ಪೋಷಿಸಲಾಗುತ್ತದೆ. ಶಾಲೆ, ಕಾಲೇಜು ಆವರಣದ ಗಿಡಗಳನ್ನು ಅವರೇ ನಿರ್ವಹಣೆ ಮಾಡಬೇಕು ಎಂಬ ನಿಯಮ ರೂಪಿಸಲಾಗಿದೆ.

ಯಾವ ಗಿಡಗಳು : ಹಸಿರೀಕರಣ ಯೋಜನೆಗಾಗಿ ಅರಣ್ಯ ಇಲಾಖೆ ಸಂಪಿಗೆ, ಬೇವು, ಗಂಧ ಸೇರಿದಂತೆ 12 ಜಾತಿಯ ಗಿಡಗಳನ್ನು ಆಯ್ಕೆ ಮಾಡಿಕೊಂಡಿದೆ. ಇವುಗಳಲ್ಲಿ ನಗರದ ಅಂದ ಹೆಚ್ಚಿಸುವ ಹೂವಿನ ಗಿಡಗಳು ಸೇರಿವೆ. ಕಾರ್ಖನೆಗಳಿಗೂ ಅವುಗಳ ಆವರಣದಲ್ಲಿ ಬೆಳೆಯುವ ಗಿಡಗಳನ್ನು ನೀಡಲು ನಿರ್ಧರಿಸಲಾಗಿದೆ.

ಅರಣ್ಯ ಇಲಾಖೆಯ ಈ ಮಹತ್ವಾಕಾಂಕ್ಷೆ ಯೋಜನೆಗೆ ಬುಧವಾರ ಚಾಲನೆ ದೊರೆಯಲಿದೆ. ಜನರು ತಮ್ಮ ಮನೆಯ ಅಂಗಳದಲ್ಲಿ ಒಂದೊಂದು ಗಿಡಗಳನ್ನು ನೆಟ್ಟು, ಯೋಜನೆಗೆ ಸಂಪೂರ್ಣ ಸಹಕಾರ ನೀಡಬೇಕೆಂದು ಅರಣ್ಯ ಇಲಾಖೆ ಮನವಿ ಮಾಡಿದೆ.

English summary

Belgaum forest department will plant more than 50,000 saplings at various places across the city. The saplings will be planted from June 5,Wednesday. Majority of the saplings will be planted in prime locations, new layouts and government open lands. Nearly 12 varieties of plants planted across the city.