ಕಾವೇರಿ ಎಕ್ಸ್ ಪ್ರೆಸ್ ಪಲ್ಟಿ, ಸಂಚಾರ ಅಸ್ತವ್ಯಸ್ತ

ಕುಪ್ಪಂ(ಆಂಧ್ರಪ್ರದೇಶ), ಅ.22: ಭಾರಿ ಮಳೆ ಹೊಡೆತಕ್ಕೆ ಸಿಲುಕಿ ಕಾವೇರಿ ಎಕ್ಸ್ ಪ್ರೆಸ್ ರೈಲು ಸೋಮವಾರ(ಅ.22) ಮುಂಜಾನೆ ಹಳಿ ತಪ್ಪಿದೆ. ಈ ಅವಘಡದಲ್ಲಿ ಹಲವರಿಗೆ ಗಾಯಗಳಾಗಿದೆ. ಓರ್ವ ಮೃತಪಟ್ಟಿರುವ ಶಂಕೆ ವ್ಯಕ್ತವಾಗಿದೆ. ಆದರೆ, ಸಾವು ನೋವಿನ ಬಗ್ಗೆ ಇನ್ನೂ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ.

ಮೈಸೂರು-ಚೆನ್ನೈ ನಡುವಿನ ಕಾವೇರಿ ಎಕ್ಸ್ ಪ್ರೆಸ್ ರೈಲು ಬೆಳ್ಳಂಬೆಳ್ಳಗೆ ಮಳೆ ಹೊಡೆತಕ್ಕೆ ಸಿಲುಕಿತು. ಚಿತ್ತೂರು ಜಿಲ್ಲೆ ಕುಪ್ಪಂ ಬಳಿ ಮಲ್ಲನೂರು ಹಾಗೂ ಪಚ್ಚ್ರೂರು ಅರಣ್ಯ ಪ್ರದೇಶದಲ್ಲಿ ಕಾವೇರಿ ಎಕ್ಸ್ ಪ್ರೆಸ್ ನ ನಾಲ್ಕು ಬೋಗಿಗಳು ಪಲ್ಟಿ ಹೊಡೆಯಿತು. ಈ ದುರ್ಘಟನೆಯಲ್ಲಿ ಸುಮಾರು 10 ಜನರಿಗೆ ಗಾಯಗಳಾಗಿದ್ದು, ಒಬ್ಬರು ಮೃತ ಪಟ್ಟಿದ್ದಾರೆ ಎಂದು ಪ್ರಾಥಮಿಕ ವರದಿಗಳು ಬಂದಿದೆ.

ಭಾರಿ ಮಳೆಯ ಕಾರಣ ರಕ್ಷಣಾ ಕಾರ್ಯಕ್ಕೆ ಅಡ್ಡಿ ಉಂಟಾಗಿದೆ. ಈ ಘಟನೆ ನಂತರ ಬೆಂಗಳೂರು ಹಾಗೂ ಚೆನ್ನೈ ನಡುವಿನ ರೈಲು ಸಂಚಾರ ಅಸ್ತವ್ಯಸ್ಥಗೊಂಡಿದೆ. ಹಲವು ರೈಲುಗಳ ಮಾರ್ಗ ಬದಲಾವಣೆ, ಕೆಲವು ರೈಲುಗಳ ಸಂಚಾರ ಸ್ಥಗಿತ ಹಾಗೂ ಕೆಲವು ರೈಲುಗಳ ವಿಳಂಬವಾಗಿ ಹೊರಡುವ ಸಾಧ್ಯತೆಯಿದೆ ಎಂದು ರೈಲ್ವೇ ಇಲಾಖೆ ಹೇಳಿದೆ.

ಸಹಾಯವಾಣಿ: 2287 3103

ಕಾವೇರಿ ಎಕ್ಸ್ ಪ್ರೆಸ್ ಪ್ರತಿದಿನ ರಾತ್ರಿ 20:15 ಕ್ಕೆ ಮೈಸೂರು ಬಿಟ್ಟು 23:30ಕ್ಕೆ ಬೆಂಗಳೂರು ತಲುಪಲಿದೆ. 23:45ಕ್ಕೆ ಬೆಂಗಳೂರನ್ನು ಬಿಟ್ಟು ಚೆನ್ನೈ ನಗರವನ್ನು 7:35ಕ್ಕೆ ತಲುಪಬೇಕಾಗುತ್ತದೆ.

English summary

Following the derailment of a Kaveri express 16221 Mysore Mail due to heavy rain between Mysore and Chennai at Kuppam, Andhra Pradesh, routes of other trains were likely to be altered. A few trains may be cancelled and others delayed. Bangalore Chennai Train services disturbed.