ಮೈಸೂರಲ್ಲಿ ಮಹಿಳಾ ಭಕ್ಷಕ, ಬೆಂಗಳೂರಲ್ಲಿ ಕಾಮುಕ ಶಿಕ್ಷಕ ಬಂಧನ

ಮೈಸೂರು/ಬೆಂಗಳೂರು, ಫೆ. 15 : ಗಂಡನಿಂದ ಪರಿತ್ಯಕ್ತಳಾದ ಮಹಿಳೆಯೊಬ್ಬಳ ಮೇಲೆ ಅತ್ಯಾಚಾರಕ್ಕೆ ಯತ್ನಿಸಿದ ಮದುವೆಯಾದ ಕಾಮುಕ ಪುರುಷನನ್ನು ಸಾರ್ವಜನಿಕರೇ ಹಿಡಿದು ಕಂಬಕ್ಕೆ ಕಟ್ಟಿಹಾಕಿ ಹಿಗ್ಗಾಮುಗ್ಗಾ ಥಳಿಸಿದ ಘಟನೆ ಮೈಸೂರು ಜಿಲ್ಲೆಯ ಇಲವಾಲ ಬಳಿಯ ಬೋರೆ ಆನಂದೂರು ಗ್ರಾಮದಲ್ಲಿ ಬುಧವಾರ ನಡೆದಿದೆ.

ಕಾಮುಕನನ್ನು ಬೋರೆ ಆನಂದೂರು ಗ್ರಾಮದ ಸುಧೀಂದ್ರ ಎಂದು ಗುರುತಿಸಲಾಗಿದ್ದು, ಕಳೆದ ಕೆಲ ದಿನಗಳಿಂದ ರಾಧಾ ಎಂಬ ಗಂಡನನ್ನು ದೂರವಾಗಿರುವ ಮಹಿಳೆಯೊಂದಿಗೆ ಅಸಭ್ಯವಾಗಿ ವರ್ತಿಸುತ್ತಿದ್ದ. ಬುಧವಾರ ಸಮಯಸಾಧಿಸಿ ಅತ್ಯಾಚಾರಕ್ಕೆ ಯತ್ನಿಸಿದಾಗ ಸಾರ್ವಜನಿಕರಿಗೆ ಸಿಕ್ಕುಬಿದ್ದಿದ್ದಾನೆ.

ಸುಧೀಂದ್ರನಿಗೆ ಕೂಡ ಮದುವೆಯಾಗಿದ್ದು ಇಬ್ಬರು ಮಕ್ಕಳಿದ್ದಾರೆ. ಆದರೂ, ಕಾಮದಾಸೆಗೆ ಬಿದ್ದು ರಾಧಾ ಒಂಟಿಯಾಗಿರುವುದನ್ನು ನೋಡಿ ಆಕೆಯ ಜೊತೆ ಅಶ್ಲೀಲವಾಗಿ ಮಾತನಾಡುತ್ತಿದ್ದ ಮತ್ತು ಅಸಭ್ಯವಾಗಿ ವರ್ತಿಸುತ್ತಿದ್ದ. ಇದು ಸಾರ್ವಜನಿಕರ ಗಮನಕ್ಕೆ ಕೂಡ ಬಂದಿತ್ತು. ಇಂದು ಸಿಕ್ಕ ಸುಧೀಂದ್ರನನ್ನು ಸಾರ್ವಜನಿಕರು ಕಂಬಕ್ಕೆ ಕಟ್ಟಿಹಾಕಿ, ಅಂಗಿ ಹರಿದು ಮನಬಂದಂತೆ ಥಳಿಸಿದ್ದಾರೆ. ನಂತರ ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಬೆಂಗಳೂರಿನಲ್ಲಿ ಕಾಮುಕ ಶಿಕ್ಷಕನ ಬಂಧನ : ಐದನೇ ತರಗತಿಯ ವಿದ್ಯಾರ್ಥಿನಿಯನ್ನು ಬೆದರಿಸಿ ತನ್ನ ಕಾಮತೃಷೆಗೆ ಬಳಸಿಕೊಳ್ಳುತ್ತಿದ್ದ ಶಿಕ್ಷಕನೊಬ್ಬನನ್ನು ಪೊಲೀಸರು ಇಂದು ಬಂಧಿಸಿದ್ದಾರೆ. ಬಂಧಿತ ಕೃಷ್ಣಮೂರ್ತಿ ಕೆ.ಆರ್. ಪುರಂನಲ್ಲಿರುವ ಕೆಎನ್ಎಸ್ಎಸ್ ವಿದ್ಯಾಮಂದಿರದಲ್ಲಿ ಪಾಠ ಕಲಿಸುತ್ತಿದ್ದು ಕಳೆದ ಒಂದು ತಿಂಗಳಿನಿಂದ ವಿದ್ಯಾರ್ಥಿನಿಯೊಂದಿಗೆ ಅನುಚಿತವಾಗಿ ವರ್ತಿಸುತ್ತಿದ್ದ. ಇದು ವಿದ್ಯಾರ್ಥಿನಿ ಮುಖಾಂತರ ಪಾಲಕರ ಗಮನಕ್ಕೆ ಬಂದು ಆತ ಈಗ ಪೊಲೀಸರ ಅತಿಥಿಯಾಗಿದ್ದಾನೆ.

English summary

A married womanizer has been thrashed by public and handed over to police for misbehaving and for attempting to rape a married but divorced woman in Bore Anandur village in Mysore. A lecher teacher has been arrested in KR Puram in Bangalore.