ಮುಖ್ಯಮಂತ್ರಿ ಕುರ್ಚಿ: ಇಬ್ಬರ ಜಗಳದಲ್ಲಿ 3 ನೇಯವನಿಗೆ ಲಾಭ?

By Mahesh

Published: Wednesday, August 3, 2011, 11:04 [IST]

ಬೆಂಗಳೂರು ಆ.3 : ಕರ್ನಾಟಕ ಮುಖ್ಯಮಂತ್ರಿ ಸ್ಥಾನಕ್ಕೆ ನಡೆದಿರುವ ಸ್ಪರ್ಧೆ ಈಗ ಕ್ಲೈಮ್ಯಾಕ್ಸ್ ಹಂತ ತಲುಪಿದೆ. ಲಿಂಗಾಯತ ಬಣದ ಜಗದೀಶ್ ಶೆಟ್ಟರ್ ಹಾಗೂ ಒಕ್ಕಲಿಗ ಬಣದ ಡಿವಿ ಸದಾನಂದ ಗೌಡರ ಜಗಳದ ಲಾಭ ಪಡೆಯಲು ಹವಣಿಸುತ್ತಿರುವ ಮೂರನೇ ವ್ಯಕ್ತಿಯಾದರೂ ಯಾರು? ಸಿಎಂ ಕುರ್ಚಿ ಏರಲು ಎಲ್ಲಾ ರೀತಿ ಪ್ರಯತ್ನಿಸಿದರೂ ಅದೃಷ್ಟವಿರದೆ ಕಿಂಗ್ ಆಗುವ ಬದಲು ಕಿಂಗ್ ಮೇಕರ್ ಎನಿಸಿಕೊಳ್ಳುವ ಹತಾಶೆಯಲ್ಲಿರುವ ನಾಯಕ ಯಾರು? ಎಂಬ ಪ್ರಶ್ನೆಗೆ ಉತ್ತರ ಅನಂತ.

ಬಿಜೆಪಿ ಶಾಸಕಾಂಗ ಪಕ್ಷದ ಸಭೆ ನಂತರ ಹೊಸ ನಾಯಕನ ಘೋಷಣೆಯಾಗಲಿದೆ. ಕೇಂದ್ರದ ನಾಯಕರು ಸರ್ವ ಸಮ್ಮತದ ಅಭ್ಯರ್ಥಿಯನ್ನು ಹುಡುಕುವಲ್ಲಿ ವಿಫಲರಾಗಿದ್ದಾರೆ. ಎರಡು ಬಣಗಳ ಕಿತ್ತಾಟದ ಬಗೆಹರಿಯದಿದ್ದರೆ, ಮೂರನೇ ವ್ಯಕ್ತಿಯನ್ನು ಆರಿಸುವ ಸಾಧ್ಯತೆ ನಿಚ್ಚಳವಾಗಿದೆ.

ಎರಡು ಉಪ-ಮುಖ್ಯಮಂತ್ರಿ ಹುದ್ದೆ ಸೃಷ್ಟಿಸುವ ಸಾಧ್ಯತೆ ಇದ್ದು, ಸದಾನಂದ ಗೌಡ, ಜಗದೀಶ ಶೆಟ್ಟರ್‌ಗೆ ಡೆಪ್ಯೂಟಿ ಸಿಎಂ ಹುದ್ದೆ ಲಭಿಸುವ ಸಂಭವ ಹೆಚ್ಚಿದೆ. ಆಗ ಸಾಧಾರಣ ಬಹುಮತದ ಅನಂತ್ ಸಿಎಂ ಸ್ಥಾನಕ್ಕೇರಲಿದ್ದಾರೆ. ಕೆಎಸ್ ಈಶ್ವರಪ್ಪ ರಾಜ್ಯಾಧ್ಯಕ್ಷರಾಗಿಯೇ ಮುಂದುವರಿಯಲಿದ್ದಾರೆ.

ತಟಸ್ಥ ನಾಯಕನ ಆಯ್ಕೆ?: ಎರಡೂ ಬಣದ ನಾಯಕರನ್ನು ಬದಿಗೊತ್ತಿ ಯಾವ ಗುಂಪಿಗೂ ಸೇರದ ಸುರೇಶ್ ಕುಮಾರ್, ಗೋವಿಂದ ಕಾರಜೋಳ ಅಥವಾ ವಿಎಸ್ ಆಚಾರ್ಯ ಅವರಿಗೆ ಹೊಸ ಜವಾಬ್ದಾರಿ ಸಿಕ್ಕರೂ ಆಶ್ಚರ್ಯವಿಲ್ಲ. ಏನಾದರೂ ಯಡಿಯೂರಪ್ಪ ಅವರ ಸಚಿವ ಸಂಪುಟ ಸಂಪೂರ್ಣ ಬದಲಾಗಲಿದ್ದು, ಸಿಎಂ ಆಯ್ಕೆಗೆ ಮುನ್ನ ಸಚಿವ ಸ್ಥಾನಕ್ಕೂ ಲಾಬಿ ನಡೆಯುತ್ತಿದೆ.

Published On August 3, 2011