ಪ್ರಾಣಕ್ಕೆ ಎರವಾದ ಹಾವುಗಳ ಮಿಲನ

ದಾವಣಗೆರೆ, ಆ.4: ಹಾವುಗಳ ಮಿಲನದ ದೃಶ್ಯ ನೋಡಿದರೆ ಹತ್ತಿರದ ಸಂಬಂಧಿಕರಿಗೊಂದು ಕೆಟ್ಟ ಸುದ್ದಿ ಕೊಡಬೇಕು. ಇಲ್ಲದಿದ್ದರೆ ನೋಡಿದವರ ಆಯಸ್ಸು ಕಡಿಮೆಯಾಗುತ್ತದೆ ಎಂಬ ಮೂಢ ನಂಬಿಕೆ ಇಲ್ಲಿನ ಚಿಕ್ಕನಹಳ್ಳಿ ಬಡಾವಣೆಯ ವ್ಯಕ್ತಿಯೊಬ್ಬನ ಆತ್ಮಹತ್ಯೆಗೆ ಕಾರಣವಾಗಿದೆ.

ಚಿಕ್ಕನಹಳ್ಳಿ ಬಡಾವಣೆಯ ಗೋಣೆಪ್ಪ (40) ಆತ್ಮಹತ್ಯೆ ಮಂಗಳವಾರ ಮಾಡಿಕೊಂಡಿದ್ದಾರೆ. ಮೃತರ ತಂಗಿ ಲಕ್ಷ್ಮಮ್ಮ ಅವರ ವಿವಾಹ ಮೂರು ವರ್ಷದ ಹಿಂದೆ ಹರಪನಹಳ್ಳಿಯ ಯುವಕನ ಜತೆ ನಡೆದಿತ್ತು. ಆಕೆ ಬೆಳಗ್ಗೆ ಹೊಲಕ್ಕೆ ಹೋಗಿದ್ದಾಗ ನಾಗರಹಾವುಗಳು ಪ್ರಣಯದಲ್ಲಿ ತೊಡಗಿಕೊಂಡಿದ್ದ ದೃಶ್ಯ ನೋಡಿದ್ದರು.

ಇದರ ದೋಷ ನಿವಾರಣೆಗೆಂದು ಸಂಬಂಧಿಕರಿಗೆ ಕೆಟ್ಟ ಸುದ್ದಿ ಕಳುಹಿಸಬೇಕೆಂಬ ಹಿನ್ನೆಲೆಯಲ್ಲಿ ಗೋಣೆಪ್ಪನ ಪಕ್ಕದ ಮನೆಗೆ ಈಕೆ ಸತ್ತಿರುವುದಾಗಿ ದೂರವಾಣಿ ಮೂಲಕ ಸುದ್ದಿ ತಿಳಿಸಲಾಗಿತ್ತು. ಪೂರ್ಣ ವಿಷಯ ತಿಳಿಯುವುದಾಗಿ ಗೋಣೆಪ್ಪ ಅವರ ಹೆಂಡತಿ ನೀಲಮ್ಮ ಪಕ್ಕದ ಮನೆಗೆ ಹೋಗಿದ್ದರು.

ವಿವರವನ್ನು ಗಂಡನಿಗೆ ತಿಳಿಸಲು ಮನೆಗೆ ಬರುವಷ್ಟರಲ್ಲಿ ಅನಾಹುತ ನಡೆದು ಹೋಗಿತ್ತು. ತಂಗಿಯ ಸಾವಿನ ಸುದ್ದಿ ಅರಗಿಸಿಕೊಳ್ಳಲು ಆಗದೆ ಗೋಣೆಪ್ಪ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು.