ಗೆಲುವಿನ ನಾಗಾಲೋಟದಲ್ಲಿ ಮೆಸ್ಸಿ, ಮರಡೋನಾ

ಪೊಲೊಕ್ವಾನೆ, ಜೂ.23: ಫೀಫಾ ವಿಶ್ವಕಪ್ ನ ಬಿ ಗುಂಪಿನ ಪಂದ್ಯದಲ್ಲಿ ಅರ್ಜೆಂಟೀನಾ ಗ್ರೀಸ್ ಅನ್ನು 2-0 ಅಂತರದಲ್ಲಿ ಮಣಿಸಿ, ವಿಶ್ವಕಪ್ ಗೆಲ್ಲುವ ನೆಚ್ಚಿನ ತಂಡ ಎಂಬ ಹೊಗಳಿಕೆ ತಕ್ಕ ಆಟವಾಡಿದರು.

ಟೆವೆಜ್ ಸೇರಿದಂತೆ ಅರ್ಧದಷ್ಟು ಅನುಭವಿ ಆಟಗಾರರಿಗೆ ಕೋಚ್ ಮರಡೋನಾ ರೆಸ್ಟ್ ನೀಡಿದ್ದಲ್ಲದೆ, 22 ರ ಹರೆಯದ ಬಾರ್ಸಿಲೋನಾ ತಾರೆ ಮೆಸ್ಸಿಗೆ ತಂಡದ ನಾಯಕತ್ವ ದ ಹೊಣೆ ಹೊರೆಸಿದರು. ವಿಶ್ವಕಪ್ ನಲ್ಲಿ ಅರ್ಜಿಂಟಿನಾದ ಕಿರಿ ವಯಸ್ಸಿನ ನಾಯಕ ಎನಿಸಿದರು.

ಫೀಫಾ ವಿಶ್ವಕಪ್ 2010 : ವಿಶ್ವಕಪ್ ವೇಳಾಪಟ್ಟಿ || ಅಂಕಗಳ ಪಟ್ಟಿ||

ಗ್ರೀಸ್ ವಿರುದ್ಧ ಡ್ರಾ ಸಾಧಿಸಿದ್ದರೂ, ಅರ್ಜೆಂಟೀನಾ ಮುಂದಿನ ಹಂತ ತಲುಪುತ್ತಿತ್ತು.ಆದರೆ, ಮೆಸ್ಸಿ ಪಡೆ ಅರ್ಹ ಜಯ ಸಾಧಿಸಿ, ಬಿ ಗುಂಪಿನಲ್ಲಿ 9 ಅಂಕಗಳೊಂದಿಗೆ ಅಗ್ರಸ್ಥಾನ ಪಡೆದು ಮುಂದಿನ ಹಂತ ತಲುಪಿದೆ. 16 ರ ಹಂತದಲ್ಲಿ ಅರ್ಜೆಂಟಿನಾ ಮೆಕ್ಸಿಕೋ ತಂಡ(ಎ ಗುಂಪಿನ 2ನೇ ತಂಡ)ವನ್ನು ಎದುರಿಸಲಿದೆ.

ಮೊದಲರ್ಧದಲ್ಲಿ ಗೋಲು ಗಳಿಸಲು ಎರಡು ತಂಡಗಳು ವಿಫಲವಾದವು. ಗ್ರೀಸ್ ನ ಸಮಾರಾಸ್ ಆಕ್ರಮಣಕಾರಿ ಪ್ರದರ್ಶನ ನೀಡಿದರೂ ಕೇವಲ ಇಬ್ಬರು ಡಿಫೆಂಡರ್ ಗಳು ಹಾಗೂ ಗೋಲಿಯನ್ನು ವಂಚಿಸಿ ಗೋಲ್ ಗಳಿಸುವಲ್ಲಿ ವಿಫಲರಾದರು. ಉಳಿದಂತೆ, ದ್ವಿತೀಯಾರ್ಧದಲ್ಲಿ ಅರ್ಜೆಂಟೀನಾ ಎಂದಿನ ಆಕ್ರಮಣಕಾರಿ ಆಟ ಪ್ರದರ್ಶಿಸಿ, 77 ನೇ ನಿಮಿಷದಲ್ಲಿ ಡೆಮಿಚೆಲಿಸ್ ಹಾಗೂ 89 ನೇ ನಿಮಿಷದಲ್ಲಿ ಪಲೆರ್ಮೊ ಗಳಿಸಿದ ಗೋಲುಗಳಿಂದ ಭರ್ಜರಿ ವಿಜಯ ಸಾಧಿಸಿತು.

ಮೆಸ್ಸಿ ಮತ್ತೆ ಮಿಸ್ : ಮುಂಪಡೆ ಆಟಗಾರ ಇನ್ನೂ ವಿಶ್ವಕಪ್ ನಲ್ಲಿ ಗೋಲಿನ ಖಾತೆ ತೆರೆದಿಲ್ಲ. ಗ್ರೀಸ್ ವಿರುದ್ಧ ಪಂದ್ಯದಲ್ಲಿ 85 ನೇ ನಿಮಿಷದ ನಂತರ ಮುನ್ನುಗ್ಗಿ ಹೊಡೆದ ಕಿಕ್, ದುರದೃಷ್ಟವಶಾತ್ ಗೋಲ್ ಪೋಸ್ಟ್ ಗೆ ತಾಗಿತು. ಮತ್ತೊಮ್ಮೆ ಹೊಡೆದಾಗ ಕೀಪರ್ ಕೈಯಿಂದ ಹಾರಿದ ಜಬಲನಿ(ಚೆಂಡು)ಯನ್ನು ಪಲೆರ್ಮೊ ಗೋಲಿನೊಳಗೆ ಕಳಿಸಿಯಾಗಿತ್ತು.

ವಿಡಿಯೋಗಳು : ವಿಶ್ವಕಪ್ ಆಶಯ ಗೀತೆ || ಗಾಯಕಿ ಶಕೀರಾ ಗೀತೆ || ಎಕಾನ್ ಹಾಡಿದ ಆಫ್ರಿಕಾ ಗೀತೆ ||

ಒಟ್ಟಿನಲ್ಲಿ ಗುರುವಾರ 23 ರ ಹುಟ್ಟುಹಬ್ಬದ ಸಂಭ್ರಮ ಆಚರಣೆಗೆ ಮುನ್ನ ಅರ್ಜೆಂಟೀನಾ ನಾಯಕನಿಗೆ ತಂಡದ ಆಟಗಾರರು ಹುಟ್ಟುಹಬ್ಬದ ಉಡುಗೊರೆಯಾಗಿ ಭರ್ಜರಿ ಜಯವನ್ನು ತಂದಿತ್ತಿದ್ದಾರೆ. ಡಿಯಗೋ ಮರಡೊನಾ ಎಲ್ಲರ ಟೀಕೆಗೆ ಗೆಲುವಿನ ಮೂಲಕ ಉತ್ತರ ನೀಡಿದ್ದಾರೆ.

ಫೋಟೊ ಫರ್ಫೆಕ್ಟ್ :ಮೊದಲರ್ಧದಲ್ಲಿ ಗ್ರೀಸ್ ನ ಸಮಾರಾಸ್ ಹಾಗೂ ಅರ್ಜೆಂಟೀನಾದ ಡೆಮಿಲಿಚಸ್ ಢಿಕ್ಕಿ ಹೊಡೆದದ್ದು ಫೊಟೋಗ್ರಾಫರ್ ಗಳಿಗೆ ಪಂದ್ಯದ ರೋಚಕ ಕ್ಷಣ ಎನ್ನಬಹುದು. ಉದ್ದುದ್ದ ಕೂದಲು ಬಿಟ್ಟಿರುವ ಇಬ್ಬರು ಆಟಗಾರರು ಪರಸ್ಪರ ಕಾಲುಗಳನ್ನು ಎತ್ತಿ ಢಿಕ್ಕಿ ಹೊಡೆದದ್ದು ಅದ್ಭುತವಾದ ದೃಶ್ಯವಾಗಿತ್ತು.