ಬರಸಿಡಿಲಿಗೆ ಸಿಕ್ಕಿ ಭಸ್ಮವಾದ ಜೀಸಸ್ ಮೂರ್ತಿ

ಒಹಾಯೋ, ಜೂ.16:ಇಲ್ಲಿನ ಪ್ರಮುಖ ಪ್ರೇಕ್ಷಣೀಯ ಸ್ಥಳವಾದ ಸಾಲಿಡ್ ರಾಕ್ ಚರ್ಚ್ ನಲ್ಲಿ ಈಗ ಸ್ಮಶಾನ ಮೌನ ಆವರಿಸಿದೆ. ಚರ್ಚ್ ಬಳಿ ಬಂಡೆಗೆ ಹೊಂದಿಕೊಂಡಂತೆ ನಿರ್ಮಿತವಾಗಿದ್ದ ಕಿಂಗ್ಸ್ ಆಫ್ ಕಿಂಗ್ಸ್ ಯೇಸು ಕ್ರಿಸ್ತನ ಬೃಹತ್ ಪ್ರತಿಮೆ ಸಿಡಿಲಿನ ಹೊಡೆತಕ್ಕೆ ಸಿಕ್ಕು ಸುಟ್ಟು ಹೋಗಿದೆ.

ಸುಮಾರು ಆರು ಮಹಡಿಯಷ್ಟು ಎತ್ತರವಿದ್ದ ಜೀಸಸ್ ಪ್ರತಿಮೆ ಸುಮಾರು 62 ಅಡಿ ಎತ್ತರ ಹಾಗೂ 40 ಅಡಿ ವಿಸ್ತಾರ ಹೊಂದಿತ್ತು. ಪ್ಲಾಸ್ಟಿಕ್ ಫೋಂ, ಫೈಬರ್ ಗ್ಲಾಸ್ ಬಳಸಿ ಸ್ಟೀಲ್ ಫ್ರೇಂಗಳಿಂದ ಪ್ರತಿಮೆ ನಿರ್ಮಿಸಲಾಗಿತ್ತು. ಸಿನ್ಸಿನಾಟಿಗೆ ಉತ್ತರ ದಿಕ್ಕಿನಲ್ಲಿರುವ ಮನ್ರೋದಲ್ಲಿನ ಈ ಪ್ರಸಿದ್ಧ ಪ್ರತಿಮೆಯ ಜೊತೆಗೆ ಪ್ರಾರ್ಥನಾ ಮಂದಿರವೂ ಬೆಂಕಿಯಿಂದ ಹಾನಿಗೊಳಗಾಗಿದೆ.

ಭಗ್ನಾವಶೇಷಗಳ ಅಡಿಯಲ್ಲಿ ಸಿಕ್ಕ ಪ್ರತಿಮೆಗಳ ಚೂರುಗಳನ್ನು ಜನ ಮನೆಗೆ ಒಯ್ಯುತ್ತಿರುವ ದೃಶ್ಯ ಸಾಮಾನ್ಯವಾಗಿತ್ತು. ಪ್ರತಿಮೆಯನ್ನು ಪುನಃ ನಿರ್ಮಿಸುತ್ತೇವೆ. ಈ ಬಾರಿ ಅಗ್ನಿ ನಿರೋಧಕ ಜೀಸಸ್ ಪ್ರತಿಮೆ ಮೇಲೇಳಲಿದೆ ಎಂದು ಚರ್ಚ್ ನ ಬಿಷಪ್ ಹೇಳಿದ್ದಾರೆ.