ಯುಸೂಫ್ ಶಾಲಾ ಬಾಲಕ : ಬಾಲ ಬಿಚ್ಚಿದ ಸಿಮಂಡ್ಸ್

ಅಹ್ಮದಾಬಾದ್, ಮಾ. 28 : ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ, ಡೆಕ್ಕನ್ ಚಾರ್ಜರ್ಸ್ ಪರ ಆಡುತ್ತಿರುವ ಆಂಡ್ರ್ಯೂ ಸಿಮಂಡ್ ಮತ್ತು ವಿವಾದ ಒಂದೇ ನಾಣ್ಯದ ಎರಡು ಮುಖಗಳಿದ್ದಂತೆ. ಅಶಿಸ್ತು ಮತ್ತು ತೆಗಳುವಿಕೆಯನ್ನು ಮೈಗೂಡಿಸಿಕೊಂಡಿರುವ ಸಿಮಂಡ್ಸ್, ಅಂತಾರಾಷ್ಟ್ರೀಯ ಕ್ರಿಕೆಟಿನಿಂದ ನಿವೃತ್ತಿ ಹೊಂದಿದ ನಂತರವೂ, ತಮ್ಮ ಹಳೆ ಚಟವನ್ನು ಬಿಟ್ಟಿಲ್ಲ.

ಮಾರ್ಚ್ 26ರಂದು ರಾಜಸ್ತಾನ್ ರಾಯಲ್ಸ್ ತಂಡದಿಂದ ಸದೆಬಡಿಸಿಕೊಂಡ ಪಂದ್ಯದಲ್ಲಿ ರಾಯಲ್ಸ್ ತಂಡದ ಯುಸೂಫ್ ಪಠಾಣ್ ಅವರನ್ನು 'ಶಾಲಾ ಬಾಲಕ' ಎಂದು ಜರಿದಿದ್ದು ವಿವಾದಕ್ಕೆ ಕಾರಣವಾಗಿದೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಪಠಾಣ್, ತೆಗಳುವಿಕೆಯಿಂದ ತಲೆಕೆಡಿಸಿಕೊಳ್ಳಲಿಲ್ಲ. ಬದಲಿಗೆ, ತೆಗಳುವಿಕೆಯೇ ಉತ್ತಮವಾಗಿ ಆಡಲು ಪ್ರೇರಣೆಯಾಯಿತು ಎಂದು ಹೇಳಿದ್ದಾರೆ. ಈ ವಿವಾದದ ಬಗ್ಗೆ ಹೇಳಿಕೆ ನೀಡಿರುವ ಸಿಮಂಡ್ಸ್, ಹೌದು ನಾನಿರುವುದೇ ಹೀಗೆ ಎಂದು ಉಡಾಫೆಯಿಂದ ಮಾತನಾಡಿದ್ದಾರೆ.

ಆ ಪಂದ್ಯದಲ್ಲಿ ಯುಸೂಫ್ ಪಠಾಣ್ ಕೇವಲ 34 ಚೆಂಡುಗಳಲ್ಲಿ 2 ಬೌಂಡರಿ ಮತ್ತು 8 ಸಿಕ್ಸರ್ ಗಳಿದ್ದ 74 ರನ್ ಸಿಡಿಸಿ ಜಯದ ರೂವಾರಿಯಾಗಿದ್ದರು. ಬ್ಯಾಟಿಂಗಿನಲ್ಲಿ ಯಶ ಕಾಣದ ಸಿಮಂಡ್ಸ್ ಬೌಲಿಂಗಿನಲ್ಲಿಯೂ ಯಾವುದೇ ಕೈಚಳಕ ತೋರಿರಲಿಲ್ಲ.