ಅ.4 ಕ್ಕೆ ಕೋಲಾರದಲ್ಲಿ ಶ್ರೀನಿವಾಸ ಕಲ್ಯಾಣೋತ್ಸವ

ಕೋಲಾರ, ಸೆ.30: ತಿರುಮಲದಲ್ಲಿ ಬ್ರಹ್ಮರಥೋತ್ಸವ ಮುಗಿದ ಬೆನ್ನಲ್ಲೇ ಚಿನ್ನದ ನಗರಿ ಕೋಲಾರದಲ್ಲಿ ಏಳುಮಲೆಯಪ್ಪನ ಕಲ್ಯಾಣ ಮಹೋತ್ಸವ ಮಾಡಲು ಬಂಗಾರಪೇಟೆಯ ಶ್ರೀನಿವಾಸ ಕಲ್ಯಾಣೋತ್ಸವ ಸಮಿತಿ ಮುಂದಾಗಿದೆ. ಅ.4 ರಂದು ನಡೆಯಲಿರುವ ಕಲ್ಯಾಣೋತ್ಸವಕ್ಕೆ ತಿರುಮಲ ತಿರುಪತಿ ದೇವಸ್ಥಾನ ಮತ್ತು ಧರ್ಮ ಪ್ರಚಾರ ಸಮಿತಿ ಬೆಂಗಾವಲಾಗಿ ನಿಂತಿದೆ ಎಂದು ಸಮಿತಿಯ ಮಖ್ಯಸ್ಥ ಪಲ್ಲವಿ ಮಣಿ ತಿಳಿಸಿದ್ದಾರೆ.

ನಗರದ ಎಪಿಎಂಸಿ ಯಾರ್ಡ್ ನ ಮುಂಭಾಗದ ವೈಕುಂಠ ಆವರಣದಲ್ಲಿ ಸಂಜೆ 4 ರಿಂದ 8.30 ರವರೆಗೆ ಕಲ್ಯಾಣೋತ್ಸವ ಜರುಗಲಿದೆ. ಸುಮಾರು 40 ಲಕ್ಷ ರು ವೆಚ್ಚದಲ್ಲಿ 10 ಎಕರೆ ಜಾಗದಲ್ಲಿ 100 X 200 ಅಡಿ ವೇದಿಕೆ ನಿರ್ಮಾಣವಾಗುತ್ತಿದೆ. ಕಳೆದ ಬಾರಿ ಬೆಂಗಳೂರಿನ ಅರಮನೆ ಮೈದಾನದಲ್ಲಿ ನಡೆದ ಶ್ರೀನಿವಾಸ ಕಲ್ಯಾಣೋತ್ಸವ ಭರ್ಜರಿ ಯಶಸ್ಸು ಕಂಡಿತ್ತು.

ಸುಮಾರು50 ಸಾವಿರ ಭಕ್ತಾದಿಗಳು ಆಗಮಿಸುವ ನಿರೀಕ್ಷೆಯಿದ್ದು, ಆಸ್ತಿಕರಿಗೆ ಯಾವುದೇ ತೊಂದರೆ ಆಗದಿರಲೆಂದು ಕೆಎಸ್ ಆರ್ ಟಿಸಿ ಹಾಗೂ ಖಾಸಗಿ ಬಸ್ ಗಳು ವಿಶೇಷ ವ್ಯವಸ್ಥೆ ಮಾಡಲಿವೆ.ತಿರುಪತಿಯಿಂದ ಲಡ್ಡು ತರಿಸಲಾಗುತ್ತಿದ್ದು, ಭಾರಿ ಬೇಡಿಕೆ ಬಂದಿದೆ ಎನ್ನಲಾಗಿದೆ.

ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಟಿಟಿಡಿ ಮುಖ್ಯಸ್ಥ ಡಿಕೆ ಆದಿಕೇಶವಲು, ಕಾರ್ಯಕಾರಿ ಅಧಿಕಾರಿ ಕೃಷ್ಣರಾವ್, ಪಿವಿಎಸ್ ರಾಮಕೃಷ್ಣ,ಡಾ. ವಿಜಯ ರಾಘವಾಚಾರ್ಲು ಸೇರಿದಂತೆ ಪ್ರಮುಖರು ಭಾಗವಹಿಸಲಿದ್ದಾರೆ ಎಂದು ಸಮಿತಿಯ ಮುಖ್ಯಸ್ಥ ಪಲ್ಲವಿ ಮಣಿ ಹೇಳಿದರು.
(ಏಜೆನ್ಸೀಸ್)