ಎಸ್ ಬಿಐ ನೌಕರಿಗೆ ಹರಿದುಬಂದ ಅರ್ಜಿಗಳ ಸುನಾಮಿ

ಮುಂಬೈ, ಸೆ. 22 : ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ನೀಡಿದ ಒಂದು ಜಾಹೀರಾತು ಭಾರತ ಸದ್ಯಕ್ಕೆ ಎದುರಿಸುತ್ತಿರುವ ಆರ್ಥಿಕ ಬಿಕ್ಕಟ್ಟಿನ ಇನ್ನೊಂದು ಮಗ್ಗುಲನ್ನು ತೆರೆದಿಟ್ಟಿದೆ. ದೇಶ ಎದುರಿಸುತ್ತಿರುವ ನಿರುದ್ಯೋಗದ ಪೆಡಂಭೂತವನ್ನು ಈ ಒಂದು ಜಾಹೀರಾತು ಜಗಜ್ಜಾಹೀರಾತು ಮಾಡಿದೆ.

ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಖಾಸಗಿ ಬ್ಯಾಂಕುಗಳು ಸೇರಿದಂತೆ ರಾಷ್ಟ್ರೀಕೃತ ಬ್ಯಾಂಕುಗಳು ಕೂಡ ಒಂದೆರಡು ವರುಷಗಳಿಂದ ನೇಮಕಾತಿಯನ್ನು ಸಂಪೂರ್ಣವಾಗಿ ನಿಲ್ಲಿಸಿದ್ದವು. ಕಳೆದ ತಿಂಗಳು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಮತ್ತೆ ನೇಮಕಾತಿ ಪ್ರಾರಂಭಿಸಿರುವುದಾಗಿ ಒಂದು ಜಾಹೀರಾತು ನೀಡಿತ್ತು.

ಭರ್ತಿಯಾಗಲಾಗದ 11 ಸಾವಿರ ಗುಮಾಸ್ತ ಹುದ್ದೆಗಳಿಗೆ ರಾಷ್ಟ್ರದ ಎಲ್ಲೆಡೆಗಳಿಂದ ಅರ್ಜಿಗಳನ್ನು ಆಹ್ವಾನಿಸಿತ್ತು. ಇದಕ್ಕೆ ಭಾರತದ ಇತಿಹಾಸದಲ್ಲಿಯೇ ಹಿಂದೆಂದೂ ಕಾಣದಂತಹ ಪ್ರತಿಸ್ಪಂದನ ವ್ಯಕ್ತವಾಗಿದೆ. 11 ಸಾವಿರ ಹುದ್ದೆಗಳಿಗೆ 36.11 ಲಕ್ಷ ಅರ್ಜಿಗಳು ಸುನಾಮಿಯಂತೆ ಹರಿದುಬಂದಿವೆ.

ಜಾಗತಿಕ ಆರ್ಥಿಕ ಹಿಂಜರಿತ ದುಡಿಯುವ ಕೈಗಳನ್ನು ತತ್ತರಿಸುವಂತೆ ಮಾಡಿದೆ. ವೆಚ್ಚ ಕಡಿತದಿಂದಾಗಿ ಲಕ್ಷಲಕ್ಷ ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದರೆ, ಹೊಸದಾಗಿ ಪದವಿ ಪಡೆದವರು ಕೆಲಸವಿಲ್ಲದೆ ಖಾಲಿ ಕುಳಿತುಕೊಳ್ಳುವಂತಾಗಿದೆ. ಉದ್ಯೋಗಕ್ಕಾಗಿ ಭಾರತದ ಯುವಜನತೆ ಚಾತಕ ಪಕ್ಷಿಗಳಂತೆ ಕಾದು ಕುಳಿತಿರುವುದಕ್ಕೆ ಈ ಮಹಾಪೂರವೇ ಸಾಕ್ಷಿ. ವಿಪರ್ಯಾಸದ ಸಂಗತಿಯೆಂದರೆ, ಹೆಚ್ಚಿನ ಅರ್ಜಿದಾರರು ಸ್ನಾತಕೋತ್ತರ ಪದವೀಧರರು ಮತ್ತು ಎಂಬಿಎ ಗ್ರಾಜುಯೇಟ್ ಗಳು!

(ದಟ್ಸ್ ಕನ್ನಡ ವಾರ್ತೆ)