ಸೆ.12 ರಂದು ನಗರದಲ್ಲಿ ಟ್ವಿಟ್ಟೋತ್ಸವ

ಬೆಂಗಳೂರು, ಸೆ. 10 : ವಿಶ್ವಾದ್ಯಂತ ಸುಮಾರು 200 ನಗರಗಳಲ್ಲಿ ಟ್ವಿಟ್ಟರ್ ಬಳಕೆದಾರ ಸಭೆಯನ್ನು ಆಯೋಜಿಸಿಲಾಗಿದ್ದು, ಬೆಂಗಳೂರಿನಲ್ಲಿ ಟ್ವಿಟ್ಟರ್ ಬಳಕೆದಾರರ ಸಭೆಯನ್ನು ಶನಿವಾರ ಸಂಜೆ ಇಂದಿರಾನಗರದಲ್ಲಿ ಕರೆಯಲಾಗಿದೆ. ಡ್ರೀಮ್ ಎ ಡ್ರೀಮ್ ಎಂಬ ಎನ್ ಜಿಓ ಈ ಸಭೆಯನ್ನು ಆಯೋಜಿಸಿದ್ದು, ಬಡ ಹಾಗೂ ಅನಾಥ ಮಕ್ಕಳ ಹಸಿವು ನೀಗಿಸಲು ಧನಸಹಾಯ ಮಾಡುವ ಮನಸ್ಸಿದ್ದರೆ ನೀವು ಕೂಡಾ ಸಭೆಯಲ್ಲಿ ಪಾಲ್ಗೊಳ್ಳಬಹುದು.

ದೇಶದ ದೆಹಲಿ, ಚೆನ್ನೈ, ಮುಂಬೈ, ಕೊಲ್ಕತ್ತಾ ಮತ್ತು ಬೆಂಗಳೂರಿನಲ್ಲಿ ಟ್ವಿಟ್ಟರ್ ಉತ್ಸವ ಆಯೋಜಿಸಲಾಗಿದ್ದು, ಟ್ವಿಟ್ಟರ್ ಬಳಕೆದಾರರು ಈ ಸಭೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ. ಡ್ರೀಮ್ ಎ ಡ್ರೀಮ್ ಸರಕಾರೇತರ ಸಂಸ್ಥೆ ಇದರ ಉಸ್ತುವಾರಿ ವಹಿಸಿಕೊಂಡಿದ್ದು, ಬಡಮಕ್ಕಳು ಹಾಗೂ ಅನಾಥ ಮಕ್ಕಳ ಹೊಟ್ಟೆ ತುಂಬಿಸುವ ಕೆಲಸ ಹಮ್ಮಿಕೊಂಡಿದ್ದು, ಟ್ವಿಟ್ಟರ್ ಬಳಕೆದಾರರು ತಮ್ಮ ಕೈಲಾದಷ್ಟು ಧನಸಹಾಯ ಮಾಡುವಂತೆ ಕೋರಲಾಗಿದೆ.

ಸಾಮಾಜಿಕ ಕಳಕಳಿಯಿಟ್ಟುಕೊಂಡು 1999ರಲ್ಲಿ ಡ್ರೀಮ್ ಎ ಡ್ರೀಮ್ ಸಂಸ್ಥೆಯನ್ನು ಹುಟ್ಟುಹಾಕಲಾಗಿದ್ದು, ವರ್ಷಕ್ಕೆ ತಲಾ ಎರಡು ಬಾರಿ ಇಂತಹ ಸಾಮಾಜಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತೇವೆ. ಫೆಬ್ರವರಿಯಲ್ಲಿ ಜಾಗತಿಕ ಮಟ್ಟದಲ್ಲಿರುವ ಸಮಸ್ಯೆಯ ಬಗ್ಗೆ ಸ್ಪಂದಿಸುತ್ತೇವೆ. ಸೆಪ್ಟೆಂಬರ್ ತಿಂಗಳಲ್ಲಿ ಆಯಾ ಪ್ರದೇಶದ ಜ್ವಲಂತ ಸಮಸ್ಯೆಯ ನಿವಾರಣಯ ಬಗ್ಗೆ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗುತ್ತದೆ. ಸೆ.12 ರಂದು ಇಂದಿರಾನಗರದಲ್ಲಿ ಟ್ವಿಟ್ಟರ್ ಬಳಕೆದಾರರ ಸಭೆಯನ್ನು ಕರೆಯಾಗಿದ್ದು, ಮೂಲಭೂತ ಸೌಲಭ್ಯಗಳಿಂದ ವಂಚಿತರಾಗಿರುವ ಮಕ್ಕಳ ಹೊಟ್ಟೆ ತುಂಬಿಸಲು ಕೈಲಾದಷ್ಟು ಸಹಾಯ ಮಾಡಿ ಎಂದು ಕೇಳಿಕೊಳ್ಳಲಾಗಿದೆ ಎಂದು ಸಂಸ್ಥೆಯ ಕೋಆರ್ಡಿನೇಟರ್ ಋಷಿ ತೋಟ ತಿಳಿಸಿದ್ದಾರೆ.

ಶನಿವಾರದ ಸಭೆಯಲ್ಲಿ ಟ್ವಿಟ್ಟರ್ ಬಳಕೆದಾರರು ಭಾಗವಹಿಸಲಿದ್ದಾರೆ. ಸಭೆಗೆ ಟ್ವಿಟ್ ಮೀಟ್ ಗೀವ್ ಎಂದು ಹೆಸರಿಡಲಾಗಿದೆ. ಸೌಲಭ್ಯದಿಂದ ವಂಚಿತಗಾಗಿರುವ ಮಕ್ಕಳ ಭವಿಷ್ಯ ರೂಪಿಸಲು ತಾವು ನೀಡುವ ಹಣ ಉಪಯೋಗವಾಗಬಹುದು. ಸಭೆಯಲ್ಲಿ ರಾಕ್ ಶೋ ಕಾರ್ಯಕ್ರಮವನ್ನು ಏರ್ಪಡಿಸಲಾಗಿದೆ. ಇದಕ್ಕಾಗಿ ಅತಿ ಕಡಿಮೆ ಬೆಲೆಯಲ್ಲಿ ಟಿಕೆಟ್ ದರವನ್ನು ನಿಗದಿಪಡಿಸಲಾಗಿದೆ. ಟಿಕೆಟ್ ಹಣ ಮಕ್ಕಳು ಅಭ್ಯುದಯಕ್ಕೆ ಬಳಸಲಾಗುತ್ತದೆ. ಈ ಸಂದರ್ಭದಲ್ಲಿ ಕಳೆದ 10 ವರ್ಷದಿಂದ ಸಂಸ್ಥೆ ಮಾಡಿಕೊಂಡು ಬಂದಿರುವ ಸಾಮಾಜಿಕ ಕೆಲಸಗಳ ಸ್ಥೂಲ ಪರಿಚಯವನ್ನು ಸಭೆಯ ಮುಂದಿಡಲಾಗುವುದು ಎಂದು ತೋಟ ವಿವರಿಸಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)