ವಿಶ್ವ ಗಾಲಿಕುರ್ಚಿ,ಅಂಗವಿಕಲರ ಕ್ರೀಡಾಕೂಟ

ಬೆಂಗಳೂರು, ಸೆ. 7 : ವಿಶ್ವ ಗಾಲಿಕುರ್ಚಿ ಮತ್ತು ಅಂಗವಿಹೀನರ ಕ್ರೀಡಾಕೂಟ-2009,ನವೆಂಬರ್ 22 ರಿಂದ ಡಿಸೆಂಬರ್ 2 ರವರೆಗೆ ಬೆಂಗಳೂರಿನಲ್ಲಿ ನಡೆಯಲಿದೆ. 62 ದೇಶಗಳಿಂದ ಸುಮಾರು 1200 ಕ್ರೀಡಾಪಟುಗಳು ಈ ಕೂಟದಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆಯಿದೆ. ಪ್ಯಾರಲಿಂಪಿಕ್ ಕಮಿಟಿ ಆಫ್ ಇಂಡಿಯದ (PCI)ಅಧ್ಯಕ್ಷ ರತನ್ ಸಿಂಗ್ ಈ ವಿಷಯವನ್ನು ಇಂದು ಇಲ್ಲಿ ಸುದ್ದಿಗಾರರಿಗೆ ತಿಳಿಸಿದರು.

ಒಟ್ಟು ಹನ್ನೊಂದು ವಿಭಾಗಗಳಲ್ಲಿ ಸ್ಪರ್ಧಾತ್ಮಕ ಕ್ರೀಡೆಗಳನ್ನು ಸಂಯೋಜಿಸಲಾಗಿದೆ. ಗಾಲಿ ಕುರ್ಚಿ ರೇಸ್, ಅಥ್ಲೆಟಿಕ್ಸ್, ಈಜು, ಬಿಲ್ಲು, ವಾಲಿಬಾಲ್, ಬ್ಯಾಡ್ ಮಿಟನ್ ಮತ್ತಿತರ ಅಂಗವಿಕಲರಿಗೆ ಸರಿಹೊಂದುವ ಆಟೋಟ ಸ್ಪರ್ಧೆಗಳು ಕ್ರೀಡಾಕೂಟದಲ್ಲಿ ಇರುತ್ತವೆ. ಈ ಕೂಟಕ್ಕೆ ಅಗತ್ಯವಾಗುವ ಎಲ್ಲ ನೆರವುಗಳನ್ನು ನೀಡಲು ಕರ್ನಾಟಕ ಸರಕಾರ ಉತ್ಸುಕವಾಗಿದೆ ಎಂದು ಸುದ್ದಿಗೋಷ್ಟಿಯಲ್ಲಿ ಹಾಜರಿದ್ದ ರಾಜ್ಯ ಕ್ರೀಡಾ ಸಚಿವ ಗೂಳಿಹಟ್ಟಿ ಶೇಖರ್ ಹೇಳಿದರು.

ಕೂಟಕ್ಕೆ ಸುಮಾರು 22 ಕೋಟಿ ರೂಪಾಯಿ ವೆಚ್ಚವಾಗಲಿದೆ. ರಾಜ್ಯ, ಕೇಂದ್ರ ಸರಕಾರಗಳ ಧನ ಸಹಾಯವಲ್ಲದೆ, ಸ್ವತಃ ಅಂಗವಿಹೀನರ ಭಾರತೀಯ ಕ್ರೀಡಾ ಸಂಸ್ಥೆ ( IAWS)ತನ್ನ ಹಣ ಖರ್ಚುಮಾಡುತ್ತದೆ. ಕೂಟದ ಸಂಘಟನೆಯ ಉಸ್ತುವಾರಿ ಹೊತ್ತಿರುವ CIM ನಿಧಿ ಕೂಡಿಸುತ್ತದೆ ಎಂದು ರತನ್ ಸಿಂಗ್ ಹೇಳಿದರು. ಇದೇ ಸಂದರ್ಭದಲ್ಲಿ ಕೂಟದ ಲಾಂಛನ ಮತ್ತು ಮಾಹಿತಿ ಪುಸ್ತಕವನ್ನು ಬಿಡುಗಡೆ ಮಾಡಲಾಯಿತು.

(ದಟ್ಸ್ ಕನ್ನಡ ಕ್ರೀಡಾವಾರ್ತೆ)