ಹಂದಿಜ್ವರಕ್ಕೆ ಮತ್ತೆ ನಾಲ್ಕು ಬಲಿ

ಬೆಂಗಳೂರು, ಆ. 27 : ಎಚ್1 ಎನ್1 ಪಿಡುಗು ದಿನದಿಂದ ದಿನಕ್ಕೆ ವ್ಯಾಪಿಸುತ್ತಿದ್ದು, ನಿಯಂತ್ರಣಕ್ಕೆ ಬರುವ ಸಾಧ್ಯತೆಗಳು ಗೋಚರಿಸುತ್ತಿಲ್ಲ. ಆರೋಗ್ಯ ಸಚಿವ ಶ್ರೀರಾಮುಲು ಕೈಗೊಂಡಿರುವ ಎಲ್ಲ ಕ್ರಮಗಳು ಹೊಳೆಯಲ್ಲಿ ಹುಣಿಸಿಹಣ್ಣು ತೊಳೆದ ಹಾಗಾಗಿದೆ. ನಗರದ ವಿವಿಧ ಆಸ್ಪತ್ರೆಗಳು ಸೇರಿ ಎಚ್ 1ಎನ್ ಸೋಂಕಿನಿಂದ ಮತ್ತೆ ನಾಲ್ಕು ಮಂದಿ ಸಾವನ್ನಪ್ಪಿರುವ ದಾರುಣ ಘಟನೆ ಬುಧವಾರ ಒಂದೇ ದಿನ ನಡೆದಿದೆ.

ಕೆಂಪೇಗೌಡ ರಸ್ತೆಯ ಸೇಂಟ್ ಮಾರ್ಥಾಸ್ ಆಸ್ಪತ್ರೆಯಲ್ಲಿ ಪುಷ್ಪ ಲತಾ (35), ಜಯನಗರದ ಸಾಗರ್ ಆಸ್ಪತ್ರೆಯಲ್ಲಿ ನಾಗರಾಜು (38), ಚಾಮರಾಜಪೇಟೆ ಸಮೀಪದ ಕಿಮ್ಸ್ ಆಸ್ಪತ್ರೆಯಲ್ಲಿ ವೆಂಕಟೇಶ್ (45) ಮತ್ತು ಸೇಂಟ್ ಪಿಲೋಮಿನಾ ಆಸ್ಪತ್ರೆಯಲ್ಲಿ ಪಿ ಮುನಿರತ್ನಂ (48) ಮೃತಪಟ್ಟಿದ್ದಾರೆ.

ತೀವ್ರ ನ್ಯೂಮೋನಿಯಾ ಬಳಲುತ್ತಿದ್ದ ಚಂದ್ರಾ ಬಡಾವಣೆಯ ನಿವಾಸಿ ಪುಷ್ಪಲತಾ ಅವರು ಆಗಸ್ಟ್ 23 ರಂದು ನಮ್ಮ ಆಸ್ಪತ್ರೆಗೆ ದಾಖಲಾಗಿದ್ದರು. ಇದಕ್ಕೂ ಮುನ್ನ ಬೇರೆ ಕಡೆ ಚಿಕಿತ್ಸೆ ಪಡೆದರೂ ಅವರು ಗುಣಮುಖರಾಗಿರಲಿಲ್ಲ ಎಂದು ಸೇಂಟ್ ಮರ್ಥಾಸ್ ಆಸ್ಪತ್ರೆಯ ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)