ಆಸ್ಟ್ರೇಲಿಯಾ : ಭಾರತೀಯ ಪತ್ರಕರ್ತೆಗೆ ಗೂಸಾ

ಮೆಲ್ಬೋರ್ನ್, ಜು. 27 : ಶಿಕ್ಷಣಕ್ಕೆ ಸಂಬಂಧಿಸಿದಂತೆ ನಡೆಯುತ್ತಿರುವ ಭಾರಿ ಹಗರಣವನ್ನು ಬಯಲಿಗೆಳೆಯಲು ಮುಂದಾದ ಭಾರತೀಯ ಮೂಲದ ಎಬಿಸಿ ಟಿವಿ ಪತ್ರಕರ್ತೆಯೊಬ್ಬರನ್ನು ತೀವ್ರವಾಗಿ ಥಳಿಸಿದ್ದಲ್ಲದೇ ಜೀವ ಬೆದರಿಕೆ ಹಾಕಿರುವ ಘಟನೆ ಆಸ್ಟ್ರೇಲಿಯಾದಲ್ಲಿ ಭಾನುವಾರ ನಡೆದಿದೆ.

ದೇಶ ವಿದೇಶಗಳಿಂದ ಉನ್ನತ ವಿದ್ಯಾಭ್ಯಾಸಕ್ಕೆಂದು ಇಲ್ಲಿಗೆ ಆಗಮಿಸುವ ವಿದ್ಯಾರ್ಥಿಗಳಿಂದ ಹಣ ಪಡೆದು ನಕಲಿ ಅಂಕಪಟ್ಟಿ ನೀಡುತ್ತಿರುವ ಪ್ರಕರಣಗಳು ಹೆಚ್ಚಾಗಿದ್ದು, ಈ ಹಗರಣ ಬಯಲಿಗೆಳೆಯಲು ಎಬಿಸಿ ಟಿವಿ ಪತ್ರಕರ್ತೆ ಮಾರುವೇಶದಲ್ಲಿ ತೆರಳಿ ಹಣ ನೀಡುತ್ತೇನೆ, ತಮಗೂ ನಕಲಿ ಅಂಕಪಟ್ಟಿ ಹಾಗೂ ಅನುಭವ ಪಡೆದ ಪ್ರಮಾಣ ಪತ್ರ ಬೇಕು ಎಂದು ಮನವಿ ಮಾಡಿಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ಗೊತ್ತಾಗದಂತೆ ವರದಿಯ ಚಿತ್ರೀಕರಣ ಮಾಡುತ್ತಿರುವಾಗ ಪತ್ರಕರ್ತೆಯ ಮೇಲೆ ದಾಳಿ ನಡೆದಿದ್ದು, ಅವರನ್ನು ಮನಬಂದಂತೆ ಥಳಿಸಲಾಗಿದೆ. ಜೊತೆಗೆ ನಮ್ಮ ತಂಟೆಗೆ ಬಂದರೆ ಸುಮ್ಮನೆ ಬಿಡುವುದಿಲ್ಲ ಎಂಬ ಜೀವ ಬೆದರಿಕೆಯನ್ನೂ ಹಾಕಿದ್ದಾರೆ ಎನ್ನಲಾಗಿದೆ.

ಎಬಿಸಿ ಟಿವಿಯಲ್ಲಿ ಫೋರ್ ಕಾರ್ನರ್ ಎಂಬ ಸಂಚಿಕೆಯಲ್ಲಿ ಪ್ರಸಾರ ಮಾಡುವುದಕ್ಕಾಗಿ ಈ ಹಗರಣದ ವರದಿಗೆ ಪತ್ರಕರ್ತೆ ಮುಂದಾಗಿದ್ದರು ಎನ್ನಲಾಗಿದೆ. ದಾಳಿ ನಡೆಸಿದವರು, ವಿದ್ಯಾರ್ಥಿಗಳೂ ಅಥವಾ ಹರಗಣದ ರೂವಾರಿಗಳೂ ಎನ್ನುವುದು ತಿಳಿದು ಬಂದಿಲ್ಲ. ಕಳೆದ ತಿಂಗಳು ಭಾರತೀಯ ವಿದ್ಯಾರ್ಥಿಗಳ ಮೇಲೆ ಜನಾಂಗೀಯ ಹಲ್ಲೆ ನಡೆದಿರುವ ಬೆನ್ನಲ್ಲೇ ಪರ್ತಕರ್ತೆಯ ಮೇಲೆ ದಾಳಿ ನಡೆದಿರುವುದು ಆತಂಕದ ಸಂಗತಿಯಾಗಿದೆ.

(ಏಜನ್ಸೀಸ್)