ಹಿಂದು ದೇವಾಲಯಕ್ಕೆ ಮುಸ್ಲಿಂ ಅರ್ಚಕ !!

ಪಹಲ್ ಗಮ್ (ಜಮ್ಮು ಕಾಶ್ಮೀರ), ಜು. 8 : ಕಾಶ್ಮೀರದಂತ ಬಹುಸಂಖ್ಯಾತ ಮುಸ್ಲಿಮರು ವಾಸಿಸುವ ರಾಜ್ಯದಲ್ಲಿ ಶಿವ ದೇವಾಲಯಕ್ಕೆ ಮುಸ್ಲಿಂ ವ್ಯಕ್ತಿಗಳು ಅರ್ಚಕರಾಗಿ ಹಿಂದು ಸಂಪ್ರದಾಯದಂತೆ ಪೂಜೆ, ಅರ್ಚನೆ ಮಾಡುವ ಮೂಲಕ ಸರ್ವಧರ್ಮ ಸಹಿಷ್ಣತೆಯನ್ನು ಮರೆಯುತ್ತಿರುವ ಸಂಗತಿಯೊಂದು ಬೆಳಕಿಗೆ ಬಂದಿದೆ.

ಕಾಶ್ಮೀರ ಕಣಿವೆಯ ಲಿಡ್ಡರ್ ನದಿ ದಂಡೆಯ ಮೇಲಿರುವ ಸುಮಾರು 900 ವರ್ಷಗಳ ಹಳೆಯದಾದ ಶಿವ ದೇವಾಲಯಕ್ಕೆ ಕಳೆದ ಹಲವು ವರ್ಷಗಳಿಂದ ಮೊಹ್ಮದ್ ಅಬ್ಧುಲ್ಲಾ ಮತ್ತು ಗುಲಾಮ್ ಹಸನ್ ಎಂಬಿಬ್ಬರು ನಿತ್ಯವೂ ಹಿಂದು ಸಂಪ್ರದಾಯದಂತೆ ಪೂಜೆ ಸಲ್ಲಿಸುತ್ತಿದ್ದಾರೆ. ಹಿಂದು ಪಂಡಿತರ ವಿರುದ್ಧ ದಾಳಿಗಳು ಮುಂದುವರೆದ ಹಿನ್ನೆಲೆಯಲ್ಲಿ ಅಲ್ಲಿಂದ ಪಂಡಿತರು ಒಕ್ಕಲೆಳಬೇಕಾದ ಅನಿವಾರ್ಯತೆ ಉಂಟಾಯಿತು. ಆಗ ದೇವಾಲಯವನ್ನು ನೋಡಿಕೊಳ್ಳುವವರು ಇಲ್ಲದೇ ಅನಾಥವಾಗಿತ್ತು.

ಪಂಡಿತರು ಇಲ್ಲಿಂದ ಒಕ್ಕಲೆದ್ದ ಮೇಲೆ ಹಳೆಯದಾದ ಶಿವ ದೇವಾಲಯದ ಅನಾಥವಾಗಿತ್ತು. ಆದನ್ನು ರಕ್ಷಿಸಬೇಕು ಎಂದು ನಿರ್ಧರಿಸಿದೆವು. ರಕ್ಷಣೆಯ ಜೊತೆಗೆ ಹಿಂದು ಸಂಪ್ರದಾಯದಂತೆ ನಿತ್ಯ ಶಿವನಿಗೆ ಆರತಿ ಎತ್ತಿ ಪೂಜೆ ಮಾಡುತ್ತೇವೆ ಎಂದು ಮುಖ್ಯ ಅರ್ಚಕ ಗುಲಾಮ್ ಹಸನ್ ಹೇಳುತ್ತಾರೆ. ಪ್ರತಿ ನಿತ್ಯ ಈ ದೇವಾಲಯಕ್ಕೆ ನೂರಾರು ಭಕ್ತರು ಭೇಟಿ ನೀಡುತ್ತಾರೆ. ಎಲ್ಲರೂ ಪ್ರಸಾದ ಸ್ವೀಕರಿಸಿಯೇ ಹೊರಡುತ್ತಾರೆ. 3 ಅಡಿ ಎತ್ತರದ ಶಿವನ ಮೂರ್ತಿ ಇದೆ ಎಂದು ಅವರು ಹೇಳುತ್ತಾರೆ.

ಅಮರನಾಥ ಯಾತ್ರೆ ತೆರಳುವ ಭಕ್ತರು ಈ ಶಿವ ದೇವಾಲಯಕ್ಕೆ ಭೇಟಿ ನೀಡಿಯೇ ಮುಂದಕ್ಕೆ ಸಾಗುತ್ತಾರೆ. ಪಂಡಿತರು ಇಲ್ಲಿಂದ ಹೊರಟುಹೋದ ಮೇಲೆ ಶಿವ ದೇವಾಲಯವನ್ನು ಅಲ್ಲಿನ ಸರಕಾರ ವಶಪಡಿಸಿಕೊಂಡು ಅಭಿವೃದ್ಧಿಪಡಿಸಿದೆ.

(ಏಜನ್ಸೀಸ್)