ಮರ್ಸಿಡಿಸ್ ಬೆಂಜ್ ಬಸ್ ಸಂಚಾರಕ್ಕೆ ಅಶೋಕ್ ಚಾಲನೆ

ಬೆಂಗಳೂರು, ಜೂ. 22 : ಮರ್ಸಿಡಿಸ್ ಬೆಂಜ್ ಬಸ್ಸಿನಲ್ಲಿ ಪ್ರಯಾಣಿಸುವ ಆಸೆ ಇದೆಯೇ ? ಮರ್ಸಿಡಿಸ್ ಬೆಂಜ್ ಎಂಬ ಶ್ರೀಮಂತರೇ ಓಡಾಡುವಂತಹ ವಾಹನಗಳಲ್ಲಿ ಜನಸಾಮಾನ್ಯರೂ ಪ್ರಯಾಣ ಮಾಡುವ ಸುಯೋಗವನ್ನು ಯಡಿಯೂರಪ್ಪ ನೇತೃತ್ವದ ಬಿಜೆಪಿ ಕಲ್ಪಿಸಲು ಮುಂದಾಗಿದೆ. ಸದ್ಯಕ್ಕೆ ಪ್ರಾಯೋಗಿಕವಾಗಿ ಬೆಂಗಳೂರು-ಮೈಸೂರು ಮಧ್ಯೆ ಮರ್ಸಿಡಿಸ್ ಬಸ್ ಸಂಚಾರವನ್ನು ಆರಂಭಿಸಲಾಗಿದ್ದು, ಇದರ ಸಾಧಕ ಬಾಧಕಗಳನ್ನು ಅವಲೋಕಿಸಿ ಇದರ ಸೇವೆಯನ್ನು ವಿಸ್ತರಿಸಲಾಗುವುದು ಎಂದು ಸರಕಾರ ಹೇಳಿದೆ.

ಸೋಮವಾರ ಬೆಂಗಳೂರಿನಲ್ಲಿ ಮರ್ಸಿಡಿಸ್ ಬೆಂಜ್ ನ ಬಸ್ಸಿನ ನೂತನ ಸಂಚಾರಕ್ಕೆ ಪೂಜೆ ಸಲ್ಲಿಸುವ ಮೂಲಕ ಉದ್ಘಾಟಿಸಿದ ಸಾರಿಗೆ ಸಚಿವ ಆರ್ ಅಶೋಕ್, ಮರ್ಸಿಡಿಸ್ ಬಸ್ ನಂತಹ ಶ್ರೀಮಂತರೇ ಪ್ರಯಾಣಿಸುವ ವಾಹನಗಳಲ್ಲಿ ಜನಸಾಮಾನ್ಯರೂ ಪ್ರಯಾಣಿಸಲಿ ಎಂಬ ಸದುದ್ದೇಶದಿಂದ ಸರಕಾರ ಬೆಂಜ್ ಬಸ್ಸಿನ ಸೇವೆ ಆರಂಭಿಸಿದೆ. ಪ್ರಾಯೋಗಿಕವಾಗಿ ಬೆಂಗಳೂರು ಮತ್ತು ಮೈಸೂರು ನಡುವೆ ಬೆಂಜ್ ಬಸ್ಸು ತನ್ನ ಸಂಚಾರ ಆರಂಭಿಸಲಿದೆ. ಜವಸಾಮಾನ್ಯರ ಪ್ರತಿಕ್ರಿಯೆ ನೋಡಿಕೊಂಡು ಸೂಕ್ತವಾಗಿ ಇದರ ಸೇವೆಯನ್ನು ರಾಜ್ಯಾದ್ಯಂತ ವಿಸ್ತರಣೆ ಮಾಡಲಾಗುವುದು ಎಂದು ಅವರು ಹೇಳಿದರು.

ಬೆಂಜ್ ಬಸ್ಸಿನ ದರ ಸದ್ಯ ಬೆಂಗಳೂರು-ಮೈಸೂರು ಮಧ್ಯೆ ಸಂಚಾರ ಮಾಡುತ್ತಿರುವ ವೋಲ್ವೋ ಬಸ್ಸಿನ ದರವನ್ನೇ ನಿಗದಿಪಡಿಸಲಾಗಿದೆ. ಒಂದೇ ಬಸ್ಸನ್ನು ಸಂಚಾರಕ್ಕೆ ಬಿಡಲಾಗಿದೆ. ಇದರ ಸಾಧಕ ಬಾಧಕಗಳ ಅವಲೋಕಿಸಿ ಮುಂದಿನ ತೀರ್ಮಾನ ಕೈಗೊಳ್ಳಲಾಗುವುದು ಎಂದು ಅಶೋಕ್ ಹೇಳಿದರು. ಒಂದು ಮರ್ಸಿಡಿಸ್ ಬಸ್ಸಿನ ಅಂದಾಜು ಬೆಲೆ ಸುಮಾರು 70 ರಿಂದ 75 ಲಕ್ಷ ರುಪಾಯಿ ಆಗಿದೆ. ಗಂಟೆಗೆ 125 ಕಿಮೀ ಓಡಲಿದೆ. 45 ಸೀಟುಗಳನ್ನು ಈ ಬಸ್ ಹೊಂದಿದೆ. ಆದರೆ, ರಾಜ್ಯದ ರಸ್ತೆಗಳ ಸ್ಥಿತಿ ಹೇಗಿವೆ ಎಂಬುದನ್ನು ಸರಕಾರ ಗಮನಿಸಬೇಕು ಎಂಬುದು ಕೆಲವರ ಅಭಿಪ್ರಾಯವಾಗಿದೆ.

(ದಟ್ಸ್ ಕನ್ನಡ ವಾರ್ತೆ)