ಟಿ20 ಫೈನಲ್ ನಲ್ಲಿ ಪಾಕ್ ,ಶ್ರೀಲಂಕಾ ಹಣಾಹಣಿ

ಓವಲ್, ಜೂ. 20: ಶುಕ್ರವಾರ ನಡೆದ ಟಿ20 ವಿಶ್ವಕಪ್ ಸೆಮಿಫೈನಲ್ ಪಂದ್ಯದಲ್ಲಿ ಶ್ರೀಲಂಕಾ, ವೆಸ್ಟ್ ಇಂಡೀಸ್ ತಂಡವನ್ನು ಭರ್ಜರಿ 57 ರನ್ ಗಳಿಂದ ಸೋಲಿಸಿ ಫೈನಲ್ ಪ್ರವೇಶಿಸಿತು. ಭಾನುವಾರ (ಜೂ 21) ಕ್ರಿಕೆಟ್ ಕಾಶಿ ಲಾರ್ಡ್ಸ್ ಮೈದಾನದಲ್ಲಿ ಶ್ರೀಲಂಕಾ ಮತ್ತು ಪಾಕಿಸ್ತಾನ ಪ್ರಶಸ್ತಿಗಾಗಿ ಸೆಣಸಲಿದೆ. ಒಟ್ಟಿನಲ್ಲಿ ಈ ಬಾರಿ ಕೂಡ ಟಿ20 ವಿಶ್ವಕಪ್ ಏಷ್ಯಾ ಖಂಡದಲ್ಲೇ ಉಳಿಯಲಿದೆ.

ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಶ್ರೀಲಂಕಾಗೆ ಆರಂಭಿಕ ಆಟಗಾರರಾದ ತಿಲಕರತ್ನೆ ದಿಲ್ಶಾನ್ ಮತ್ತು ಜಯಸೂರ್ಯ 73 ರನ್ ಗಳ ಉತ್ತಮ ಅಡಿಪಾಯ ಹಾಕಿಕೊಟ್ಟರು. ಉತ್ತಮ ಆಟ ಪ್ರದರ್ಶಿಸಿದ ದಿಲ್ಶಾನ್ ನಾಲ್ಕು ರನ್ ಗಳಿಂದ ಶತಕ ವಂಚಿತರಾದರು. ಶ್ರೀಲಂಕಾ ನಿಗದಿತ ಓವರ್ ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 158 ರನ್ ಗಳಿಸಿತು.

ಇದಕ್ಕೆ ಉತ್ತರವಾಗಿ ವೆಸ್ಟ್ ಇಂಡೀಸ್ ತನ್ನ ಮೊದಲ ಓವರ್ ನಲ್ಲೇ ಮೂರು ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತು. ನಾಯಕ ಕ್ರಿಸ್ ಗೇಲ್ ಮಾತ್ರ ಪ್ರತಿರೋಧ ತೋರಿ 63 ರನ್ ಗಳಿಸಿದರು. 17.4 ಓವರ್ ಗಳಲ್ಲಿ 101 ರನ್ ಗಳಿಸಲಷ್ಟೇ ಶಕ್ತವಾಗಿ ಸುಲಭವಾಗಿ ಶ್ರೀಲಂಕಾಗೆ ಶರಣಾಯಿತು. ಶ್ರೀಲಂಕಾ ಪರ ಮ್ಯಾಥೀವ್ಸ 3, ಉದಾನ ಮತ್ತು ಮಾಲಿಂಗ ತಲಾ ಒಂದೊಂದು ವಿಕೆಟ್ ಪಡೆದರೆ ಎಂದಿನಂತೆ ತಂಡದ 'ಫಿರ್ಕಿಗಳಾದ' ಮುರಳೀಧರನ್ (3)ಮತ್ತು ಅಜಂತಾ ಮೆಂಡಿಸ್ (2) ವಿಕೆಟ್ ಪಡೆದರು. ತಿಲಕರತ್ನೆ ದಿಲ್ಶಾನ್ ಪಂದ್ಯಶ್ರೇಷ್ಟ ಪ್ರಶಸ್ತಿ ಪಡೆದರು.

(ದಟ್ಸ್ ಕ್ರೀಡಾವಾರ್ತೆ)