ಮತದಾರರ ಪಟ್ಟಿಯಲ್ಲಿ ಚಾವ್ಲಾ ಹೆಸರು ಮಾಯ

ನವದೆಹಲಿ, ಮೇ. 7 : ಮತದಾರರ ಪಟ್ಟಿಯಲ್ಲಿ ಜನರ ಹೆಸರನ್ನು ಸೇರಿಸಬೇಕಾದ ಚುನಾವಣೆ ಆಯುಕ್ತರ ಹೆಸರೇ ಮತದಾರರ ಪಟ್ಟಿಯಲ್ಲಿ ಇಲ್ಲದಿರುವ ಘಟನೆ ಇಂದು ನಡೆದಿದೆ. ಕೇಂದ್ರ ಚುನಾವಣೆ ಮುಖ್ಯಆಯುಕ್ತ ನವೀನ ಚಾವ್ಲಾ ಅವರಿಗೆ ಈ ಅನುಭವವಾಗಿದ್ದು, ಕೆಲಕಾಲ ಅವರೇ ತಬ್ಬಿಬ್ಬುಗೊಳ್ಳುವಂತ ಘಟನೆ ದೆಹಲಿಯ ನಿರ್ಮಾಣ ಭವನದ ಮತಗಟ್ಟೆ ನಂಬರ್ 85ರಲ್ಲಿ ನಡೆದಿದೆ.

ದೆಹಲಿಯ ನಿರ್ಮಾಣ ಭವನದ ಮತಗಟ್ಟೆ ನಂಬರ್ 85ರ ಮತಗಟ್ಟೆಯ ಮತದಾರರ ಪಟ್ಟಿಯಲ್ಲಿ ನವೀನ ಚಾವ್ಲಾ ಅವರ ಹೆಸರಿತ್ತು. ಈ ಹಿನ್ನೆಲೆಯಲ್ಲಿ ಅವರು ಮತ ಚಲಾಯಿಸಲು ಮತಗಟ್ಟೆ ತೆರಳಿದ್ದಾರೆ. ಆಗ ಮತಗಟ್ಟೆ ಅಧಿಕಾರಿಗಳು ನಿಮ್ಮ ಹೆಸರು ಮತದಾರರ ಪಟ್ಟಿಯಿಂದ ತೆಗೆದುಹಾಕಲಾಗಿದೆ ಎಂದಿದ್ದಾರೆ. ಕಳೆದ ತಿಂಗಳು ಕೇಂದ್ರ ಚುನಾವಣೆ ಆಯುಕ್ತರಾಗಿ ಅಧಿಕಾರ ಸ್ವೀಕರಿಸಿದ ನವೀನ ಚಾವ್ಲಾ ತಮ್ಮ ನಿವಾಸ ಬದಲಾಯಿಸಿದ್ದರು. ಈ ಹಿನ್ನೆಲೆಯಲ್ಲಿ ಅವರ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿತ್ತು.

ವ್ಯಕ್ತಿಯೊಬ್ಬ ಯಾವ ಪ್ರದೇಶದಲ್ಲಿ ವಾಸವಿರುತ್ತಾನೆಯೇ ಈ ಪ್ರದೇಶದಲ್ಲಿ ಮಾತ್ರ ಮತ ಚಲಾಯಿಸಬೇಕು ಎನ್ನುವುದು ಆಯೋಗ ನಿಯಮ. ಈ ನಿಯಮ ಆಯೋಗದ ಮುಖ್ಯಸ್ಥರಿಗೂ ಅನ್ವಯಲಾಗಲಿದೆ ಎನ್ನುವುದಕ್ಕೆ ಇದು ಉದಾಹರಣೆ. ನಂತರ ಚಾವ್ಲಾ ಅವರು ಮತಗಟ್ಟೆ ನಂಬರ್ 86ರಲ್ಲಿ ಮತ ಚಲಾಯಿಸಿದರು.

(ಏಜನ್ಸೀಸ್)

ಲೋಕಸಭೆ ಚುನಾವಣೆ2009 ತಾಜಾ ಸುದ್ದಿಗಳು