ಕಸಬ್ ಸೇರಿ ಮೂವರಿಗೆ ವಿರುದ್ದ 86 ಪ್ರಕರಣ

ಮುಂಬೈ, ಮೇ.6 : ಮುಂಬೈ ಸ್ಫೋಟ ಪ್ರಕರಣದಲ್ಲಿ ಸಿಕ್ಕಿಬಿದ್ದಿರುವ ಏಕೈಕ ಉಗ್ರ ಅಜ್ಮಲ್ ಅಮೀರ್ ಕಸಬ್, ಲಷ್ಕರ್ ಇ ತೊಯ್ಬಾ ಸಂಘಟನೆಯ ಕಾರ್ಯಕರ್ತರಾದ ಫಾಹೀಮ್ ಅನ್ಸಾರಿ ಹಾಗೂ ಅಹ್ಮದ್ ಸಬಾವುದ್ದೀನ್ ಅವರ ವಿರುದ್ಧ ಆರೋಪ ಸಾಬೀತಾಗಿದೆ ಎಂದು ನ್ಯಾಯಾಲಯ ದೃಢಪಡಿಸಿದೆ. ಮುಂಬೈ ವಿಶೇಷ ನ್ಯಾಯಾಲಯದ ನ್ಯಾಯಾಧೀಶ ಎಂ ಎಲ್ ತೆಹಿಲಿಯಾನಿ ಅವರು ಈ ಮೂವರು ಉಗ್ರರ ವಿರುದ್ಧ ಆರೋಪ ಪಟ್ಟಿಯಲ್ಲಿನ ವಿವರಗಳನ್ನು ನೀಡಿದರು.

ಈ ಮೂವರು ಉಗ್ರರು ಪಾಕಿಸ್ತಾನ ಬೆಂಬಲಿತ ಲಷ್ಕರ ಇ ತೊಯ್ಬಾ ಸಂಘಟನೆ ಕಾರ್ಯಕರ್ತರಾಗಿದ್ದಾರೆ. ಮುಂಬೈ ಭಯೋತ್ಪಾದನೆ ವೇಳೆಯಲ್ಲಿ ಸಿಕ್ಕಿರುವ ಅಜ್ಮಲ್ ಅಮೀರ್ ಕಸಬ್ ವಿರುದ್ಧ ಪ್ರಮುಖ 7 ಪ್ರಕರಣಗಳನ್ನು ದಾಖಲಿಸಲಾಗಿದೆ. 72 ಮಂದಿ ಕೊಲೆ ಪ್ರಕರಣವೂ ಇದರಲ್ಲಿದೆ. ಅಲ್ಲದೇ ಇನ್ನಿಬ್ಬರಾದ ಫಾಹೀಮ್ ಅನ್ಸಾರಿ, ಹಾಗೂ ಅಹ್ಮದ್ ಸಬಾವುದ್ದೀನ್ ವಿರುದ್ಧ ಪಾಸ್ ಪೋರ್ಟ್ ಫೋರ್ಜರಿ ಸೇರಿ ಒಟ್ಟು ಈ ಮೂರು ಮಂದಿ ವಿರುದ್ಧ 86 ಪ್ರಕರಣಗಳನ್ನು ದಾಖಲಿಸಲಾಗಿದೆ, 166 ಮಂದಿ ಹತ್ಯೆ ಪ್ರಕರಣವೂ ಇದರಲ್ಲಿಯೇ ಸೇರಿದೆ ಎಂದು ನ್ಯಾಯಾಧೀಶರು ವಿವರಿಸಿದರು.

ಈ ಮಧ್ಯೆ ನ್ಯಾಯಾಲಯದಲ್ಲಿ ಪ್ರತಿಕ್ರಿಯೆ ನೀಡಿರುವ ಕಸಬ್, ನಾನು ಪಾಕಿಸ್ತಾನಿ, ನನಗೆ 21 ವರ್ಷ ವಯಸ್ಸು ಎಂದು ಒಪ್ಪಿಕೊಂಡಿದ್ದಾನೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಫೆಡರಲ್ ಬ್ಯೂರೋ ಆಫ್ ಇನ್ ವೆಸ್ಟಿಗೇಷನ್ ಅಧಿಕಾರಿಗಳ ಸಾಕ್ಷಾಧಾರ ಹಾಗೂ ಸುಮಾರು 1200 ಮಂದಿಯನ್ನು ವಿಚಾರಣೆ ನಡೆಸಲಾಗಿದೆ ಎಂದು ನ್ಯಾಯಾಧೀಶರು ಹೇಳಿದರು.

(ಏಜನ್ಸೀಸ್)