ಬಾಂಬ್ ಸ್ಫೋಟ : 6 ಬಿಎಸ್ಎಫ್ ಯೋಧರು ಸಾವು

ರಾಂಚಿ, ಏ. 16 : ಬಂದೋಬಸ್ತ್ ಗೆ ತೆರಳುತ್ತಿದ್ದ ಬಿಎಸ್ ಎಫ್ ಯೋಧರ ಮೇಲೆ ಮಾವೋವಾದಿಗಳು ನೆಲದಲ್ಲಿ ಹುದುಗಿಸಿ ಇಟ್ಟಿದ್ದ ಬಾಂಬ್ ಸ್ಫೋಟಗೊಂಡ 6 ಮಂದಿ ಯೋಧರು ಸ್ಥಳದಲ್ಲಿ ಮೃತಪಟ್ಟಿರುವ ದಾರುಣ ಘಟನೆ ಜಾರ್ಖಂಡ್ ರಾಜ್ಯದ ಲಾಟೆಹಾರ್ ಜಿಲ್ಲೆಯ ಆರಾ ಗ್ರಾಮದಲ್ಲಿ ಇಂದು ಬೆಳಗ್ಗೆ ನಡೆದಿದೆ.

ಬಿಎಸ್ಎಫ್ ಯೋಧರು ಬಸ್ ಮೂಲಕ ಆರಾ ಗ್ರಾಮಕ್ಕೆ ತೆರಳುತ್ತಿದ್ದ ಸಮಯದಲ್ಲಿ ಅರಣ್ಯದ ಪ್ರದೇಶದಲ್ಲಿ ನಕ್ಸಲರು ಹುದುಗಿಸಿಟ್ಟಿದ್ದ ಬಾಂಬ್ ಸ್ಫೋಟಗೊಂಡು ಸ್ಥಳದಲ್ಲಿಯೇ ಎಲ್ಲ ಆರು ಮಂದಿ ಯೋಧರು ಅಸುನೀಗಿದ್ದಾರೆ. ಘಟನೆ ತಿಳಿದ ತಕ್ಷಣ ಹಿರಿಯ ಅಧಿಕಾರಿಗಳು ಘಟನಾ ಸ್ಥಳಕ್ಕೆ ಆಗಮಿಸಿದ್ದು, ಪರಿಶೀಲನೆ ನಡೆಸಿದ್ದಾರೆ ಎಂದು ಲಾಟೆಹಾರ್ ಜಿಲ್ಲಾ ಪೊಲೀಸರು ತಿಳಿಸಿದ್ದಾರೆ. ಬುಧವಾರವಷ್ಟೇ ಬಿಎಸ್ ಎಫ್ ಯೋಧರು ಹಾಗೂ ನಕ್ಸಲರ ನಡುವೆ ನಡೆದ ಗುಂಡಿನ ಕಾಳಗದಲ್ಲಿ 10 ಮಂದಿ ನಕ್ಸಲರನ್ನು ಯೋಧರು ಹೊಡೆದು ಉರುಳಿಸಿದ್ದರು.

(ದಟ್ಸ್ ಕನ್ನಡ ವಾರ್ತೆ)