ಉಗ್ರಕಸಬ್ ನ ಹುಟ್ಟೂರಲ್ಲಿ ಎಫ್ ಬಿಐ ತಂಡ

ಇಸ್ಲಾಮಾಬಾದ್, ಜ. 02 : ಮುಂಬೈ ಭಯೋತ್ಪಾದನೆಯಲ್ಲಿ ಸಿಕ್ಕಿಬಿದ್ದಿರುವ ಏಕೈಕ ಉಗ್ರ ಅಜ್ಮಲ್ ಅಮೀರ್ ಕಸಬ್ ಹುಟ್ಟೂರು ಫರೀದಕೋಟ್ ಗೆ ಅಮೆರಿಕದ ಫೆಡರಲ್ ಬ್ಯೂರೋ ಅಫ್ ಇನ್ ವೆಸ್ಟಿ ಗೇಷನ್(ಎಫ್ ಬಿಐ) ತಂಡ ತೆರಳಿ ತನಿಖೆ ನಡೆಸಿದೆ. ಆದರೆ, ಮುಂಬೈ ಭಯೋತ್ಪಾದನೆಯಲ್ಲಿ ಸಿಕ್ಕಿಬಿದ್ದಿರುವ ಉಗ್ರ ಪಾಕಿಸ್ತಾನದವನಲ್ಲ ಎಂದು ಪಾಕ್ ಸರ್ಕಾರ ವಾದಿಸುತ್ತಲೇ ಬಂದಿದೆ. ಇದೀಗ ಎಫ್ ಬಿಐ ಫರೀದಕೋಟ್ ಗೆ ತೆರಳಿರುವುದು ಪಾಕ್ ಸರ್ಕಾರ ಇಕ್ಕಟ್ಟಿಗೆ ಸಿಲುಕಿದಂತಾಗಿದೆ.

ವಿಲಿಯಂ ರಾಬರ್ಟ್ ನೇತೃತ್ವದ ಎಫ್ ಬಿಐ ತಂಡ ಫರೀದಕೋಟ್ ತೆರಳಿ ತನಿಖೆ ಆರಂಭಿಸುತ್ತಿದ್ದಂತೆಯೇ ಕಸಬ್ ಪಾಕಿಸ್ತಾನದನು ಎನ್ನುವ ಯಾವ ಪುರಾವೆಗಳು ತನಿಖಾ ತಂಡಕ್ಕೆ ಸಿಕ್ಕಿಲ್ಲ ಎಂದು ಪಾಕ್ ಮಾಧ್ಯಮಗಳು ವರದಿ ಮಾಡಿವೆ. ಆದರೆ ಎಫ್ ಬಿಐ ಮೂಲಗಳು ಇದನ್ನು ಸ್ಪಷ್ಟವಾಗಿ ತಳ್ಳಿಹಾಕಿವೆ. ತನಿಖೆ ಮುಂದುವರಿದಿದ್ದು, ನಂತರದಲ್ಲಿ ಎಲ್ಲವನ್ನೂ ಸ್ಪಷ್ಟಪಡಿಸಲಾಗುವುದು ಎಂದು ಹೇಳಿದೆ.

ಮುಂಬೈ ಭಯೋತ್ಪಾದನೆಯ ಪ್ರಮುಖ ರೂವಾರಿ ಲಷ್ಕರ್ ಇ ತೊಯ್ಬಾ ಸಂಘಟನೆಯ ಉಗ್ರ ಝಾಕೀರ್ ರೆಹಮಾನ್ ಲಖ್ವಿ ಹಾಗೂ ಜರಾರ್ ಶಾನನ್ನು ಎಫ್ ಬಿಐ ವಿಚಾರಣೆ ನಡೆಸುವ ಸಾಧ್ಯತೆಗಳಿವೆ. ಜರಾರ್ ಶಾನನ್ನು ಬಂಧಿಸುವಂತೆ ಅಮೇರಿಕ ವಿದೇಶಾಂದ ಕಾರ್ಯದರ್ಶಿ ಕಾಂಡೋಲಿಜಾ ರೈಸ್ ಪಾಕ್ ಸರ್ಕಾರದ ಮೇಲೆ ತೀವ್ರ ಒತ್ತಡ ಹೇರಿದ್ದರು. ಈತನ ಬಂಧನ ಅತೀ ಮಹತ್ವದ್ದಾಗಿದೆ ಎನ್ನಲಾಗಿದೆ.

(ದಟ್ಸ್ ಕನ್ನಡ ವಾರ್ತೆ)