ಬೆಂಗಳೂರಿನ ಗರುಡಮಾಲ್‌ನಲ್ಲಿ ಇನ್ನೊಂದು ಅವಗಡ!

ಬೆಂಗಳೂರು, ಜುಲೈ 21: ನಗರದ ಗರುಡಮಾಲ್ ನಲ್ಲಿ ಶುಕ್ರವಾರ ರಾತ್ರಿ ಸುಮಾರು 9ರ ಸುಮಾರಿನಲ್ಲಿ ಲಿಫ್ಟ್ ಕೆಳಗೆ ಕುಸಿದ ಪರಿಣಾಮ, ನಾಲ್ಕು ಜನಕ್ಕೆ ಸಣ್ಣ ಪುಟ್ಟ ಗಾಯಗಳಾಗಿವೆ.

ಬೆನ್ನಿಗೆ ಗಾಯವಾದ ಶೀಮಾ ಬಗಾರಿಯಾ , ಮಂಡಿಗೆ ಪೆಟ್ಟು ಮಾಡಿಕೊಂಡ ಅಲ್ತಾಫ್ ಮಹಮದ್ ಹಾಗೂ ಇತರರನ್ನು ಹತ್ತಿರದ ಹಾಸ್ಮಟ್ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗಿದೆ.ಈ ಪ್ರಕರಣದ ಬಗ್ಗೆ ದೂರು ದಾಖಲಿಸಿಕೊಳ್ಳಲಾಗಿದೆ ಎಂದು ಅಶೋಕ ನಗರ ಠಾಣೆ ಪೊಲೀಸರು ಹೇಳಿದ್ದಾರೆ.

ಘಟನೆ ವಿವರ:

ಕೆಳ ಅಂತಸ್ತಿನಿಂದ ಮೇಲಕ್ಕೆ ಹೊರಟಿದ್ದ ಲಿಫ್ಟ್ ಗೆ ಅದರ ಸಾಮರ್ಥ್ಯಕ್ಕಿಂತ ಅಧಿಕ ಜನ ಒಳ ಸೇರಿದ ಪರಿಣಾಮ , ಮಿತಿ ಮೀರಿದ ಭಾರ ತಡೆಯಲಾರದೆ ದಿಢೀರ್ ಕುಸಿತಕ್ಕೆ ಒಳಗಾಯಿತು.

ಸಾರ್ವಜನಿಕರ ಉದ್ದಟತನವೇ ಈ ಘಟನೆಗೆ ಕಾರಣ. ಗರುಡ ಮಾಲ್ ಸುರಕ್ಷಿತ ಕ್ರಮಗಳನ್ನು ಅನುಸರಿಸುವಲ್ಲಿ ಯಾವುದೇ ಲೋಪ ಮಾಡಿಲ್ಲ ಎಂದು ಗರುಡ ಮಾಲ್ ನ ಮಾಲೀಕರು ಹೇಳಿದ್ದಾರೆ.

ಇದೇ ಮಾಲ್ ನಲ್ಲಿ ಕೆಲದಿನಗಳ ಹಿಂದೆ ಎಸ್ಕಲೇಟರ್ ಸಂದಿನಿಂದ ಬಿದ್ದ ಆರು ವರ್ಷದ ಅಹನ್ ಎಂಬ ಬಾಲಕ ಮೃತಪಟ್ಟಿದ್ದನ್ನು ಇಲ್ಲಿ ಸ್ಮರಿಸಬಹುದು.

(ದಟ್ಸ್ ಕನ್ನಡ ವಾರ್ತೆ)