ಸೈಕಲ್‌ ವಿರೋಧಿ ಪ್ರಚಾರ ಪ್ರಿಯ ಸಾಂಗ್ಲಿಯಾನರನ್ನು ವರ್ಗಾಯಿಸಿ

ಬೆಂಗಳೂರು : ಮಹಾತ್ಮಗಾಂಧಿ ರಸ್ತೆಯಲ್ಲಿ ಸೈಕಲ್‌ ಸಂಚಾರಕ್ಕೆ ನಿಷೇಧ ಸೇರಿದಂತೆ ಹಲವಾರು ಅನಗತ್ಯ ಯೋಜನೆಗಳನ್ನು ಹಮ್ಮಿಕೊಂಡಿರುವ ಬೆಂಗಳೂರು ನಗರ ಪೊಲೀಸ್‌ ಆಯುಕ್ತ ಎಚ್‌.ಟಿ. ಸಾಂಗ್ಲಿಯಾನ ಅವರನ್ನು ತಕ್ಷಣವೇ ವರ್ಗಾಯಿಸುವಂತೆ ಬಿಜೆಪಿ ನಗರ ಯುವ ಮೋರ್ಚಾ ಘಟಕ, ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರನ್ನು ಒತ್ತಾಯಿಸಿದೆ.

ಪ್ರಚಾರಕ್ಕಾಗಿ ಪ್ರತಿ ದಿನವೂ ಒಂದು ಅಗ್ಗದ ತಂತ್ರವನ್ನು ಸಾಂಗ್ಲಿಯಾನ ಸೃಷ್ಟಿಸುತ್ತಿದ್ದಾರೆ. ನಗರದ ಜನತೆಯ ವಿಶ್ವಾಸಕ್ಕೆ ಸಾಂಗ್ಲಿಯಾನ ಅವರ ಆಡಳಿತ ವೈಖರಿ ಕೊಡಲಿ ಪೆಟ್ಟು ನೀಡಿದೆ ಎಂದು ಬಿಜೆಪಿ ನಗರ ಯುವಮೋರ್ಚಾ ಅಧ್ಯಕ್ಷ ಎಸ್‌. ಪ್ರಕಾಶ್‌ ಟೀಕಿಸಿದ್ದಾರೆ.

ನಗರ ಕಾನೂನು ಸುವ್ಯವಸ್ಥೆಯು ಅತ್ಯಂತ ಸೂಕ್ಷ್ಮ ವಿಷಯವಾಗಿದ್ದು , ಇದನ್ನು ಸಮರ್ಥವಾಗಿ ನಿಭಾಯಿಸಲು ಸಮರ್ಥ ಅಧಿಕಾರಿಯನ್ನು ಸರ್ಕಾರ ತಕ್ಷಣವೇ ನೇಮಕ ಮಾಡಬೇಕು. ಸಾಂಗ್ಲಿಯಾನ ಅಧಿಕಾರ ಸ್ವೀಕರಿಸಿ ತಿಂಗಳು ತುಂಬುವ ಮುನ್ನವೇ ಹಿರಿಯ ನಾಗರೀಕರೊಬ್ಬರ ಹತ್ಯೆ ಸೇರಿದಂತೆ 2 ಜೋಡಿ ಕೊಲೆಗಳು ನಡೆದಿವೆ ಎಂದು ಪ್ರಕಾಶ್‌ ಆರೋಪಿಸಿದರು.

(ಇನ್ಫೋ ವಾರ್ತೆ)

ಮುಖಪುಟ / ಸಾಂಗ್ಲಿಯಾನ ವಾಚ್‌