ಸಾರಾಯಿ ಗುತ್ತಿಗೆದಾರರಿಗೆ ಮುಖ್ಯಮಂತ್ರಿಗಳಿಂದ ಮಾನವೀಯತೆ ಪಾಠ

ಹಾಸನ : ಗಂಡಂದಿರು ಹಾಗೂ ಮಕ್ಕಳು ಕುಡಿಯುವುದನ್ನು ತಪ್ಪಿಸಬೇಕು ಎಂದು ಬಯಸುವ ಮಹಿಳೆಯರ ಪ್ರಯತ್ನಗಳಿಗೆ ಅಡ್ಡಿ ಮಾಡುವುದು ಸರಿಯಲ್ಲ ಎಂದು ಅಭಿಪ್ರಾಯ ಪಟ್ಟಿರುವ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ , ಕುಡಿತ ವಿರೋಧಿ ಪ್ರಯತ್ನಗಳನ್ನು ನಡೆಸುವ ಹೆಣ್ಣು ಮಕ್ಕಳನ್ನು ಬೆಂಬಲಿಸಿದ್ದಾರೆ.

ಎರಡು ವರ್ಷಗಳ ನಂತರ ಇದೇ ಮೊದಲ ಬಾರಿಗೆ, ಸೋಮವಾರ ಹಾಸನ ಜಿಲ್ಲೆಗೆ ಆಗಮಿಸಿದ ಕೃಷ್ಣ ಅವರು- ಹೈಸ್ಕೂಲ್‌ ಮೈದಾನದಲ್ಲಿ ಜರುಗಿದ 40 ಸಾವಿರಕ್ಕೂ ಹೆಚ್ಚು ಜನರ ಸಭೆಯನ್ನು ಉದ್ದೇಶಿಸಿ ಮಾತನಾಡಿದರು. ಸಾರಾಯಿ ಅಂಗಡಿಗಳನ್ನು ರದ್ದು ಪಡಿಸುವಂತೆ ಹೋರಾಟ ಆರಂಭಿಸಿರುವ ಸ್ತ್ರೀಶಕ್ತಿ ಸ್ವ ಸಹಾಯ ಸಂಘಗಳಿಗೆ ಕೃಷ್ಣ ತಮ್ಮ ಸಂಪೂರ್ಣ ಬೆಂಬಲ ಘೋಷಿಸಿದರು.

ಹಲವು ಕಡೆ ಸ್ತ್ರೀ ಶಕ್ತಿ ಸಂಘಗಳ ಸದಸ್ಯೆಯರ ಮೇಲೆ ಅಬಕಾರಿ ಗುತ್ತಿಗೆದಾರರು ಹಲ್ಲೆ ನಡೆಸುತ್ತಿರುವ ವರದಿಗಳನ್ನು ನಾನು ಗಮನಿಸಿದ್ದೇನೆ. ಇನ್ನು ಮುಂದೆ ಇಂಥ ದೌರ್ಜನ್ಯವನ್ನು ಕೈಬಿಟ್ಟು , ತಾವು ಪಡೆದಿರುವ ಪರವಾನಿಗೆಯ ಚೌಕಟ್ಟಿನಲ್ಲಿ - ಕುಡಿಯಬೇಕು ಎಂದು ಬರುವವರಿಗೆ ಮಾತ್ರ ಸಾರಾಯಿ ಮಾರಾಟಬೇಕು ಎಂದು ಕೃಷ್ಣ ಹೇಳಿದರು.

ಗಂಡ- ಮಕ್ಕಳು ಸಾರಾಯಿ ಕುಡಿಯದಂತೆ ಅಡ್ಡಿ ಪಡ್ಡಿಸುವ ಮಹಿಳೆಯರ ಪ್ರಯತ್ನಗಳನ್ನು ಹತ್ತಿಕ್ಕುವ ಅಬಕಾರಿ ಗುತ್ತಿಗೆದಾರರ ಪ್ರಯತ್ನಗಳು ಸರಿಯಾದುವಲ್ಲ . ಅಬಕಾರಿ ಗುತ್ತಿಗೆದಾರರು ಮಾನವೀಯತೆಯನ್ನು ಹಾಗೂ ಸರಿಯಾಗಿ ನಡೆದುಕೊಳ್ಳುವುದನ್ನು ರೂಢಿಸಿಕೊಳ್ಳಬೇಕು ಎಂದು ಮುಖ್ಯಮಂತ್ರಿ ಎಚ್ಚರಿಸಿದರು.

(ಇನ್ಫೋ ವಾರ್ತೆ)

ಮುಖಪುಟ / ಕೃಷ್ಣಗಾರುಡಿಯ ಕನ್ನಡಿ