ರಾಜ್‌ ಬಿಡುಗಡೆಗೆ ನೀಡಿದ್ದು 10 ಕೋಟಿ ರು:ಪೊಲೀಸರ ಶಂಕೆ

ಬೆಂಗಳೂರು : ರಾಜ್‌ಕುಮಾರ್‌ ಅಪಹರಣವಾಗಿದ್ದ ಸಮಯದಲ್ಲಿ ವರನಟನ ಬಿಡುಗಡೆಗೆ ಕಾಡುಗಳ್ಳ ವೀರಪ್ಪನ್‌ ಕೋಟಿಗಟ್ಟಲೆ ಹಣ ಕೇಳಿದ್ದ ಎಂಬ ಗುಸುಗುಸು ಇತ್ತು. ಈಗ ರಾಜ್‌ರನ್ನು ಬಂಧನದಿಂದ ಬಿಡಿಸಲು ಕನ್ನಡ ಚಿತ್ರ ನಿರ್ಮಾಪಕರು ಭಾರಿ ಮೊತ್ತ ನೀಡಿದ್ದಾರೆ ಎಂಬ ಒಂದೆಳೆಯ ಸುಳಿವು ಸಿಕ್ಕಿದೆ.

ಈ ಹಿನ್ನೆಲೆಯಲ್ಲಿ ಎಸ್‌.ಟಿ.ಎಫ್‌. ಪೊಲೀಸರು, ಸೋಮವಾರದಿಂದಲೇ ರಾಜ್ಯದ ಪ್ರತಿಷ್ಠಿತ ನಿರ್ಮಾಪಕರನೇಕರೊಂದಿಗೆ ಮಾತುಕತೆ ಹೆಸರಿನಲ್ಲಿ ವಿಚಾರಣೆ ನಡೆಸುವ ಸಾಧ್ಯತೆಗಳು ನಿಚ್ಚಳವಾಗಿವೆ. ರಾಜ್‌ ವೀರಪ್ಪನ್‌ ಒತ್ತೆಯಾಳಾಗಿದ್ದ ಸಂದರ್ಭದಲ್ಲಿ ಬೆಂಗಳೂರಿನ ರಾಷ್ಟ್ರೀಕೃತ ಬ್ಯಾಂಕ್‌ ಒಂದರಲ್ಲಿ ದೊಡ್ಡ ಪ್ರಮಾಣದ ಹಣ ಪಡೆದಿರುವ ಖಚಿತ ಮಾಹಿತಿ ಪೊಲೀಸರಿಗೆ ಸಿಕ್ಕಿದೆ ಎಂದು ತಿಳಿದುಬಂದಿದೆ.

ರಾಜ್‌ರನ್ನು ಬಿಡುಗಡೆ ಮಾಡಿಸಲು, ಚಿತ್ರ ನಿರ್ಮಾಪಕರು ಹಣ ಸಂಗ್ರಹಿಸಿ ನೀಡಿದ್ದಾರೆ ಎಂದು ಶಂಕಿಸಿರುವ ಪೊಲೀಸರು, ಅಪಹರಣ -ಬಿಡುಗಡೆಯ ನಡುವೆ ಭಾರಿ ಪ್ರಮಾಣದ ಹಣಕಾಸಿನ ವ್ಯವಹಾರ ನಡೆದಿದೆಯೇ ಎಂಬುದನ್ನು ಖಾತ್ರಿ ಮಾಡಿಕೊಳ್ಳಲು ಕಾರ್ಯಾಚರಣೆಯಲ್ಲಿ ತೊಡಗಿದ್ದಾರೆ.

ವೀರಪ್ಪನ್‌ನ ಬಂಟ ಸೇತುಕುಳಿ ಗೋವಿಂದನ್‌ನ ಬಂಧುಗಳಿಂದ ಐದು ಲಕ್ಷ ರುಪಾಯಿಗಳನ್ನು ವಶಪಡಿಸಿಕೊಂಡ ಬಳಿಕ ಪೊಲೀಸರಿಗೆ ಈ ಬಗ್ಗೆ ಶಂಕೆ ಬಲವಾಗಿದೆ. ಈ ಹಣ ರಾಜ್‌ ಅಪಹರಣ ಕಾಲದಲ್ಲಿ ವೀರಪ್ಪನ್‌ಗೆ ದೊರೆತಿದೆ ಎಂದು ಅವರು ನಂಬಿದ್ದಾರೆ.

ಈ ಹಣದಿಂದಲೇ ವೀರಪ್ಪನ್‌ ನಕ್ಕಿರನ್‌ ಪತ್ರಿಕೆಯ ವರದಿಗಾರ ಶಿವಸುಬ್ರಹ್ಮಣ್ಯ ಮೂಲಕ ಮೊಬೈಲ್‌ ಫೋನ್‌ ಸೇರಿದಂತೆ ಅತ್ಯಾಧುನಿಕ ಉಪಕರಣ ಖರೀದಿಸಿರಬಹುದು ಎಂದೂ ಪೊಲೀಸರು ಶಂಕಿಸಿದ್ದಾರೆ. ಹತ್ತಿರ ಹತ್ತಿರ ಹತ್ತು ಕೋಟಿ ರುಪಾಯಿಗಳನ್ನು ಕನ್ನಡ ಚಿತ್ರೋದ್ಯಮಿಗಳು ಸಂಗ್ರಹಿಸಿ, ವೀರಪ್ಪನ್‌ಗೆ ಕೊಟ್ಟಿರಬಹುದು ಎಂಬುದು ಪೊಲೀಸರ ಲೆಕ್ಕಾಚಾರ.

ಆದರೆ, ಇದಕ್ಕೆ ಬಲವಾದ ಹಾಗೂ ಪೂರಕವಾದ ದಾಖಲೆಗಳು ಪೊಲೀಸರಿಗೆ ಈವರೆಗೆ ಸಿಕ್ಕಿಲ್ಲ. ದೊರೆತಿರುವ ಒಂದೇ ಒಂದು ಸುಳಿವಿನ (ಬ್ಯಾಂಕ್‌ ವಹಿವಾಟು) ಆಧಾರದ ಮೇಲೆ ಹೆಚ್ಚಿನ ವಿಷಯವನ್ನು ಹೆಕ್ಕಿ ತೆಗೆಯಲು ಅವರು ಹರಸಾಹಸ ಮಾಡುತ್ತಿದ್ದಾರೆ. ವೀರಪ್ಪನ್‌ ಶಿಕಾರಿ ಸಂದರ್ಭದಲ್ಲಿ ಎಸ್‌.ಟಿ.ಎಫ್‌. ಸುಮಾರು 12 ಲಕ್ಷ ರುಪಾಯಿ ವಶಪಡಿಸಿಕೊಂಡಿದ್ದು, ಈ ಶಂಕೆಗೆ ಪುಷ್ಟಿ ನೀಡಿದೆ.

(ಇನ್‌ಫೋ ವಾರ್ತೆ)

ಮುಖಪುಟ / ವೀರಪ್ಪನ್‌ ಶಿಕಾರಿ