ಜಾಗತಿಕ ಸೈಬರ್‌ ಅಪರಾಧ ತಡೆಗಟ್ಟಲು ಒಂದೆಡೆ ಕಲೆತ 30 ದೇಶಗಳು

ಬುಡಾಫೆಸ್ಟ್‌ : ಸೆಪ್ಟೆಂಬರ್‌ 11ರಂದು ಅಮೆರಿಕದ ಮೇಲೆ ನಡೆದ ಭಯೋತ್ಪಾದಕ ವಾಯುದಾಳಿಯ ಹಿನ್ನೆಲೆಯಲ್ಲಿ ಕಂಪ್ಯೂಟರ್‌ ಸಂಬಂಧಿತ ಅಪರಾಧಗಳನ್ನು ತಡೆಗಟ್ಟಲು 30 ರಾಷ್ಟ್ರಗಳು ತಮ್ಮ ಸಮ್ಮತಿ ಸೂಚಿಸಿವೆ. ಕಂಪ್ಯೂಟರ್‌ ಅಪರಾಧೀಕರಣ ತಡೆಗಟ್ಟುವ ಸಂಕಲ್ಪದೊಂದಿಗೆ ಈ ಎಲ್ಲ ರಾಷ್ಟ್ರಗಳೂ ಒಪ್ಪಂದಕ್ಕೆ ಸಹಿ ಹಾಕಿವೆ.

ಭಯೋತ್ಪಾದನೆ ಕೃತ್ಯಗಳ ಬಗ್ಗೆ ತನಿಖೆ ನಡೆಸುತ್ತಿರುವ ಅಧಿಕಾರಿಗಳಿಗೆ ಇ -ಸಾಕ್ಷ್ಯ ಸಂಗ್ರಹಿಸಿ ಒದಗಿಸಲು ನೆರವಾಗುವುದು ಒಪ್ಪಂದದ ಪ್ರಮುಖ ಉದ್ದೇಶವಾಗಿದೆ. ಸೈಬರ್‌ಲೋಕದ ಅಪರಾಧೀಕರಣ ತಡೆಗಟ್ಟಲು ಅಂತಾರಾಷ್ಟ್ರೀಯ ಸಹಕಾರದ ಅಗತ್ಯವಿದೆ ಎಂಬುದನ್ನು ಮನಗಂಡ ಈ ರಾಷ್ಟ್ರಗಳು ನಾಲ್ಕು ವರ್ಷಗಳ ಸತತ ಪ್ರಯತ್ನದ ಬಳಿಕ ಒಮ್ಮತದ ಒಪ್ಪಂದಕ್ಕೆ ಅಂಕಿತ ಹಾಕಿವೆ.

ಕಾಪಿರೈಟ್‌, ಹಕ್ಕುಚ್ಯುತಿ, ಕಂಪ್ಯೂಟರ್‌ ಸಂಬಂಧಿತ ಮೋಸ ಪ್ರಕರಣ, ಅಶ್ಲೀಲತೆ, ಇಂಟರ್‌ನೆಟ್‌ ಭದ್ರತೆಗೆ ತೊಡಕುಂಟುಮಾಡುವುದು, ಭದ್ರತೆ ಸೇರಿದಂತೆ ಹಲವು ಬಗೆಯ ಅಪರಾಧ ನಿಗ್ರಹಕ್ಕೆ ಈ ಒಪ್ಪಂದ ಸಹಕಾರಿಯಾಗಲಿದೆ.

ಈ ವಿಷಯವನ್ನು ಜರ್ಮನಿಯ ಕ್ರಿಶ್ಚಿಯನ್‌ ಕ್ರೂಗರ್‌ ಇಲ್ಲಿ ತಿಳಿಸಿದ್ದಾರೆ. ಮಕ್ಕಳ ನಗ್ನ ಸೈಟ್‌ಗಳನ್ನು ನಿರ್ಮಿಸಿ, ಮಕ್ಕಳನ್ನು ಅಶ್ಲೀಲ ಸಾಮಗ್ರಿಯಾಗಿ ಬಳಸುವುದು ಒಪ್ಪಂದದ ರೀತ್ಯ ಘೋರ ಅಪರಾಧವಾಗಿದೆ ಎಂದೂ ಅವರು ಹೇಳಿದ್ದಾರೆ.

ಒಪ್ಪಂದಕ್ಕೆ 26 ಐರೋಪ್ಯ ರಾಷ್ಟ್ರಗಳಲ್ಲದೆ, ಜಪಾನ್‌, ಕೆನಡಾ, ದಕ್ಷಿಣ ಆಫ್ರೀಕಾ, ಅಮೆರಿಕ ರಾಷ್ಟ್ರಗಳು ಸಹಿ ಹಾಕಿವೆ. ಇನ್ನೂ ಹಲವಾರು ರಾಷ್ಟ್ರಗಳು ಈ ಒಪ್ಪಂದಕ್ಕೆ ಸಹಿ ಹಾಕುವ ನಿರೀಕ್ಷೆ ಇದೆ ಎಂದು ಅವರು ತಿಳಿಸಿದ್ದಾರೆ.

ಮುಖಪುಟ / ಕರ್ನಾಟಕ ಸಿಲಿಕಾನ್‌ ಕಣಿವೆ