ನಗರದ 1400 ಠಕ್ಕರ ಶರಣಾಗತಿಗೆ ಸಾಂಗ್ಲಿಯಾನ ಡೆಡ್‌ಲೈನ್‌

ಬೆಂಗಳೂರು : ನವೆಂಬರ್‌ 24ರ ಶನಿವಾರ 3 ಗಂಟೆಯಾಳಗೆ ನೀವಾಗೇ ಬಂದು ಶರಣಾದರೆ, ನನ್ನ ಮಿತಿಯಲ್ಲಿ ನಿಮಗೆ ಬೇಕಾದ ಎಲ್ಲಾ ಸಹಾಯ ಮಾಡುತ್ತೇನೆ. ಸಾಮಾನ್ಯ ಕ್ರಿಮಿನಲ್‌ಗಳ ಪಟ್ಟಿಯಿಂದ ನಿಮ್ಮ ಹೆಸರು ಕಿತ್ತು ಹಾಕುತ್ತೇನೆ. ಎಲ್ಲರಂತೆ ಬದುಕಲು ಬಿಡುತ್ತೇನೆ. ನಗರದ 1400 ಠಕ್ಕರು, ಸುಲಿಗೆಕೋರರಿಗೆ ಪೊಲೀಸ್‌ ಕಮಿಷನರ್‌ ಎಚ್‌.ಟಿ.ಸಾಂಗ್ಲಿಯಾನ ಕೊಟ್ಟಿರುವ ಡೆಡ್‌ಲೈನ್‌ ಇದು.

ಈ 1400 ಮಂದಿ ಕೆಲವು ವರ್ಷಗಳ ಹಿಂದೆ ಸತ್ತ ಕೋಳಿ ಫಯಾಜ್‌, ಜೈರಾಜ್‌ ಮತ್ತು ರಾಜೇಂದ್ರನಷ್ಟು ಖತರ್ನಾಕ್‌ ಅಲ್ಲ. ಆದರೆ ಪದೇ ಪದೇ ತಪ್ಪೆಸಗುತ್ತಾ, ನಾಗರಿಕರಿಗೆ ತಲೆನೋವಾಗಿದ್ದಾರೆ. ಮನೆಯಿಂದ ಹೊರಕ್ಕೆ ಎಳೆದು ಹಾಕುವುದು, ಜೂಜು ಆಡುವುದು, ಮಂಕುಬೂದಿ ಎರಚಿ ಮೋಸ ಮಾಡುವುದು ಈ 1400 ಮಂದಿಯ ಕಾಯಕ. ಮೊದಲ ಬಾರಿಗೆ ತಪ್ಪೆಸಗುವ ವ್ಯಕ್ತಿ ರೌಡಿಯಲ್ಲ. ಅದನ್ನೇ ಚಾಳಿ ಮಾಡಿಕೊಂಡವ ರೌಡಿ. ಯಾರದೋ ಕುಮ್ಮಕ್ಕಿನಿಂದಲೇ ಇಂಥಾ ಕೃತ್ಯಕ್ಕೆ ಇವರು ಇಳಿದಿರುತ್ತಾರೆ ಎಂದು ಸಾಂಗ್ಲಿಯಾನ ಹೇಳಿದರು.

ಭಂಡತನ ಇವರಲ್ಲಿ ಭರ್ತಿ. ಕಾನೂನು ಮತ್ತು ಸುವ್ಯವಸ್ಥೆಯ ನಡುವೆಯೇ ನಸುಗುನ್ನಿಗಳಂತಿರುವ ಈ 1400 ಮಂದಿಯನ್ನು ದಾರಿಗೆ ತರುವ ಉದ್ದಿಶ್ಯದಿಂದ ಈ ಡೆಡ್‌ಲೈನ್‌. ವಿಜಯನಗರ, ಮಲ್ಲೇಶ್ವರಂ, ಕೆಂಗೇರಿ ಗೇಟ್‌ ಮತ್ತು ಚಿಕ್ಕಪೇಟೆಯಲ್ಲಿ ಇಂಥವರ ಸಂಖ್ಯೆ ಹೆಚ್ಚಾಗಿದೆ ಎಂದರು.

(ಇನ್ಫೋ ವಾರ್ತೆ)

ಮುಖಪುಟ / ಸಾಂಗ್ಲಿಯಾನ ವಾಚ್‌