ವೃದ್ಧರಿಗೆ ಸಾಂಗ್ಲಿಯಾನ ದೀಪಾವಳಿ ಕೊಡುಗೆ: ಅವರಿಗೊಂದು ಸಹಾಯ ವಾಣಿ

ಬೆಂಗಳೂರು : ಮಕ್ಕಳ ಹಾಗೂ ಮಹಿಳೆಯರ ಸಹಾಯ ವಾಣಿ ನಂತರ ಇದೀಗ ಬರಲಿದೆ ಹಿರಿಯ ನಾಗರಿಕರ ಸಹಾಯ ವಾಣಿ. ಭಾರತ್‌ ಸಂಚಾರ ನಿಗಮ ನಿಯಮಿತದ ನೆರವಿನೊಂದಿಗೆ ಬೆಂಗಳೂರು ಹಿರಿಜೀವಗಳಿಗೆ ಸಾಂಗ್ಲಿಯಾನ ಕೊಡುತ್ತಿರುವ ದೀಪಾವಳಿ ಕಾಣಿಕೆಯಿದು.

ಭಾರತದಲ್ಲೇ ಎಲ್ಲೂ ಇಂಥಾ ಸಹಾಯ ವಾಣಿ ಸವಲತ್ತು ಈವರೆಗೆ ಇಲ್ಲ. ಸ್ವಸಹಾಯ ಸಮೂಹಗಳ ನೆರವನ್ನೂ ಈ ಕೆಲಸಕ್ಕೆ ಪಡೆಯಲಾಗುವುದು. ಒಬ್ಬಂಟಿಯಾಗಿ ಬದುಕುತ್ತಿರುವ ಹಿರಿಯ ನಾಗರಿಕರ ದೌರ್ಜನ್ಯ, ಕೊಲೆ ಪ್ರಕರಣಗಳು ವ್ಯಾಪಕವಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಸಹಾಯ ವಾಣಿ ವ್ಯವಸ್ಥೆ ಜಾರಿಗೆ ತರಲಾಗುತ್ತಿದೆ. ಅದನ್ನು ವ್ಯವಸ್ಥಿತವಾಗಿ ನಡೆಸಿಕೊಂಡು ಹೋಗಲು ಬೇಕಾದ ಕ್ರಮಗಳನ್ನು ಕೈಗೊಳ್ಳಲಾಗುವುದು ಎಂದು ಸಾಂಗ್ಲಿಯಾನ ಸುದ್ದಿಗಾರರಿಗೆ ತಿಳಿಸಿದರು.

ದೀಪಾವಳಿ ದಿನವೇ ಈ ಸಹಾಯ ವಾಣಿ ವ್ಯವಸ್ಥೆ ಜಾರಿಗೆ ಬರಲಿದ್ದು, ಸಹಾಯಕ್ಕಾಗಿ ಕರೆ ಮಾಡಬೇಕಾದ ದೂರವಾಣಿ ಸಂಖ್ಯೆಯನ್ನೂ ಅಂದೇ ಪ್ರಕಟಿಸಲಾಗುವುದು. ಯಾವುದೇ ರೀತಿಯ ದೌರ್ಜನ್ಯ, ಆತಂಕ ಕುರಿತು ಹಿರಿಯ ನಾಗರಿಕರು ಸಹಾಯ ವಾಣಿ ಮೂಲಕ ದೂರು ಕೊಡಬಹುದಾಗಿದೆ ಎಂದರು.

(ಇನ್ಫೋ ವಾರ್ತೆ)

ಮುಖಪುಟ / ಸಾಂಗ್ಲಿಯಾನ ವಾಚ್‌