ಪ್ರಸಕ್ತ ವಿತ್ತ ವರ್ಷದಲ್ಲಿ ಎಸ್‌ಬಿಎಂನ 95 ಶಾಖೆಗಳ ಗಣಕೀಕರಣ

ದಾವಣಗೆರೆ : ಪ್ರಸಕ್ತ ವಿತ್ತ ವರ್ಷದೊಳಗೆ ಸ್ಟೇಟ್‌ ಬ್ಯಾಂಕ್‌ ಆಫ್‌ ಮೈಸೂರಿನ 95 ಶಾಖೆಗಳನ್ನು ಏಕಜಾಲದಡಿ ಗಣಕೀಕರಣಗೊಳಿಸಲಾಗುವುದು ಎಂದು ಬ್ಯಾಂಕಿನ ವ್ಯವಸ್ಥಾಪಕ ನಿರ್ದೇಶಕ ಎಂ.ಸೀತಾರಾಮ ಮೂರ್ತಿ ತಿಳಿಸಿದ್ದಾರೆ.

ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತಾಡುತ್ತಿದ್ದ ಅವರು, ಬ್ಯಾಂಕಿನ ತಾಂತ್ರಿಕ ಅಭಿವೃದ್ಧಿಗೆ ಹೆಚ್ಚು ಒತ್ತು ನೀಡುತ್ತಿದ್ದೇವೆ. 50 ಕೋಟಿ ರುಪಾಯಿ ವೆಚ್ಚದಲ್ಲಿ ಗಣಕೀಕರಣ ಯೋಜನೆಯನ್ನು ಕೈಗೆತ್ತಿಕೊಂಡಿದ್ದೇವೆ. ಇದರಿಂದ ಒಂದು ಶಾಖೆಯಲ್ಲಿ ಖಾತೆ ತೆರೆಯುವ ಗ್ರಾಹಕ ಜಾಲದಡಿ ಇರುವ ಯಾವುದೇ ಶಾಖೆಯಲ್ಲಿ ಜಮೆ- ತೆಗೆ ವ್ಯವಹಾರ ನಡೆಸಬಹುದಾಗಿದೆ ಎಂದರು.

ಸೆಪ್ಟೆಂಬರ್‌ ಅಂತ್ಯಕ್ಕೆ ಮುಗಿದ ಅರ್ಧ ವಿತ್ತ ವಾರ್ಷಿಕ ಅವಧಿಯಲ್ಲಿ ಬ್ಯಾಂಕು 31.79 ಕೋಟಿ ರುಪಾಯಿ ನಿವ್ವಳ ಲಾಭ ಮಾಡಿದೆ. ಕಳೆದ ವಿತ್ತ ವರ್ಷದ ಇದೇ ಅವಧಿಗಿಂತ ಇದು ಪ್ರತಿಶತ 79.30ರಷ್ಟು ಹೆಚ್ಚು. ನಿರ್ವಹಣಾ ಲಾಭದಲ್ಲೂ ಪ್ರತಿಶತ 51ರಷ್ಟು ಏರಿಕೆಯಾಗಿದೆ. ಸ್ವಯಂ ನಿವೃತ್ತಿ ಯೋಜನೆ ಜಾರಿಗೆ ತಂದ ನಂತರವೂ ಬ್ಯಾಂಕು ಇಷ್ಟೊಂದು ಲಾಭ ಮಾಡಿದೆ ಎಂದು ಸೀತಾರಾಮ ಮೂರ್ತಿ ಹೆಮ್ಮೆಯಿಂದ ಹೇಳಿಕೊಂಡರು.

(ಇನ್ಫೋ ವಾರ್ತೆ)