ವರ್ಲ್ಡ್‌ ಹೆರಿಟೇಜ್‌ ಸಮಿತಿಯ ಸದಸ್ಯ ರಾಷ್ಟ್ರವಾಗಿ ಭಾರತಆಯ್ಕೆ

ನವದೆಹಲಿ : ಯುನೆಸ್ಕೋ ಕಾರ್ಯ ನಿರ್ವಾಹಕ ಮಂಡಳಿ ಮತ್ತು ವಿಶ್ವ ಪರಂಪರಾ ಸಮಿತಿಗೆ ಹತ್ತು ವರ್ಷಗಳ ದೀರ್ಘ ಅಂತರದ ಬಳಿಕ ಭಾರತ ಸದಸ್ಯ ರಾಷ್ಟ್ರವಾಗಿ ಆಯ್ಕೆಯಾಗಿದೆ.

ಈ ಮೂಲಕ ಮಾಹಿತಿಗೆ ಸಂಬಂಧಿಸಿದ ಇಂಟರ್‌ ಗವರ್ನ್‌ಮೆಂಟಲ್‌ ಕಮಿಟಿಗೂ ಭಾರತ ಸದಸ್ಯ ರಾಷ್ಟ್ರವಾಗಿರುತ್ತದೆ. ಬಿಜೆಪಿಯ ರಾಜ್ಯ ಸಭಾ ಸದಸ್ಯ ಮತ್ತು ಮಾಜಿ ಆಡಿಟರ್‌ ಜನರಲ್‌ ಟಿ.ಎನ್‌. ಚತುರ್ವೇದಿ ಭಾರತವನ್ನು ಪ್ರತಿನಿಧಿಸುತ್ತಾರೆ ಎಂದು ಬುಧವಾರ ಪಿಟಿಐ ವರದಿ ಮಾಡಿದೆ.

ಪ್ಯಾರಿಸ್‌ನಲ್ಲಿ ಕೊನೆಗೊಂಡ ಯುನೆಸ್ಕೋದ ಸಾಮಾನ್ಯ ಸಭೆಯಲ್ಲಿ ಈ ಕುರಿತ ಚುನಾವಣೆಗಳು ನಡೆದವು. ಪ್ರತಿಷ್ಠಿತ ವಿಶ್ವ ಪರಂಪರಾ ಸಮಿತಿಗೆ ಹತ್ತು ವರ್ಷಗಳ ಬಳಿಕ ಪ್ರಥಮ ಸುತ್ತಿನ ಚುನಾವಣೆಯಲ್ಲಿಯೇ ಭಾರತ ಆಯ್ಕೆಗೊಂಡಿದೆ. ಅಲ್ಲದೆ ಮಾಹಿತಿಗೆ ಸಂಬಂಧಿಸಿ ಹೊಸದಾಗಿ ಆರಂಭವಾಗಿರುವ ಇಂಟರ್‌ ಗವರ್ನ್‌ಮೆಂಟಲ್‌ ಸಮಿತಿಗೂ ಭಾರತ ಅತೀ ಹೆಚ್ಚು ಮತದೊಂದಿಗೆ ಗೆದ್ದಿದೆ ಎಂದು ಪ್ರಕಟಣೆ ಹೇಳಿದೆ.

(ಪಿಟಿಐ)